Бюджет қаражатын тиімді пайдалану бойынша қабылданып жатқан шаралар мен жағдай туралы ЖАО есебі

Астана қалалық мәслихатында бюджет, экономика, өнеркәсіп және кәсіпкерлік мәселелері жөніндегі тұрақты комиссияның отырысы өтті. Жиынға комиссия төрағасы Кендебай Адамбек төрағалық етті.

Депутаттар «Мемлекеттік-жекешелік әріптестік жобаларын іске асыру кезінде бюджет қаражатын тиімді пайдалану бойынша қабылданып жатқан шаралар мен жағдай туралы жергілікті атқарушы органның есебін» тыңдады.

Есепті Астана қаласының Экономика және бюджеттік жоспарлау басқармасының басшысы Айжан Түгелбаева ұсынды. Ол бүгінгі таңда қала әкімдігі 14 мемлекеттік-жекешелік әріптестік (МЖӘ) шартын іске асырып жатқанын хабарлады. Биыл фото және бейнебақылау аппараттық-бағдарламалық кешенін жаңғырту және кеңейту жөніндегі жаңа МЖӘ шарты жасалған. Жоба бойынша мемлекет тарапынан міндеттемелер қабылданған. Айжан Түгелбаева білім беру, денсаулық сақтау, спорт, қоршаған ортаны қорғау, көлік және қоғамдық қауіпсіздік салаларындағы МЖӘ жобалары туралы ақпарат берді. Оның айтуынша, бұл жобаларды іске асыру жаңа институционалдық модельді енгізу есебінен бюджеттік тиімділікті қамтамасыз етеді, онда әкімдік тарапынан инвесторлардың капиталды шығындарын өтеу бойынша қаржылық міндеттемелер қарастырылмаған.

Цифрландыру және мемлекеттік қызметтер басқармасының басшысы Берік Ахметовтің айтуынша, «Көркемтелеком» ЖШС-мен келісімшарт мерзімі аяқталған. Осыған байланысты халықаралық Presight AI Limited компаниясын тарту жұмысы жүргізіліп, онымен 5 жылдық келісімшарт жасалды. Жобаның аясында қалада 10 мың бейнекамера орнату жоспарланып отыр, алдымен олар қаланың шеткері аудандарында орналастырылады. 2025 жылдың соңына дейін жасанды интеллектті қолдана отырып, қалалық инфрақұрылымды басқару үшін жаңа аппараттық-бағдарламалық кешенді енгізу көзделген. Бұл кешенге үлкен деректерді талдау платформасы, жол қозғалысы ережелерін бұзуды тіркеу құрылғылары және жағдайлық орталық құру кіреді. Жоба толығымен инвестор есебінен қаржыландырылады. Осылайша, МЖӘ аясында азаматтардың қауіпсіздігін қамтамасыз ету процесі әкімдік үшін арзанға түседі. Сонымен қатар, келісімшартқа мемлекеттік орган үшін преференциялар енгізілген.

Физикалық мәдениет және спорт басқармасының басшысы Василий Левит спорт саласында мүмкіндігі шектеулі жандар үшін Паралимпиадалық жаттығу орталығы мен «Тарлан» мұз аренасының жұмысын ұйымдастыруға бағытталған МЖӘ жобасы іске асырылып жатқанын айтты. Паралимпиадалық орталықта қазіргі таңда 23 спорттық секция жұмыс істейді, олар үшін заманауи құралдармен жабдықталған үш зал қарастырылған. Жоба 7 жылға есептелген, қазіргі кезде спортпен айналысқысы келетін адамдар саны 85%-ға артқан.

Комиссия төрағасы Кендебай Адамбек баяндамашыларға мәселелер туралы көбірек айту керек екенін ескертті. Депутаттар спорт нысандарын аралап, бірқатар түйткілді мәселелердің әлі шешілмегенін анықтағанын жеткізді.

Денсаулық сақтау басқармасының басшысы Әлия Рүстемова 2019 жылғы 15 наурызда нефрология бағыты бойынша эфферентті терапия және гемокоррекция орталығын ашу үшін ғимаратты жалға беру туралы келісімшарт жасалғанын хабарлады. Қазіргі уақытта орталықта 16 төсек-орын бар. Басшының айтуынша, жобаны іске асырудың экономикалық тиімділігі айтарлықтай. Келісімшарт мерзімі келесі жылы аяқталады.

Құрылыс басқармасының басшысы Төлеген Құлышев жатақхана салу жобасы туралы баяндады. Жер телімін бөлу мәселесі бұрын қиындық тудырғанымен, қазігі уақытта шешімін тапқан.

Білім беру басқармасы басшысының міндетін атқарушы Нариман Еламановтың айтуынша, қазіргі уақытта білім беру саласында 9 МЖӘ шарты жасалған. Олардың қатарында 360 орындық балабақша, 12 мың оқушыға арналған 6 жалпы білім беретін мектеп, студенттік жатақхана құрылысы және Гуманитарлық колледжді сенімгерлік басқаруға беру бар.

