Астаналық мәслихаттың кезекті сессиясы өтті

Мемлекет жүзеге асырып отырған қадамдар оң ықпал көрсетті және қаланың әлеуметтік-экономикалық дамуында біршама нәтижелерге қол жеткізуге мүмкіндік берді. Мысалы, қаланың негізгі капиталына инвестиция көлемі 2 жыл ішінде 41% артқан.

2014 жылмен салыстырғанда өткен жылы шикізаттық емес тауарлардың экспорты көлемінің өсімі 14% жеткен.

Сонымен қатар, шағын және орта бизнестің өнім шығару көлемі2 есе артты, бұл жан басына шаққанда аймақтар арасындағы ең жоғарғы көрсеткіш болып табылады және орташа республикалық деңгейден 4 есе артық. Бүгінгі таңда аталмыш секторда 288 мың адам жұмыс жасап отыр, бұл іс жүзінде астана халқының үштен бір бөлігін құрайды.

Сондай-ақ, Малика Бектурова 2011 жылы қаланың инвестициялар тарту және құрылыстағы озық технологияларды пайдалану арқылы, заманауи инфрақұрылым мен тиімділігі жоғары жоғары технологиялы және бәсекеге қабілетті  өндірістер құру арқылы үдемелі дамыту үшін «Астана – жаңа қала» арнайы экономикалық аймағы құрылғанын айтты.

- АЭА шеңберінде жасалған жағдай жаңа инвестициялық жобаларды жүзеге асыруға мүмкіндік берді. 2010-2014 жылдардағы индустрияландыру картасы шеңберінде Астанада инвестиция көлемі 167,8 млрд теңгені құрайтын 22 жоба жүзеге асырылған, 3 мың жұмыс орны ашылған. 2015 жылы Индустрияландыру картасы кәсіпорындары шығарған өнім көлемі 145 млрд теңгеден асты, өсім 2014 жылмен салыстырғанда 1,6 есе болды, бұл өңдеуші өнеркәсіптің жалпы көлемінің 51 % болған. 2015 жыл қорытындысы бойынша жобалар жүктемесі орта есеппен 85 % құрайды, - деп хабарлады баяндамашы.

Бұдан басқа, бүгінгі таңда отандық бизнесмендерді кәсіпкерлік қызметтің қыр-сырына оқыту жүйесі жолға қойылған. 5000 астам адам оқып, бизнесті жүргізу бойынша 12 мыңнан астам сервистік қызмет көрсетілген.

Сөзінің соңында қала әкімінің орынбасары 2016 жылғы мемлекеттік қолдау шараларын жүзеге асыру бойынша міндеттер мен шаралар жоспарына назар аударды. ЖІӨ кәсіпкерліктің жалпы қосылған құн үлесін осы деңгейінде сақтап, өнеркәсіптік өндіріс көлемін 10 % арттыру көзделген. Сонымен қатар, №1 Индустриалдық парк аумағында 10 жобаны іске қосып, 900 жаңа жұмыс орнын ашу керек.

Мәселені талқылауға мәслихат депутаттары Аман Аюпов, Алмаз Ким қатысып, отандық өндірісті қолдаудың тиімді шараларына қарамастан бірқатар шешімін таппаған мәселелер бар екенін айтқан. Бүгінгі таңда өнеркәсіптік кәсіпорындардың 90% астананың №1 Индустриалдық паркі аумағында орналасқан және оларда жылу мәселесі шиеленісіп тұр. Қалада көп қабатты тұрғын үйлердің бірінші қабаттарында орналасқан дәріханалар мен донерлер саны артып отыр, алайда, тауарды сақтау және көршілік талаптары сақталмайды.

Қала бюджетінің кірісті бөлігіне баса назар аудару керек, ол үшін индустриалды-инновациялық даму кәсіпорындары, шағын және орта кәсіпкерлік субъектілері салықтарын уақытылы төлеуі тиіс.

Отырыс барысында депутаттар астаналық ІІД Жергілікті полиция қызметінің басшысы Бахытжан Малыбаевтың өз басқарып отырған құрылымның қызметі туралы есебін тыңдады.

Баяндамашының сөзіне сәйкес ЖПҚ негізгі міндеттерін анықтауға қоғамның оның игілігін қамтамасыз ету бойынша, тұрақтылығы мен  тұрақты дамуын қамтамасыз ету бойынша неғұрлым маңызды мәселелер  ескерілген. Олардың қатарына құқық бұзушылықтың алдын алу, қоғамдық тәртіпті қорғау, жол қауіпсіздігін қамтамасыз ету, қылмыстың алдын алу және жасалуына жол бермеу және т.б. жатады.

