Мемлекеттік спорттық және шығармашылық тапсырысты іске асыру туралы

Қалалық мәслихатта Азамат Айтхожиннің төрағалығымен әлеуметтік-мәдени даму мәселелері жөніндегі тұрақты комиссияның отырысы өтті.

Отырыста «Нұр-Сұлтан қаласында мемлекеттік спорттық және шығармашылық тапсырысты іске асыру барысы туралы» мәселе қаралды.

Комиссия отырысының жұмысына қала әкімінің орынбасары Ерлан Бекмұрзаев, отырысқа шақырылғандар, қоғам және БАҚ өкілдері қатысты.

«Нұр-Сұлтан қаласының Мәдениет басқармасы» ММ бөлім басшысы Салтанат Мүксімова Мемлекет басшысының тапсырмасына сәйкес басқарма мемлекеттік шығармашылық тапсырыстың көлемін ұлғайтқанын және бүгінгі күні 29 мың ваучер іске қосылғанын хабарлады. Алайда, күту режиміндегі ваучерлер бойынша проблемалар туындауда. Жеткізушілер жобаны қаржыландыруға қатысты наразылықпен басқармаға жүгінді. Олар қолданыстағы ваучерлерге де, белсенді емес ваучерлерге де қаржы бөлуді талап етеді. Басқармада жеткізушілерге өтінімде тек белсендірілген ваучерлер көрсетілгені түсіндірілді. Порталға кіруде де проблемалар бар, басқарма тапсырыс беруші ретінде әрекет етеді, бірақ порталда балалар санын көре алмайды, өйткені, қолжетімділік жоқ. Басқарма тек іске қосылған ваучерлер бойынша ақпаратқа ие және шарт жасасуға мүмкіндігі жоқ, осы негізде мердігер басқармамен кері байланыс жасамай отыр, нәтижесінде осы уақытқа дейін басқарма балалардың есебін жүргізе алмай келеді.

Мәслихат хатшысы Ерлан Каналимов депутаттар бес мәселені жоғары деңгейде көтергенін, ҚР Президенті Әкімшілігіне, ҚР Мәдениет министрлігіне хат жолдағанын айтты. Каналимов барлық депутаттар Артспорт жобасын қолдайтынын, алайда платформада орналастырылған ақпарат қолжетімді болуы тиіс, балалардың есебі жүргізілуі тиіс, жаттықтырушыларға белгілі бір біліктілікке сәйкестікке талаптар қойылуы тиіс, сондай-ақ балалар айналысатын үй-жайлар санитариялық қағидалар мен қауіпсіздікке сәйкес болуы тиіс және ең бастысы - барлық ақпарат ашық болуы тиіс екенін атап өтті. Депутаттардың барлық ұстанымдарын жеткізушілер, Мәдениет министрлігі қабылдады, министрлік ресми жауап жіберді, онда барлық ескертулерді жою туралы жеткізушілерге тапсырма берілген. Ресми жауап алғаннан кейін екі ай өтті, енді қазір бюджетті нақтылау алдында платформамен тағы да проблемалар туындаса, депутаттар кінәлі болып қалады, себебі қаражат бөлінбеді, жоба қолдау таппады. Белсенді емес ваучерлерге бюджетте қаражат жетіспейді, қазіргі міндет жыл соңына дейін іске қосылған ваучерлердің жұмысы болып табылады. Депутаттарды мәселені шешуде қандай да бір нәтиже бар ма деген сұрақ мазалайды, дәл осы мақсатта отырыс өткізіліп отыр. Кеше депутаттар платформаның мемлекеттік деректер базасымен біріктірілгеніне көз жеткізді, баланың ЖСН-ін енгізгенде, егер бала мемлекеттік базада болмаса, ол платформада да көрінбейтінін анықтады. Әзірлеушілер платформаны тиісті күйге келтірудің нақты мерзімін атауы керек.

«Нұр-Сұлтан қаласының Дене шынықтыру және спорт басқармасы» ММ басшысы Самат Жылқыбаев спорт мектептеріне баратын балаларды есепке алу үшін БЖСМ бойынша цифрландыру жүргізіліп жатқанын, осыған орай спортпен қамтылмаған балалар ваучерлермен қамтамасыз етілетінін айтты. Жылқыбаев атап өткендей, жобаны жүзеге асыру күрделі өтіп жытыр, актілерге қашықтан қол қойылады. Қате ақпарат беретін жеткізушілер бойынша өтініштер бар. Осыған байланысты процестің ашықтықтығын қамтамасыз ету үшін, басқарма аудит жүргізуді сұраған. Әзірлеуші платформамен жұмыс істемейтінін айтып, отырысқа келмеді.

ҚР Мәдениет және спорт министрлігі Спорт және дене шынықтыру істері комитеті төрағасының орынбасары Бекболат Байжанов жобаны іске асыру бойынша жұмыс екі кезеңге бөлінгенін хабарлады. Бірінші кезеңде Заңның 40-бабына сәйкес балалармен жұмыс істейтін оқытушыларға, жаттықтырушыларға қойылатын талаптарды қатаңдату бөлігінде өзгерістер көзделген.

