Рус
Нашар көретіндерге арналған нұсқа
Астана қаласының мәслихаты
ресми сайты
Хабарландырулар
Күнтізбе
Басты бет
Астана туралы
Қаланың өңірлік нышандары

Қаланың өңірлік нышандары

Қазақстан Республикасының
астанасы – Астана қаласының
өңірлік нышандарының
сипаттамасын және оны пайдалану
тәртібін бекіту туралы

«Қазақстан Республикасының астанасының мәртебесі туралы»  Қазақстан Республикасының Конституциялық заңының 3-бабына, «Қазақстан Республикасындағы жергілікті мемлекеттік басқару және өзін-өзі басқару туралы» Қазақстан Республикасы Заңының 6-бабы  1-тармағының 4-5) тармақшасына, «Құқықтық актілер туралы» Қазақстан Республикасы Заңының 27-бабына сәйкес, Астана қаласының мәслихаты ШЕШІМ ҚАБЫЛДАДЫ:

  1. Осы шешімдегі 1 қосымшаға сәйкес Қазақстан Республикасының астанасы – Астана қаласының өңірлік нышандарының сипаттамасы және оны пайдалану тәртібі бекітілсін.
  2. Осы шешімнің 2-қосымшасына сәйкес Астана қаласы мәслихатының кейбір шешімдерінің күші жойылды деп танылсын.
  3. Осы шешім алғашқы ресми жарияланған күнінен кейін күнтізбелік он күн өткен соң қолданысқа енгізіледі. 

Астана қаласы
 мәслихатының төрағасы
Т. Зейнұлқабден

Астана қаласы мәслихатының
2026 жылы « 14» тамыз
№_456/58- VIII  шешіміне
1-қосымша

Қазақстан Республикасының астанасы – Астана қаласы
өңірлік нышандарының сипаттамасы және оны пайдалану тәртібі 

1-тарау. Жалпы ережелер

  1. Қазақстан Республикасының астанасы – Астана қаласының өңірлік нышандарының сипаттамасы және оны пайдалану тәртібі «Қазақстан Республикасы астанасының мәртебесі туралы» Қазақстан Республикасының Заңына сәйкес әзірленді.
  2. Астана қаласының өңірлік нышандарына елтаңба мен ту жатады. Елтаңба мен тудың ресми бейнелері, сондай-ақ олардың құжаттарда, бланкілерде, баспа өнімдерінде, кәдесый және өзге де бұйымдарда бейнеленуі осы сипаттамаға сәйкес жүзеге асырылады.
  3. Қазақстан Республикасының астанасы – Астана қаласының елтаңбасы көгілдір түс аясында алтын түсті «Бәйтерек» пен «Шаңырақ» бейнеленген екі нышан орналасқан дөңгелекті білдіреді. «Бәйтерек» белгісі негізінде «Құсқанаты» оюы орналасқан, «Құсқанаты» оюы алтын түсті. «Шаңырақ» белгісі мен «Құсқанаты» оюының сыртқы жағы жасылмен көмкерілген. Сыртқы сақинаның көмкерілген жерінде сол және оң жақтарында қызыл аяда алтын түсті «Бөрікөз» оюы орналасқан. Елтаңбаның төменгі жағында алтын түстес аяда қызыл түсті «ASTANA» деген жазуы бар. «ASTANA» жазуының сол және оң жағында алтын түсті үш симметриялы сызықтар орналасқан.
  4. Қазақстан Республикасының астанасы – Астана қаласының туы ені мен ұзындығы 1:2 қатынастағы ортасында Астана қаласының елтаңбасы орналасқан тік бұрышты жайматөсемді білдіреді, одан жан жаққа алтын түстегі күн сәулелері шашылып тұрады. 

2-тарау. Қазақстан Республикасының астанасы – Астана қаласының елтаңбасын пайдалану тәртібі 

  1. Астана қаласының елтаңбасын дайындаған кезде осы Қазақстан Республикасының астанасы – Астана қаласы өңірлік нышандарының сипаттамасы және оны пайдалану тәртібіне қоса берілген 1-қосымшаға сәйкес бейнелеуі қамтамасыз етілуі тиіс.
  2. Астана қаласының елтаңбасын және басқа да елтаңбаларды бір уақытта орналастырған кезде Астана қаласының елтаңбасы басқа елтаңбалардан төмен емес және Қазақстан Республикасының Мемлекеттік Елтаңбасынан жоғары емес етіліп орнатылады, елтаңбалардың (елтаңбалық белгі, геральдиялық белгі) тақ санын бір уақытта орналастырған кезде Астана қаласының елтаңбасы ортасында орналасады, ал елтаңбалардың жұп сандарын орналастырған кезде, екеуден артық емес - орталықтың сол жағына орналасады.
  3. Астана қаласының елтаңбасын және басқа елтаңбаларды (елтаңбалық белгі, геральдиялық белгі) бір уақытта орналастырған кезде Астана қаласы елтаңбасының көлемі кіші болмауға тиіс.
  4. Астана қаласы елтаңбасының бейнелері жұмыс кабинеттерде, мәжіліс залдарында, мемлекеттік органдардың және басқа мекемелердің маңдайшаларында олардың иелерінің қалауы бойынша орнатылады (орналастырылады).
  5. Астана қаласының елтаңбасы мемлекеттік органдардың көлік құралдарында, сонымен қатар мемлекеттік органдардың, заңды және жеке тұлғалардың басқаруындағы қалалық қоғамдық көліктерде немесе арнайы қызметтер көліктерін ресімдеуде бейнеленуі мүмкін.
  6. Астана қаласының елтаңбасы қаланы көркемдік безендіруде пайдалануы мүмкін.
  7. Астана қаласының елтаңбасын заңды тұлғалар мен жеке кәсіпкерлер мөрлер мен мөртабандарын дайындау кезінде пайдалана алмайды. 

