2024 жылға арналған есеп

Құрметті әріптестер!

2024 жыл Астана қаласы мәслихатының VIII сайланымы үшін жемісті жыл болды. Жыл басынан бері 16 сессия, бюджет, экономика, өнеркәсіп және кәсіпкерлік мәселелері жөніндегі тұрақты комиссияның 7 отырысы, заңдылық, құқық тәртібі және жұртшылықпен жұмыс мәселелері жөніндегі тұрақты комиссияның 13 отырысы, құрылыс, экология, көлік және тұрғын үй-коммуналдық шаруашылық мәселелері жөніндегі тұрақты комиссиясының 13 отырысы, сондай-ақ әлеуметтік-мәдени даму мәселелері жөніндегі тұрақты комиссияның 8 отырысы өткізілді. Сонымен қатар 35 жұмыс отырысы, 4 қоғамдық тыңдау, 33 «Депутат күні», 5 бірлескен отырыс өткізіліп, 142 нысанға бару ұйымдастырылды. Мәслихат отырыстарында 200-ден астам мәселе қаралып, тиісті шешімдер қабылданды. 

Мәслихат бюджеттік бағдарламаларды бекіту бойынша функцияларды толық көлемде орындап, бюджет бағдарламалары әкімшілерінің өтінімдерін қалыптастыру процесіне белсенді қатысты. Айта кетейін, осы жылы депутаттар шығындардың басым бағыттарын ескере отырып, 2025 жылға қаржыландыруды бөлу бойынша ұсыныстарды тиісті лимит шеңберінде екінші рет әзірледі. Нәтижесінде, мәслихат депутаттарының тікелей қатысуымен Астана қаласының үш жылдық бюджетіне бірқатар өзгерістер енгізілді.

Қаңтар айында өткен кезектен тыс сессияда 2035 жылға дейінгі жаңа бас жоспардың жобасы бірауыздан мақұлданды. Бұл құжатқа сәйкес, елорда халқының болжамды саны 2 миллион 275 мың адамға жетеді деп күтілуде. Қала 148 секторға бөлінді, инженерлік инфрақұрылым, көшелер мен жолдарды, сондай-ақ мектептер мен ауруханалар сияқты әлеуметтік нысандарды дамытуға ерекше назар аударылды.

Биыл елорданың жаңа алтыншы ауданы – «Сарайшықтың» ашылуына бастамашы болдық. Сонымен қатар, ҚР Парламенті Сенатының жұмыс топтарының бірқатар отырыстарына қатысып, «Құрылыс кодексіне», алкоголь өнімдерін сату және ойын-сауық орындарының жұмысына қатысты ережелерге өзгерістер енгізу бойынша ұсыныстар бердік. Автобус жүргізушілерінің тапшылығы мәселесін талдап, қоғамдық көліктің жұмысын жақсарту бойынша ұсыныстар енгіздік.

Қаланы абаттандыру ережелерінің жаңа редакциясы бекітілді. Ережелер 4 бөлім және 176 тармақтан тұрады, олар елорданың ерекшеліктері мен қалыптасқан тәжірибеге негізделіп әзірленген. Ережелер абаттандыру және оны ұстау саласындағы жеке және заңды тұлғалардың қарым-қатынасын реттейді. Бұған дейін тұрмыстық қалдықтар контейнерлерінің алаңдарына, ғимараттардың конструктивтік элементтерін тазалауға қойылатын талаптарды нақты сипаттау және ережелерді бұзушыларға қатысты алдын алу шараларын күшейту ұсынылған болатын.

Депутаттық корпустың белсенді қатысуымен автобустар маршруттары жетілдіріліп, желілер кеңейтілді. Қоғамдық көлікке қолжетімділікті арттыру мақсатында экологиялық таза, заманауи 315 автобус сатып алынды. Электронды төлем жүйелері – байланыссыз карталар мен мобильді қосымшалар енгізіліп, төлем жасау үдерісі жеңілдетілді. Кейбір аудандарда жолаушылар ағынын азайту үшін қарбалас уақытта рейстер саны арттырылды.

