Қалалық мәслихат депутаттары қоғамдық көліктерге мониторинг жүргізуде

2021 жылғы 1 қаңтар мен 30 сәуір аралығында iKomek орталығына қоғамдық көлік мәселелері бойынша 146739 өтініш келіп түсті, оның ішінде консультациялар - 134630, шағымдар – 10476, ұсыныстар - 1548, алғыс хаттар - 85.

Шағымдардың ең көп саны аралықты сақтамауға – 2829 (23,4%), балансты қайта толтыруға байланысты проблемалар – 2398 (19,8%), қоғамдық көлік қызметкеріне – 1408 (11,6%), жолаушыларды отырғызу/түсіру кезіндегі проблемалар – 868 (7,2%), 847 аялдаманы өтіп кету (7,0%), RTVM-терминалдың сапасыз жұмысы – 381 (3,1%), автобустың санитарлық және техникалық жағдайы – 266 (2,2%), ауа баптағыш жұмысы – 220 (1,8%), ақпараттық табло жұмысы – 145 (1,2%), жылдамдық режимін сақтамау – 102 (0,8%), қозғалыс схемасын өзгерту – 99 (0,8%) және т.б. қатысты болды.

Мүмкіндігі шектеулі топтардан сол кезеңде 76 өтініш түсті, оның ішінде шағымдар – 56, ұсыныстар – 19, алғыс – 1.

«Қоғамдық көлік мәселелері бойынша халықтың жүріп-тұруы шектеулі топтарының шағымдары негізінен мүгедектер арбасына таңылған жолаушылар тұрған аялдамадан тоқтамай өтіп кету, жүргізушілердің мүгедектерге дөрекі қарым-қатынасы сияқты проблемаларға қатысты болды. Кейбір автобустарда мүгедектер арбасына арналған орын қарастырылмаған, аялдама ақпаратшысы жұмыс істемейді, соңғы аялдамаға дейін бармайды, автобуста мүгедектерге арналған жол қарастырылмаған және басқа да мәселелер бар. Осы жағдайлардың барлығын біз тексереміз деп шештік. Өкінішке орай, көптеген шағымдар расталды», - деді елордалық мәслихаттың хатшысы Ерлан Каналимов.

Рейд өткізу кезінде депутаттар халықтың мүмкіндігі шектеулі топтарын қауіпсіз тасымалдау үшін көлік пен автобус жүргізушілерінің дайындық деңгейі өте төмен екеніне көз жеткізді. Қоғамдық көлікке қауіпсіз кіруді қамтамасыз етпейтін аялдамаларға кірме жолдардың қанағаттанарлықсыз жай-күйі мүгедектер үшін елеулі кедергі болып табылады.

Барлық депутаттар мүгедектердің қоғамдық ұйымдары өкілдерімен бірлесіп, қоғамдық көлік мониторингіне қатысты.

Тексеру қорытындысы бойынша қоғамдық көлік саласындағы уәкілетті органның есебін тыңдаумен қалалық мәслихаттың отырысы өтеді, оның нәтижелері бойынша елорданың атқарушы органдарының атына тиісті тапсырмалармен бейінді комиссияның қаулысы қабылданатын болады.