3-тарау. Қазақстан Республикасының астанасы – Астана қаласының туын пайдалану тәртібі 

  1. Астана туын шығару кезінде оның бейнесі 2-қосымшада айтылған Қазақстан Республикасының астанасы – Астана қаласы өңірлік нышандарының сипаттамасына және оларды пайдалану тәртібіне сәйкес келуі тиіс. Астана қаласының туын түрлі көлемдер мен түрлі материалдардан, сондай-ақ жалауша түрінде шығаруға жол беріледі.
  2. Тәртіп бұзыла дайындалған Астана қаласының туын мемлекеттік органдар ресми түрде, қаланы көркемдік ресімдеуде пайдалана алмайды, сондай-ақ Астана қаласының аумағында пайдаланылмайды.
  3. Астана қаласының туын және басқа туларды бір уақытта орналастырған кезде, Астана қаласының туы басқа тулардан төмен және Қазақстан Республикасының Мемлекеттік Туынан жоғары орналастырылмайды, ал жұп санмен орналастырған жағдайда тура ортаның (екіден аспайтын) сол жағында орналастырылады. Астана қаласының туы мен басқа туларды бір уақытта орналастырған кезде, Астана қаласының туы көлемі бойынша кіші болмайды және басқа тулардан төмен орналастырылмайды.
  4. Астана қаласының туы мемлекеттік және қалалық мереке күндері мемлекеттік органдардың және қаланың басқа да мекемелерінің ғимараттарында иелерінің қалауы бойынша ілінуі мүмкін.
  5. Астана қаласының туы мемлекеттік және қалалық мереке күндері ұйымдастыру-құқықтық нысанына қарамастан ұйымдардың ғимараттарында (ғимарат қасбеттерінде орналасқан тутұғырларда (мачталарда), тұрғын үйлерде ілінуі мүмкін.
  6. Астана қаласының туы Астана қаласының әкімдігі және мемлекеттік органдар, ұйымдастыру-құқықтық нысанына қарамастан ұйымдар және азаматтар өткізетін ресми рәсімдерді және басқа салтанатты іс-шараларды өткізу уақытында көтерілуі (орнатылуы) мүмкін.
  7. Қаралы күні тутұғырда (мачтада) көтерілген Астана қаласының туы тутұғырдың (мачтаның) биіктігінің жартысына дейін түсіріледі.
  8. Астана қаласының туы Астана қаласының құрметті атағына берілетін белгілерге және марапаттарға, елордамыздың мемлекеттік органдарында ерекше белгілерде бейнеленуі мүмкін.
  9. Астана қаласының туы (жалауша түрінде) Қазақстан Республикасының мемлекеттік мереке күндері қалалық жолаушыларды тасымалдау көлігінің сыртын ресімдеу үшін қолданылуы мүмкін.

Қазақстан Республикасының
астанасы – Астана қаласы
өңірлік нышандарының
сипаттамасы және
оны пайдалану тәртібіне
1-қосымша

Қазақстан Республикасының
астанасы – Астана қаласы
өңірлік нышандарының
сипаттамасы және
оны пайдалану тәртібіне
2-қосымша

Астана қаласы мәслихатының
« 14 » тамыз  2026 жылғы
№ 456/58- VIII  шешіміне
2-қосымша

Астана қаласы мәслихатының күші жойылды деп танылған шешімдерінің тізбесі 

1 2008 жылғы 5 маусымдағы № 109/16-IV «Қазақстан Республикасының астанасы – Нұр-Сұлтан қаласының рәміздері туралы»  Астана қаласы мәслихатының шешімі (Нормативтік құқықтық актілерді мемлекеттік тіркеу тізілімінде № 40562 болып тіркелген);

2) 2019 жылғы 3 мамырдағы № 382/49-VI «Қазақстан Республикасының астанасы – Астана қаласының рәміздері туралы» Астана қаласы мәслихатының 2008 жылғы 5 маусымдағы № 109/16-IV шешіміне өзгерістер енгізу туралы» Нұр-Сұлтан қаласы мәслихатының шешімі (Нормативтік құқықтық актілерді мемлекеттік тіркеу тізілімінде № 131192 болып тіркелген);

3) 2022 жылғы 18 қарашадағы № 266/34-VII «Мәслихаттың 2008 жылғы 5 маусымдағы № 109/16-IV «Қазақстан Республикасының астанасы – Нұр-Сұлтан қаласының рәміздері туралы» шешіміне өзгерістер енгізу туралы» Астана қаласы мәслихатының шешімі (Нормативтік құқықтық актілерді мемлекеттік тіркеу тізілімінде № 30662 болып тіркелген).

Кері қайту