Инвестициялар және кәсіпкерлікті дамыту басқармасы басшысының орынбасары Мәқсат Жанабаев Индустриалдық парк №2 құрылысын қолға алу жобасы туралы айтты. Бұл жоба Индустриалдық парк №1-нің жүктемесінің жоғары болуына және бос жер телімдерінің тапшылығына байланысты басталған. 409,51 гектар аумақта кедендік рәсімдеу аймақтары, логистикалық қоймалар және көлік жолдарын қамтитын заманауи индустриялық инфрақұрылым құрылады. Бұл өңір экономикасының жедел өсуіне және шетелдік әрі отандық инвестицияларды тарту арқылы жаңа технологияларды енгізуге мүмкіндік береді.

Депутат Бауыржан Смаилов денсаулық сақтау басқармасына медициналық қалдықтарды жою мәселесі бойынша сұрақ қойды. Қалада қалдықтарды жоятын кәсіпорындар болғанына қарамастан, Көктал тұрғын алабында арнайы жабдықталмаған пештерде медициналық қалдықтар жағылып жатқаны анықталды. Бұл бүкіл шағын ауданды түтінге орайды. Егер басқарма тек мемлекеттік кәсіпорындармен жұмыс істесе, неге келісімшартқа арнайы пештің болуы туралы талапты енгізбеген.

Депутат Талғат Ерғалиев зарядтау құрылғыларына жоспарланған үлкен сома туралы сұрақ қойды. Оның айтуынша, қалада зарядтау құрылғылары жеткіліксіз. Сонымен қатар, жоба қаншалықты тиімді, бюджет қаражаты орынды жұмсала ма, қалада 30 станцияны іске қосуға жеткілікті қуат бар ма деген сұрақтар қойылды.

Кендебай Адамбек арзан автокөліктер сатып алынатынын, такси жүргізушілеріне арнайы киім қарастырылмағанын, көліктер сапасыз, қыста салқын әрі қуаты ұзаққа жетпейтінін айтты. Ол бұл мәселелерді бірлесіп шешу қажет екенін жеткізді.

Депутат Мәулен Самамбетов «Сергек» жобасына қатысты сұрақ қойып, шеткі аудандарға алдымен бейнекамералар орнатылса, ескі камералар алынып тастала ма, жоқ па деген мәселені көтерді. Сонымен қатар, колледж және ЖОО студенттерін бір жатақханаға орналастыру дұрыс емес екенін айтты. Оның пікірінше, бұл тиімсіз әрі қауіпті.

Комиссия төрағасы Кендебай Адамбек ішкі бейнебақылау камераларын орнату бойынша келісім бар екенін мәлімдеді.

Депутат Асқар Смағұлов такси қызметінің сапасына, жүргізушілердің жұмысқа деген көзқарасына қатысты көптеген шағымдар түскенін айтты. Арнайы қызмет жүргізушілер мен көліктердің жағдайын тексеруі тиіс. Кәсіпорынның көлік жуу орындарымен келісімшарттары жоқ, бүкіл қалада бар болғаны үш зарядтау құрылғысы бар. Депутат кәсіпорын бұл кемшіліктерді қалай жоюды жоспарлап отырғанын сұрады. Жоба іске асырылып жатқан 1,5 жыл ішінде мемлекеттік орган қатаң шаралар қабылдауы тиіс.

Депутат Қанат Ибраев жеке өмірге конституциялық құқықты қамтамасыз ету мәселесін көтеріп, компания ақпараттық қауіпсіздікке кепілдік бере ала ма деген сұрақ қойды.

Депутат Жанаргүл Күлмағамбетова депутаттар емханалар қаладағы орталыққа қосылмағанын анықтағанын айтты. Ол «Тарлан» мұз аренасы қызметкерлеріне қаражатты қайта бөлу арқылы көмек көрсетуді ұсынды. Алаңдағы қосалқы станцияны қала балансына беру мүмкіндігін қарастыру керек, өйткені негізгі энергияны Sensata тұрғын үй кешені тұтынады.

Комиссия төрағасы Кендебай Адамбек бұл ұсынысты қолдап, емханалар қауіпсіздік тұрғысынан әлсіз екенін атап өтті.

Мәслихат төрағасы Табиғат Зейнулғабден депутаттар көтерген барлық мәселелер комиссияның қаулысына енгізілетінін атап өтті. Оның пікірінше, жүріп-тұруы шектеулі азаматтарды қолдау қажет, олар үшін спортпен айналысу мүмкіндігі болуы тиіс. Индустриалдық парк №1-дегі утилизация мәселесіне байланысты ол аудандық әкімдіктерге қанша шам сатып алынғаны және қаншасы утилизцияланғаны туралы ақпарат дайындауды тапсырды.

Мәслихат төрағасы бір бөлмеге бес студентті орналастыру жөніндегі ұсынысты сынға алған әріптестерінің пікірін қолдады және бөлмелерді қайта жоспарлау арқылы әр бөлмеге екі-үш студенттен орналастыруды ұсынды.

Тұрақты комиссия төрағасы Кендебай Адамбек қатысушылардың назарын мемлекеттік-жекешелік әріптестік жобаларын іске асыру барысында қаржылық тәртіптің төмен деңгейіне аударды. Тексеру комиссиясы барлық кәсіпорындарда кемшіліктер бар екенін көрсететін есеп ұсынған. Сондай-ақ, оның айтуынша, жыл сайын МЖӘ жобаларының саны азайып келеді, жаңа жобалар жоқ. Бұл ретте, «Мемлекеттік-жекешелік әріптестік туралы» заң көптеген мәселелерді жергілікті бюджетке салмақ түсірмей шешуге мүмкіндік береді.