Ішкі істер органдары жүйесін жаңғырту аясында

Елордалық мәслихатта көпшілік тыңдаулар өтті. Күн тәртібі Нұр-Сұлтан қаласы Полиция департаментінің жергілікті полиция қызметінің жұмысына арналды.

Атқарылған жұмыстар туралы есеппен Нұр-Сұлтан қаласы Полиция департаментінің жергілікті полиция қызметі басқармасының бастығы Госман Жакин және аудандық полиция басқармалары бастықтарының бірінші орынбасарлары баяндама жасады.

Баяндамашы өткен жылы атқарылған жұмыстардың нәтижелерін жариялады, оң өзгерістерді атап өтті әрі алдағы кезеңге арналған жоспарларымен бөлісті.

Мәселен, 2019 жылы қала аумағындағы қылмыстардың санын 24-тен
18 мыңға (-23%) азайды. Жалпылай алғанда барлық санаттағы қылмыстардың ашылу көрсеткіштері жақсарды. 10 мың адамға шаққанда қылмыс деңгейі
27%-ке азайды (жоспарлы 230 болса, 234-тен 170-ке дейін).

Қоғамдық орындарда мас күйінде жасалатын заң бұзушылықтардың қысқара бастағаны да қуантарлық жәйт. Қалада бейнебақылау камераларын орнату тәжірибесі осыған оң ықпалын тигізді.

Госман Жакин Елбасы тапсырмасымен ішкі істер органдарының жүйесін жаңғырту аясында ауқымды жұмыстар басталғанын және олар үш жыл бойы жүйелі жүргізілетіндігін де атап өтті. Реформаның негізгі бағыты – қоғаммен өзара іс-қимылды жақсарту, полиция қызметінің ашықтығы мен айқындылығын қамтамасыз ету, қызмет көрсету моделіне көшу. 

Баяндамашы өз сөзінде «Халық үніне құлақ асатын мемлекет» тұжырымдамасын іске асыру аясында әлеуметтік желілерде белсенді жұмыстар ұйымдастырылғанын, тұрғындар үшін өзекті ақпараттар орналастырылатын ведомстволық сайттар және аккаунттар құрылғанын атап өтті.

Депутат Рәмзия Өмірбаева көпшілік тыңдаулар барысында полиция тарапынан көптеген жұмыстар атқарылып жатқандығын атап өтті. Қаладағы білім беру мекемелеріндегі орнатылған бейнебақылау камераларын полиция қарауына беру мерзімдеріне де тоқталды.

Дүниежүзілік денсаулық сақтау ұйымы (ДДСҰ)  жаһандық пандемия деп таныған коронавирустық індетке байланысты сұрақтар мен сақтық шаралары көтерілді.       

Мәселен, мәслихат депутаты Ақылбек Күрішбаев карантиннен жалтарып жүрген жауапсыз азаматтар бар болса, соларға қатысты полицияның қолданған шаралары туралы мәселені көтерді.

Мәслихат депутаты Зәуре Жүсіпова ұсынылған баяндамаға қатысты жалпы алдын ала талдау жасады. Ол «Жолдағы қабылдау» республикалық акциясының оң нәтижелерін ерекше атап өтті.

Сонымен қатар, полицияның әлеуметтік желілер арқылы халықпен белсенді жұмысы атап өтілді.

Депутат Мирас Шекенов полиция қызметкерлерін жолақы төлемейтін жолаушыларға немесе қарапайым тілмен айтқанда қоғамдық көліктерде билетсіз жүруді ұнататындарға айыппұл салу рәсіміне тартудың қаншалықты орынды екендігі туралы мәселені айтты. Халық қалаулысының айтуынша, автопарктерден контролер мен кондукторларға жолақы төлемейтін жолаушыларға айыппұл салу функциясын полицияның қатысуынсыз беру қажеттілігінің уақыты жетті. 

Депутат Рәмзия Өмірбаева полиция қызметкерлері расында да тәулік бойы жұмыс істейтіндігін және олардың көпшілігінің өз баспанасы жоқ екенін және елордалық полицияның 60%-н астамы баспана кезегінде тұрғанын мәлімдеді. Депутаттың айтуынша, олар жалдамалы тұрғын үй үшін өтемақы алатынына қарамастан, Қорғаныс министрлігінің үлгісіне сүйене отырып баспана мәселесін түбегейлі шешу қажет.

Ішкі істер органдары ардагерлері кеңесінің төрағасы Қаршыға Кішкентаев пен қала тұрғындары жергілікті полиция қызметіне үлкен жауапкершілік жүктелгенін, сондықтан оларға қолдау көрсету қажеттілігіне тоқталды. Дәлірек айтқанда, елорда полициясына елордалық коэффициентті қосымша төлеу керек, өйткені елорда полициясының жұмысы өңірлердегіге қарағанда 5-10 есе қиынырақ екендігі атап өтілді.

Депутаттар мен көпшілік тыңдауларға қатысушылардың ескертулері мен ұсыныстарын ескере отырып, көпшілік тыңдаулардың қорытындысы бойынша Нұр-Сұлтан қаласы мәслихатының тұрақты комиссияларының бірлескен отырысының қаулысы қабылданды.