Мәслихат депутаттары Астана қаласы әкімінің есебін тыңдады

Мәслихаттың кезектен тыс сессиясы келесі екі мәселеге арналды - елорданың учаскелік сайлау комиссияларының мүшелерін сайлау және «Астана қаласы әкімінің қаланың әлеуметтік-экономикалық дамуы жөніндегі есебін» тыңдау.

«Астана қаласы мәслихатының 2019 жылғы 15 қаңтардағы № 351/43-VI «Астана қаласының учаскелік сайлау комиссияларының мүшелерін сайлау туралы» шешіміне толықтыру енгізу туралы» бірінші мәселе бойынша уақытша комиссияның төрағасы Алтыншаш Табулдина сөз сөйледі, ол кезектен тыс сессияға қатысушыларды жаңадан құрылған учаскелік сайлау комиссияларының мүшелігіне сайлау процесінің қалай ұйымдастырылғаны, кандидаттардың комиссия құрамына қандай құжаттарды, қандай мерзімде ұсынғаны және осы жұмыстың қорытындылары туралы хабардар етті.

Елорданың әлеуметтік-экономикалық дамуы туралы есеппен қала әкімі Алтай Көлгінов сөз сөйледі. Іс-шара әкімдіктің үлкен залында ҚР Парламенті депутаттарының, Қоғамдық кеңес мүшелерінің, саяси партиялар мен қоғамдық ұйымдар, БАҚ өкілдерінің қатысуымен өтті.

Әкім ағымдағы кезеңнің динамикасын, халық санының өсуін және осыдан туындайтын салдарларды ескере отырып, жүйелі проблемалық мәселелерге тоқталды. Баяндауда өңдеуші өнеркәсіп және өндіріс көлемін ұлғайту мақсатында ЖБ тарапынан қолдау, экономиканың барлық секторларына құйылған инвестициялар, кәсіпорындар өндірген өнімдер, елордада енгізілген тұрғын үйлер туралы мәліметтер ұсынылды. Көлгінов тиісті инфрақұрылымды құру қажеттілігіне байланысты қазіргі уақытта жыл сайын 3 млн. шаршы метр тұрғын үй тапсыру қарқыны төмендегенін атап өтті. Жалпы, елорданың даму динамикасы оң.

Көлгінов барлық өзгерістердің басты мақсаты - қала тұрғындары үшін, және бірінші кезекте әлеуметтік нысандар үшін қолайлы жағдай жасау екенін атап өтті. Осыған байланысты «Астана – жайлы қала» жоспары қабылданды, аудандарды полицентризм қағидаты бойынша дамыту жоспарлануда, яғни ауданның өз мектептері, балабақшалары және т.б. болуы керек. Бұл қағида қазіргі уақытта іске асырылуда, ол жолдардың жүктемесін азайтуға ықпал етеді, өйткені әр ауданда өз мектептері, ауруханалары және әлеуметтік саланың басқа да объектілері болады.

Мемлекет басшысының ыңғайлы мектептер құру туралы тапсырмасы аясында 20 ірі мектеп жұмыс істейтін болады. Бас жоспарда мектеп салу үшін 72 жер телімі бөлінген. Жалпы, қаланың қажеттілігін қанағаттандыру үшін 162 мектеп қажет. Балабақшалар, емханалар құрылысы бюджет есебінен де, инвесторлар есебінен де жүргізілетін болады. ХӘОТ санаты мен бюджеттік сала қызметкерлері үшін тұрғын үй қолданыстағы бағдарламалар арқылы да, инвесторлардың көмегімен де қамтамасыз етіледі.

Үлескерлер мәселесі Мемлекет басшысының бақылауында, 2019 жылдың басында проблемалық 150 көппәтерлі тұрғын үй кешені (КТҮК), 16 мыңнан астам отбасы болған, бүгінгі күні 30 КТҮК, 2 мың отбасы қалды. Апатты, тозығы жеткен тұрғын үйлер бойынша мәселелер бар, статистика бойынша қалада 216 үй ресми түрде апатты болып танылған. Қала шетінде 16 тұрғын алабы орналасқан, оларда қазіргі уақытта жолдар жөнделуде, қоғамдық кеңістіктер, саябақтар, әлеуметтік нысандар абаттандырылған. Қаланың екі ауданында газдандыру бойынша магистральдық желілер салынды, қазіргі уақытта үйлерді газға қосу жүріп жатыр.

Жүйелі мәселелерді шешу үшін елорда мәслихаты көліктік схема тұжырымдамасын және жылумен жабдықтау тұжырымдамасын қабылдады.

Бірнеше жыл бойы дене шынықтыру мен спортты дамыту мәселелерімен айналысатын депутат Азамат Айтқожин қаладағы ең көне спорт ғимараты - Қ.Мұнайтпасов атындағы стадионның тағдырына қатысты сұрақ қойды. Ол аталған мәселе ұзақ уақыт бойы шешілмей келе жатқанын атап өтіп, осы спорт ғимаратына қатысты әкімдіктің қандай жоспарлары бар екенін және стадионды жаңғырту мәселелері қашан шешілетінін нақтылауды сұрады.

Мәслихат хатшысы Ерлан Каналимов халықтың, аумақтың едәуір ұлғаюына байланысты Есіл ауданының бөлінуі туралы біраз уақыт бойы айтылып жүрген мәселені көтерді.  Қаланың бесінші ауданын құруға қатысты әкімдіктің қандай жоспарлары бар?

Депутат Батыр Котырев қаланың бірегей сулы-батпақты жерлерін, атап айтқанда, Кіші Талдыкөл көлін сақтап қалу бойынша резонанстық мәселе қалай шешілетінін сұрады, елорданың биоалуантүрлілігін сақтау үшін әкімдік нақты қандай шаралар қолданады. Көл құрып бара жатыр, мәселе Талдыкөл көлінде ғана емес, қаланың барлық су ресурстарын кешенді зерттеу қажет. Бүкіл әлемде сулы-батпақты жерлерді қалпына келтіруге тырысуда, ал бізде оларды құрғатып жатыр. Қатынас ыдыстар заңы жұмыс істейді, жер асты суларының деңгейі төмендеуде. Әкімдік бұл мәселеге қатысты белсенділік танытуы керек, әрі қарайғы іс-әрекетті анықтау үшін қоғамдық тыңдаулар өткізу, ғылымды тартып, кешенді тексеру жүргізу, қорытындысы бойынша талдау жасау сияқты шаралар өткізу қажеттілігі бар шығар.

Көптеген азаматтар сұрап жүрген және бірнеше жыл бойы шешілмей келе жатқан теміржол ауруханасының ғимаратын жөндеуге қатысты мәселені Алтыншаш Табулдина көтерді. Ол ғимараттың 1959 жылы салынғанын және  кешенді күрделі жөндеуді қажет ететінін  атап өтті. Әкімдік бұл мәселені қалай шешуді жоспарлап отыр? Табулдинаның екінші сұрағы медицина қызметкерлеріне арналған жатақхана салуға қатысты болды және тек медицина қызметкерлері ғана емес, барлық әлеуметтік саланың қызметкерлері тұрғын үйге мұқтаж, оларды пәтер үлгісіндегі жатақханамен қамтамасыз ету мәселесін шешу қажет.

Кезектен тыс сессияның қарауына шығарылған мәселелер талқыланып, олар бойынша шешімдер қабылданды.