Жануарлар ауруларынан халықтың әл-ауқаты жағдайын қорғау туралы
11.09.2023
Азамат Айтхожиннің төрағалығымен қалалық мәслихатта «Жануарлар ауруларынан халықтың әл-ауқаты жағдайын қорғау туралы» мәселе бойынша заңдылық, құқық тәртібі және жұртшылықпен жұмыс мәселелері жөніндегі тұрақты комиссияның отырысы өтті.
Талқыланған мәселе бойынша бірінші болып қалалық орта сапасы және бақылау басқармасы басшысының орынбасары Ерік Қанафин сөз сөйледі, ол елорда аумағында 2668 бас ауыл шаруашылық жануарлары, оның ішінде ІҚМ – 300 бас, ұсақ мал – 1860 бас, жылқы – 503 бас, шошқа - 5 бас ұсталатынын баяндады. Есепке 402 бас жануар қойылған. Сондай-ақ, ол қауіпті аурулар ошақтарының анықталуы туралы ақпарат түспегенін айтты.
Қазақстан Республикасы Ауыл шаруашылығы министрлігінің Ветеринариялық бақылау және қадағалау комитеті аумақтық инспекциясының тағам және биологиялық қауіпсіздік бөлімінің басшысы Гүлнар Мұстафина депутаттарды бөлім мен «Республикалық ветеринариялық зертхана» филиалы жүргізіп жатқан жұмыстар туралы хабардар етті. Профилактикалық жұмыс шеңберінде мүдделі мемлекеттік органдармен ынтымақтастық туралы меморандумдар жасалған, 150 плакат шығарылып, сауда үйлеріндегі ет сатылатын орындарда орналастырылған. Жануарлар етінің әкелінуін бақылауды қамтамасыз ету үшін қалаға кіретін жерлердегі пункттерге «Республикалық ветеринариялық зертхана» филиалының қызметкерлері жіберілген.
Санитариялық-эпидемиологиялық бақылау департаментінің басшысы Сархат Бейсенованың айтуынша, республика бойынша ағымдағы жылдың 6 қыркүйегіндегі эпизоотиялық жағдай мынадай: сібір жарасына күдікпен 60 жағдай тіркелген, оның ішінде 31 жағдай расталды. Ауру үй жануарлары мен жабайы жануарлар, топырақ, ауа, жем, жануарларға күтім жасау заттары, жануарлардан алынатын өнімдер, жәндіктердің шағуы, мал қорымдары және т. б. инфекция қоздырғышының көзі болып табылады. Қазіргі уақытта аймақтарда жануарлардың бақылаусыз қоныс аударуы жиі кездеседі, бұл да инфекция қоздырғышы болуы мүмкін. Сондықтан, барлық мемлекеттік органдар аса қауіпті инфекцияның таралуын болдырмау үшін аурудың алдын алу мәселелері бойынша күш біріктіруі тиіс.
Мәслихат төрағасы Ерлан Каналимов ветеринариялық-санитариялық бақылауды жүзеге асыратын мемлекеттік органдардың қанағаттанарлықсыз жұмысына қатысты сын айтты. Ол бүгінгі отырыстың күн тәртібінде бір жарым миллион халқы бар мегаполистің қауіпсіздігін қамтамасыз етуге қатысты аса маңызды мәселе тұрғанын атап өтті. Бұқаралық ақпарат құралдарында Ақмола облысында мал ауруы анықталғаны туралы мәліметтер пайда болғаннан кейін, бұл қызметтер ақпараттық жұмыстарды жүргізуде ерекше жауапкершілік танытуы тиіс еді. Алайда, мәслихат төрағасы атап өткендей, қалада халықты хабардар ету тиісті деңгейде жүргізілмейді. Мысалы, қалаға кіру жолындағы өткізу бекеттері ешкіммен бақыланбайды, Астананың айналасында 64 шаруа қожалығы жұмыс істейді, олар осы уақытқа дейін ағымдағы жағдай мен мал сою кезіндегі сақтық шаралары туралы ескертілмеген. Елордадан алыс емес орналасқан елді мекендерде мал қорымдары бар және олардың жанында малдар жайылады. Елді мекендердегі мал қорымдары белгіленген карта бар ма, олар тиісті қоршаумен қамтамасыз етілген бе деген сұрақтар туындайды.
Қалыптасқан жағдайға байланысты депутаттар осы мәселелердің барлығын ҚР Парламенті Мәжілісі деңгейінде көтеруге мәжбүр болады. Келесі мәселе - жануарларды вакцинациялау көктемгі-күзгі кезеңде жүргізілуі керек, егер жануарлар саны салыстырмалы түрде аз елордада вакцинация аяқталмаса, аймақтардағы жағдай туралы не айтуға болады. Екі жыл бұрын отырыстардың бірінде депутаттар бұл мәселені қараған, базарларды, қабылдау пункттерін аралады және барлық жерде антисанитарияны байқаған. Сондықтан, шұғыл түрде қала тұрғындарының қауіпсіздігін қамтамасыз ету бойынша жүйелі шаралар жүргізу талап етіледі.
Тұрақты комиссияның төрағасы Азамат Айтхожин елорда базарларындағы зертханаларға қатысты сұрақ қойды, олар қандай мемлекеттік органға қарайды? Мұндай зертханаларда нақты не зерттеледі? Мәселе заңнамалық тұрғыдан пысықталмаған сияқты. Қауіпті ауруларды анықтамайтын зертханалар не үшін қажет. Депутаттың пікірінше, тәуелсіз зертханалар құру қажет. Айтхожин депутаттарға жануарлардың етін сатып алу жүргізілетін базарлар бойынша жақын арада рейдтер жүргізуді ұсынды.
Отырысты қорытындылай келе, комиссия төрағасы осы мәселені барлық мүдделі органдар мен ұйымдардың басшыларын шақыра отырып, ағымдағы жылдың қазан айында қайта қарауды ұсынды.