Бүгінгі таңда ЖПҚ құрамына учаскелік инспекторлар бөлімшесі, ювеналдық полиция, жол-патруль қызметі, табиғат қорғау полициясы, әйел адамдарды зорлықтан қорғау бөлімі біріктірілген. Ағымдағы жылдағы 5 айдың қорытындысы бойынша жол-патруль қызметкерлері наряды ізін суытпай ашқан қылмыстар 29,9%, учаскелік инспекторлар 25% артқан. Сотпен келісу бойынша әкімшілік құқық бұзушылықтарды қарастыру бойынша көшпелі соттар өткізу тәжірибесі жалғасын табуда.

Қоғамдық тәртіптің сақталуы қадағалау  бойынша белсенді қызметті қоғамдық отрядтарға қатысатын қала тұрғындары да атқарып отыр. Бүгінгі таңда олардың саны мыңнан асады. Отрядтардың көмегімен барлығы 69 қылмыс және 915 әкімшілік құқық бұзушылық ашылған.

Талқылау барысында депутат Зауре Жусупова бүгінде астанадағы жергілікті полиция қызметінің жұмысы тиісті деңгейде жолға қойылғанын, дегенмен де шешімін таппаған мәселелер де бар екенін айтып кетті. Оның сөзіне сәйкес, балаларды оқыту мекемелерінің жанында орналасқан стихиялық тұрақтарды жою, мектептегі полиция инспекторларының жұмыстарына назар аудару бойынша жұмыстарды жолға қою керек. Сонымен қатар, қазіргі күні полиция қызметкерлері қажетті жұмыс жағдайларымен толықтай қамтамасыз етілмеген, оған депутаттардың ЖПҚ нысандарын аралауы барысында көз жеткізген.

Сонымен қатар, сессияда қаланың жергілікті өзін өзі басқару аумақтық кеңесін құру туралы шешім қабылданды. Астананың ішкі саясат басқармасының басшысы Ерлан Каналимовтың айтуынша, кеңестер тұрғын үй-коммуналдық шаруашылық қызметі, аумақтардың санитарлық жағдайы және қалалық мәслихат депутаттарының таңдауы бойынша бір немесе бірнеше сайлау округы шеңберіндегі құқық бұзушылықтың алдын алу бойынша кеңес беру-ақылдасу органы болып табылады.

Қала аумағында  6 аумақтық кеңес  құру жоспарланған, мұнда мәслихат депутаттары, қоғам қайраткерлері және басқа да құрметті және беделді адамдардан 7 мүшесі болады. «Алматы» ауданында 3 аумақтық кеңес құрылады, «Сарыарқа» ауданында – 2, «Есіл» ауданында – 1 кеңес құрылады. Аталған мәселені депутаттар бірауыздан қолдады.

Бұдан басқа, мәслихат сессиясында жергілікті бюджет пен инвестициялық жобалар арасында қаражатты қайта бөлу, мемлекеттік қажеттілік үшін жер телімдерін сатып алу келісім-шарттарын келісу, бірқатар ведомствоаралық комиссияға өзгерістер енгізу туралы шешімдер қабылданды. Халық қалаулылары азаматтардың жекелеген санаттарына әлеуметтік көмек көрсету, астананың су нысандарында жалпы су пайдалану, қала аумағында жануарларды ұстау бойынша мәслихат шешімдеріне бірнеше түзетулер енгізуді қолдады.

Мәслихаттың бекітілген жұмыс жоспарына сәйкес 2016 жылдың екінші жарты жылдығында кезекті сессияның қарастыруына «Астана қаласындағы автокөлік жолдарының жағдайы және дамыту мәселелері бойынша атқарушы органдардың жұмысы туралы» мәселе қойылған.

Мәслихат шешімімен 10 сайлау округінің депутаты Шибкенов Зейнулла Рахимович қалалық мәслихаттың кезекті сессиясының төрағасы болып тағайындалған.

Сессия жұмысына Астана әкімінің орынбасары Малика Бектурова, қалалық мәслихат хатшысы Жанат Нурпиисов, Парламент депутаттары Редкокашин Владимир Николаевич, Ахметов Сапар Кайратович, астаналық ведомстволар мен басқармалар, қоғамдық ұйымдар және бұқаралық ақпарат құралдары өкілдері қатысты.