Елорданың алты ауданындағы шағын аудандар мен тұрғын үй алаптарының мәселелерін анықтау мақсатында әкімдермен кездесулер басталды. Жергілікті жерлерде өткізілген көшпелі жиындар нәтижесінде жүйелі және ағымдағы бірқатар проблемалар анықталды, олардың талдауы депутаттық корпустың қарауына ұсынылатын болады.

Депутаттар сайлау округтеріндегі азаматтарды қабылдап, кездесулер мен жеке қабылдаулар өткізді. Есептік кезеңде 3398 жеке қабылдау өткізіліп, 370 кездесу ұйымдастырылды. Сайлаушылардан 1000-нан астам өтініш келіп түсті.

Мәслихат депутаттары сайлаушылармен өзара іс-қимылда ашықтықты қамтамасыз етуге баса мән береді. Сессия туралы ақпарат мәслихат сайтында алдын ала жарияланады, отырыстар әлеуметтік желілерде онлайн көрсетіледі. Тұрақты комиссиялардың құрамы, комиссия отырыстары, қоғамдық тыңдаулар, жұмыс жоспарлары және басқа да ақпараттар жарияланып отырады. Сонымен қатар, азаматтарды қабылдау кестесі мен байланыс деректері бұқаралық ақпарат құралдары мен әлеуметтік желілерде орналастырылады.

«AMANAT» партиясы фракциясының жұмысы және партияның сайлауалды бағдарламасының Жол картасын іске асыру аясында 6 отырыс өткізілді. Оған қала әкімі, оның орынбасарлары және басқарма басшылары қатысты. Бағдарламалық құжатта 126 тармақ бар, оның 4 тармағының мерзімі әлі келген жоқ, 114 тармағы 2024 жылы орындалуы тиіс. Бүгінгі таңда жоспарланған 114 іс-шараның 64-і (56%) орындалды, 50-і (44%) орындалу сатысында. Партияның қоғамдық қабылдауында 101 қабылдау өткізіліп, 725 азамат қабылданды.

Елордадағы құқық бұзушылықтармен күресу, қоғамдық тәртіп пен қауіпсіздікті қамтамасыз етуге арналған іс-шаралар жоспары сәтті жүзеге асырылуда. Бұл құжат аясында полиция қызметкерлерінің әлеуметтік кепілдіктерін арттыру үшін қаражат бөлінді. Соның ішінде тұрғын үй төлемдері, патрульдік полиция қызметкерлеріне арналған арнайы киіммен қамтамасыз ету, сондай-ақ жедел басқару орталығының бейнебақылау жүйесін жаңғырту жүргізілді. Қазіргі заманғы жабдықтар сатып алынып, жалақыны арттыру қолдау тапты. «Цифрлық полицей» жобасы аясында жеке құрамға 100 мобильді планшет берілді, ал учаскелік инспекторлар үшін бейнетіркеу құрылғыларын қамтитын 924 смарт-жетонды үш жылға жалға алу келісімі жасалды.

Сондай-ақ үш жылға арналған Елордалық төтенше жағдайлар қызметін дамыту жөніндегі кешенді жоспардың жүзеге асырылуын бірнеше рет көшпелі жиындарда тексердік. Бағдарламалық құжатта өрт сөндіру деполары мен бөлімдерін салу, жөндеу, оларды жабдықтау және елорда құтқарушыларына әлеуметтік қолдау көрсетуге ерекше назар аударылды. Бір жылдан астам уақыт ішінде жағдай жақсарды. 2025 жылы 1970-1980 жылдары салынған алты өрт сөндіру бөліміне қайта жаңғырту жүргізу, 60-қа жуық жаңа арнайы техника сатып алу жоспарланып отыр. Құтқарушылар мен өрт сөндірушілерге алғаш рет еуропалық стандарттарға сай заманауи жабдықтар мен арнайы киімдер алынды, ал биыл қиын қолжетімді аймақтарға кіруге арналған 16 автокөлік сатып алынды. Келесі жылы «Ильинка» тұрғын алабында жаңа өрт сөндіру бөлімін ашып, тағы үш тез салынатын өрт сөндіру бөлімінің жобасын бастаймыз. Сонымен қатар, ТЖД-ның 2 мыңға жуық қызметкері мен олардың отбасыларының әлеуметтік қорғалуына ерекше назар аударылуда. Бұл балалардың жазғы демалысын ұйымдастыру, балабақша орындарымен қамтамасыз ету және тұрғын үй төлемдерін қамтиды.

