Мәслихаттың кезектен тыс сессиясы

Қалалық мәслихаттың кезектен тыс сессиясы Гүлнар Данбаеваның төрағалығымен «Zооm» бейнеконференцбайланыс платформасында өтті.

Депутаттар елорданың экономикалық және әлеуметтік өмірінің өзекті мәселелерін шешуге арналған көптеген мәселелерді талқылады.

«Нұр-Сұлтан қаласының Экономика және бюджеттік жоспарлау басқармасы» ММ басшысы Қайсар Маңқараев Астана қаласы мәслихатының 2015 жылғы 11 желтоқсандағы № 427/61-V «2016-20202 жылдарға арналған Астана қаласын дамытудың бағдарламасы туралы» шешіміне өзгерістер енгізу туралы баяндама жасады.

Қ.З. Маңқараев депутаттарға 2016-2020 жылдарға арналған Астана қаласының даму бағдарламасына енгізілген барлық өзгерістер мен толықтырулардың негіздемесін ұсынды. 

Экономика және бюджеттік жоспарлау басқармасының басшысы COVID-19 байланысты дағдарыстық жағдайды және әлемдегі тұрақсыз экономикалық жағдайды ескере отырып, бағдарламаға өзгерістер мен толықтырулар енгізілгенін айтты. Бағдарламада барлығы 55 индикатор бар, 25 индикаторға өзгертулер енгізілді. Тұрақты комиссияның алдын ала отырысы барысында айтылған депутаттардың ұсыныстары мен ескертулері ескерілді.

«Қазақстан Республикасы Премьер-Министрінің (2019 жылғы 5 наурыздағы № 8) тапсырмасына сәйкес, сондай-ақ Қазақстан Республикасы ИИДМ Министрінің бұйрығымен (2019 жылғы 30 мамырдағы № 336, 2019 жылғы 6 желтоқсандағы № 909) жергілікті қамту үлесі бойынша 2019-2021 жылдарға арналған мақсатты индикаторлар белгіленген», – деді Қайсар Манқараев.

Мәселені талқылау кезінде депутат Аман Аюпов «жергілікті қамту үлесі» индикаторы «жұмыс орындарын құру» индикаторына тікелей әсер ететіндігін айтты.

А.Б. Аюпов: «Біз конкурста жеңгеннен бастап барлық кезеңдерде бақылау қажет. Мен мысал келтірейін, қазір «Жастар» сарайын реконструкциялау жүріп жатыр, Ресейден екі қабатты терезелер қолданылады, дегенмен екі қабатты терезе шығаратын бірқатар кәсіпорындар Қазақстанда және елорданың өзінде де жұмыс істейді. Бұл туралы комиссиялардың отырыстары мен мәслихат сессияларында талқыланды. Барлық кезеңдерде конкурста жеңген компания жергілікті өнімді қолданатындай етіп бақылауды ұйымдастыру қажет», – деп атап өтті.

Елорда әкімі міндетін атқарушы Ермек Кизатов осындай проблема бар екенін растады.

«Кеше Мемлекет басшысының қатысуымен «Атамекен »Ұлттық кәсіпкерлер палатасының съезі өтті. Бұл сұрақтар сол жерде көтерілді. Енді біз жоба кезеңінде жергілікті қамтудың 80% дейін пайдаланылатындай етіп тапсырма береміз», – деді Е.А. Кизатов.

Депутат Зейнолла Шибкенов те әріптесін қолдап, Үкімет деңгейінде шаралар қабылданып әрі тиісті қаулы қабылданбайынша және «Мемлекеттік сатып алу туралы» Қазақстан Республикасының Заңына өзгерістер енгізілмейінше, жағдай жақсы жаққа өзгермейтінін айтты.

«Нұр-Сұлтан қаласының Тұрғын үй және тұрғын үй инспекциясы басқармасы» ММ басшысы А.Е. Есенбаев екі мәселе бойынша: жер учаскелерін немесе өзге жылжымайтын мүлікті мемлекет мұқтажы үшін иеліктен шығаруға байланысты шарттардың жобаларын келісу туралы және тұрғын үйлер мен құрылыстарды авариялық деп тану жөніндегі ведомствоаралық комиссияның құрамы туралы баяндама жасады.

Асылбек Есенбаев тұрақты комиссияның қарауына әлеуметтік нысандардың құрылысы үшін алынған 71 жер учаскелерін иеліктен шығару туралы шарттар тізбесін ұсынды, олар: 600-800 орындық көпсалалы аурухана; Тұран даңғылы мен №24 көшесінің қиылысы және Қарасай батыр мен Бұланты көшелерінің қиылысы ауданындағы мектеп; Тәуелсіздік даңғылы мен А. Тоқпанов көшелерінің ауданындағы А2 және Южная 2 (жобалық атауы) көшелерін салу; Керей, Жәнібек хандар көшесіндегі Қан орталығының медициналық зертханасы аумағын кеңейту және басқа да нысандар салу үшін алынған жер учаскелері.

Тұрғын үй және тұрғын үй инспекциясы басқармасының басшысы депутаттарды барлық меншік иелері шартта көрсетілген сомамен таныс деп сендірді.

Бұдан әрі депутаттар кадрлық өзгерістерге байланысты тұрғын үйлер мен құрылыстарды авариялық деп тану жөніндегі ведомствоаралық комиссияның жаңа құрамын бекітті.

Күн тәртібіндегі мәселелер қаралып, олар бойынша тиісті шешімдер қабылданды.