Отырыс төрағасы Азамат Айтхожин министрлік өкілінен министрліктің қалыптасқан жағдайдан шығу жөніндегі ұстанымын сұрады. Бастапқыдан есепке алу механизмі мен басқа да шарттарының дұрыс ойластырылмағанын айта кету керек. Портал жұмысы басынан бастап мінсіз болған жоқ, бөлінген қаражат барлық ниет білдірушілерге жетпеді, және мұның бәрі жалпы жобаның шалалығына байланысты болып отыр. Бұқаралық спортты дамытпай, елде кәсіби спортта табыстар болмайтыны бәріне мәлім.

Байжанов депутаттардың ұстанымын министрлік қолдайтынын, бүгінгі таңда жеткізушілермен, ата-аналармен бірге НҚА жетілдіру бойынша жұмыс тобы құрылғанын айтты. Ол бастапқы бұйрықтың шикі болғанын мойындады. Аталған жұмыс тобы 6 бағыт бойынша жұмыс істейді: қызмет көрсетушілер тарифтерді төмендетуі керек және негізгі қызмет бойынша не спортпен, не шығармашылықпен айналысуы керек; шектеу енгізу керек - бір бала, бір ваучер, өйткені, балалар қосымша спорт мектептері мен үйірмелерге қатысуы мүмкін; дене шынықтыру мұғалімдері де секциялық сабақтар өткізеді және сабақтан тыс іс-шаралар үшін қосымша ақы алады; үй-жайлардың санитариялық жағдайларына қойылатын талаптар жетілдірілуде; балалардың жасы бойынша саралау (жекпе-жек түрлері бойынша тек 10-12 жастан бастап мүмкін болады). Министрлікке бақылау-қадағалау функциялары берілмеген, сондықтан бұйрыққа өзгеріс енгізілді, мониторингті жеткізушілермен, ата-аналармен бірлесіп, оператор жүргізеді.

Мәслихат хатшысы ата-аналар мен пайдаланушылар көтеріп отырған үш проблемалық мәселе бар екенін айтты. Базамен интеграция жүргізілді, жаттықтырушыларға қойылатын талаптар бекітілді, бір балаға бір ваучер тармағы күшінде қала ма? Жастар саясаты басқармасының желісі бойынша аула клубтары, 3 оқушылар сарайы, білім басқармасының жанындағы 1 орталық жұмыс істейді. Бала екі секциядан артық қатыса алмайды, уақыты жетпейді. Мүмкіндігі шектеулі балалар санаты бар, оларды бірінші кезекте қамтамасыз ету қажет. Спорт түрлері бойынша қандай шешім болады, өйткені олар өте көп. Каналимов балалардың спорт секциялары мен үйірмелерге қатысуы бойынша толық көрініс алу үшін, барлық спорт мектептерінің, секциялардың, аула клубтарының және т.б. деректерін біріктіруді ұсынды. Осы ұйымдарда жоқ балалар ваучерлермен қамтамасыз етілетін болады.

Байжанов 4 министрлік ҰБДҚ және Артспорт дерекқорларын интеграциялау бойынша келісімге қол қойғанын айтты.

Мәслихат хатшысы цифрландыру басқармасынан осы мәселені шешу бойынша ұсыныстар енгізуді сұрады.

Айтхожин бір аптадан кейін әзірлеушілердің қатысуымен кеңес өткізуді ұсынды, олардың ұстанымын тыңдау керек, аудитке келетін болсақ, спорт басқармасының басшысы жиналыста тексеру қорытындысы бойынша жағдайды баяндауы қажет.

Депутат Владислав Сергеев депутаттардың жобаны іске асыруды қолдайтынын тағы бір рет айтып өтті, бірақ ваучерлерді қосымша қаржыландыру болмайтыны жөнінде мамыр айында айтылған, себебі зейнеткерлердің мүдделері де, денсаулық сақтау және білім беру салалары да ескерілуі керек. Екінші мәселе, қазір интеграциялық ШИНА құрылуда және қала есепке алу мәселесін өзі шешеді, әкімдік цифрландыру басқармасына тапсырма беруі керек. Жыл соңына қарай спорттық секцияларға баратын балалар белгілі болады, оларға ваучер берілмейді.

Қала әкімінің орынбасары Бекмұрзаев қала бюджетін қалыптастыру кезеңінде ваучерлерге деген қажеттілік қандай екенін білу қажет екенін, бөлінген қаражат жарты жылға ғана жеткенін атап өтті. Ал жаз мезгілінде жылыту маусымына дайындалу керек. Сондықтан цифрландыру басқармасы мәселені шешу үшін не істелгенін хабарлауы тиіс.

Мәслихат хатшысы білім басқармасына ЖСН бойынша елорда балаларына мониторинг жүргізуді ұсынды.

Отырыс төрағасы Айтхожин 23 тамызда платформаны жеткізушілер мен әзірлеушілерді шақырып, бірлескен отырыс өткізуді ұсынды.