Астананың денсаулық сақтау жүйесін дамыту жөніндегі 2023-2025 жылдарға арналған кешенді жоспарының аясында 186 іс-шараны жүзеге асыру көзделген. Биыл 8 нысанда күрделі жөндеу жұмыстарын жүргізу жоспарланған, оның бесеуінде жұмыстар аяқталды, екі нысан жөндеу сатысында. «Нұрлы жол» теміржол вокзалы ауданындағы патологоанатомиялық бюро мен емхана пайдалануға берілді.

Астана қаласының мәдениет саласын дамыту бойынша 59 бағытты жүзеге асыруды көздейтін кешенді жоспар да келесі үш жыл ішінде орындалады. Оның ішінде мәдениет саласы қызметкерлеріне арналған 200 пәтерлік тұрғын үй салу, 300 орындық үлкен зал және 150 орындық кіші залды қамтитын қуыршақ театрының ғимаратын салу, «Наз» театрының орнын орталыққа көшіру, бірқатар музейлер, театрлар, кешендер мен ескерткіштерге күрделі жөндеу жүргізу қарастырылған. Астананың кітапхана жүйесін жаңғырту жұмыстары жалғасып, мәдениет нысандары үшін арнайы автокөліктер мен жабдықтар сатып алынады. Сондай-ақ, кадрлық әлеуетті арттыруға бағытталған шаралар жүзеге асырылады. Барлық кешенді жоспарлардың әр тармағының орындалуына жауапкершілік қала әкімдігінің басқарма басшылары мен қалалық мәслихат депутаттарына жүктелген.

Биыл дәстүрлі түрде елордалық мәслихат депутаттары 50 білім грантын табыстады. Көп балалы және аз қамтылған отбасылардың балалары, «Жастар Рухы» белсенділері және жас спортшылар «Синергия» университетінде, «Astana International University» және «Туран-Астана» университеттерінде тегін білім алатын болады.

Ағымдағы жыл аймақтардағы әріптестермен ғана емес, алыс-жақын шетелдегі серіктестермен ынтымақтастық тұрғысынан да жемісті болды. Астана қалалық мәслихаты мен Санкт-Петербург Заң шығару жиналысы арасында ынтымақтастық туралы меморандумға қол қойылды. Мәскеу қалалық думасымен ынтымақтастық туралы меморандумға қол қою жоспарлануда, онда алдағы бес жылға арналған бірлескен іс-қимыл жоспары қарастырылған. Тәжірибе алмасу тұрғысынан Марокко Корольдігіне сапар нәтижелі өтті. Ертең депутаттар Эстония мен Финляндияға ресми сапармен барады.

Бұл жыл елдегі барлық мәслихаттар үшін мерейтойлық болды: осыдан 30 жыл бұрын алғашқы шақырылым депутаттары сайланған еді. Осыған орай, бірқатар іс-шаралар, соның ішінде ғылыми-тәжірибелік конференция, спорттық жарыстар, тақырыптық байқаулар және басқа да шаралар өткізілді. Республика күні қарсаңында елордалық мәслихаттың бірқатар депутаттары Мемлекет басшысы атынан жоғары мемлекеттік наградалармен марапатталды. «Құрмет» орденімен мәслихат депутаты Давид Лория және мәслихат аппаратының басшысы Бақыт Ахметжанова, «Ерен еңбегі үшін» медалімен депутаттар Салтанат Дженалаева және Жанаргүл Күлмағамбетова марапатталды. «Парасат» ордені әлеуметтік-мәдени даму мәселелері жөніндегі тұрақты комиссия төрағасы, мәслихат депутаты Асқар Смағұловқа берілді.