2022-2024 жылдарға арналған инвестициялық жобаларды іске асыру жоспарлары туралы ОЭКБ есебі

Қалалық мәслихатта Ерлан Каналимовтың төрағалығымен отын-энергетикалық кешен және коммуналдық шаруашылық басқармасының 2022-2024 жылдарға арналған инвестициялық жобаларды іске асыру жоспарлары туралы есебі өтті.

Отын-энергетикалық кешені және коммуналдық шаруашылық басқармасының басшысы Төлеген Құлұшев 105 инвестициялық жоба бойынша жоспарланған жұмыс туралы ақпарат берді.       

Құлұшев депутаттарға жылу-энергетика жүйесін дамыту шаралары туралы баяндады, жылумен жабдықтауға 24,4 млрд. теңге бөлінген, оның ішінде 2022 жылға - 21,3 млрд. теңге, соның ішінде ЖЭО-3 және ЖЭО-2 құрылысын аяқтау үшін қаражат бөлінді.

Сондай-ақ қолданыстағы магистральдық жылу желілерін қайта жаңарту жоспарлануда. «№7 монтаж басқармасы» ЖШС мердігерлік ұйымының күшімен жабық ҚС салу, ТП, ТҚС қайта жаңарту, перспективалы құрылыс ауданында жаңа ТП, ТҚС салу жоспарлануда.

Сумен жабдықтау, нөсерлік кәріз жүйесін дамыту үшін 1-ші көтермедегі сорғы станциясынан Железнодорожный тұрғын алабына дейінгі учаскедегі сорғы-сүзгі станциясына берілетін су таратқышты қайта құру жоспарлануда.

Сондай-ақ, Ә. Бөкейхан даңғылынан №38 көшеге дейін Керей Жәнібек хандар көшесі бойындағы КСС-нан кәріз коллекторларын салу жоспарлануда.

Отын-энергетикалық кешені және коммуналдық шаруашылық басқармасы сумен жабдықтау, су бұру және нөсерлік кәріз желілерінің құрылысын ерекше бақылауда ұстайды. Нөсер кәрізінің негізгі объектісін салу Ильинка тұрғын үй алабында көзделген. Сондай-ақ, Ильинкада 2022 жылы «Ильинка кентінің шығысына қарай орналасқан жеке меншік тұрғын үйлерге инженерлік желілер жүргізу. 3-ші кезек» жобасы бойынша жол салу жоспарлануда.

Газ тасымалдау жүйесін дамыту мақсатында республикалық және жергілікті бюджет қаражаты есебінен жоғары қысымды газ құбырының 2 кезегін (3-9 іске қосу кешендері) салу болжанып отыр. Одан әрі газ құбырының 3 кезегін (1-3 іске қосу кешені) салу жоспарлануда. Осылайша, қала шетіндегі 300 мың тұрғынды газдандыру жүзеге асырылады.

Депутат Асқар Смағұлов Интернациональный тұрғын үй алабындағы сорғы-сүзгі станциясының құрылысына қатысты мәселені көтерді, ағымдағы жылға арналған жоспарда соманың жартысы ғана көрсетілген, биыл нысан ең болмаса жартылай іске қосыла ма?

Депутат Гүлжамал Жапарова бұл мәселені бірнеше рет қозғағанын, Технопаркте су құбыры жүргізілгенін, магистральдық желіге жеткізу үшін Орлыкөл көшесінен Дүкенұлы көшесіне дейін 200 метр қалғанын, алайда бұл мәселе ұзақ уақыт бойы, 2019 жылдан бері шешілмей келе жатқанын атап өтті. Жапарова депутаттық сауал жолдап, ОЭК басқармасынан ағымдағы жылға қаражат салынды деген жауап алған.

Депутат ОЭК басқармасы басшылығымен, Астана Су Арнасымен бірлесіп мәселенің басын ашып, оны шешу бойынша шаралар қабылдау үшін мәселе туындаған орынды көріп қайтады деп шешілді.

Депутат Ғабит Сәтмағамбетов Қабанбай батыр даңғылындағы «Будапешт» ТК қатысты сұрақ қойды. G-Park компаниясы өз есебінен блокты модульді қазандық (БМҚ) орнатқан. Қазіргі уақытта сұйытылған газ қолданылады, оны компания сатып алады. Қазір газ арзандағанымен, үй тұрғындары үшін бұл айтарлықтай қымбат. Тұран даңғылы бойымен магистраль өтетіні белгілі, депутат газ құбырын сақиналау қашан жүргізілетінін сұрады. Тұрғындар қалалық тариф бойынша 37 теңге төлеуі үшін компания БМҚ-ны газ құбыры желісіне қосылғаннан кейін басқарма меншігіне беруге дайын.

Депутат Ғабит Тәжімұратов Пригородный тұрғын алабын газдандыру мерзіміне қатысты сұрақ қойды, газға қосу қай жылға жоспарланған. Ол әуежай «Ақтөбе Проект» ЖШС-мен шарт жасасуға ниетті екенін айтты. Ғ.Тәжімұратов әуежай үшін газ құбыры желісіне қосылу бойынша қандай да бір қиындықтар туындамай ма деген сұрақ қойды. Екінші мәселе көмірмен қамтамасыз етуге қатысты болды. Әуежай әкімшілігі Пригородный тұрғындарына отын бағасының көтерілуіне байланысты көмір сатып алуға көмек көрсеткен. Депутат ОЭК басқармасынан көмір бағасын бақылауды қамтамасыз етуді өтінді.

Депутат Бауыржан Жанқонақов ЖЭО-3 іске қосу мерзімі туралы мәселені көтерді. ЖЭО-3 станциясын ағымдағы жылы іске қосу туралы тапсырма берілгені баршаға мәлім. Ол құрылыстың қай кезеңде тұрғанын, шетелде, Украинада және Ресейде өндірілетін жабдықтар бойынша мәселе қалай шешілетінін сұрады.

Депутаттар Өндіріс тұрғын алабындағы және Агроқалашықтағы кәріз жүйесі мәселелері, осы мәселелерді шешу мерзімдері бойынша сұрақтар қойды.

Мәслихат хатшысы басқарманың жұмыс көлемі үлкен, барлығы 105 жоба екенін, ОЭК басқармасы жылумен жабдықтау, энергетика, сумен жабдықтау, кәріз, газдандыру, электр энергетикасы мәселелерін шешетінін атап өтті.

Ерлан Каналимов депутаттық сауалдар, кездесулер барысындағы шағымдар, азаматтардың өтініштері, 109 қызметіне жүгінулер негізінде ОЭК басқармасы құзыретіндегі мәселелерге қатысты тәуекелдер картасын жасауды ұсынды. Кейбір үйлер 5-10 жыл бойы бір көзден қоректенеді. Мұндай үйлер туралы ақпаратты АЭК ұсынуы керек еді.

Осылайша, мәслихат хатшысының ұсынысы - басқармалар мен ведомстволық ұйымдардың құзыретіндегі барлық проблемалық мәселелерді тәуекелдер картасына енгізу. 2022-2024 жылдарға арналған жобаларды республикалық бюджеттен қаржыландыру туралы жеке ақпарат дайындау - нысандар құрылысына салынған қаражат халықтың өмірін жақсартуға қалайша көмектеседі.