Нұр-Сұлтан қаласы мәслихатының Нұр-Сұлтан қаласының сайлау комиссияларының құрамдарына өзгерістер мен толықтырулар енгізу туралы хабарламасы
02.03.2020
«Қазақстан Республикасындағы сайлау туралы» Қазақстан Республикасы Конституциялық заңының (бұдан әрі – Сайлау туралы Конституциялық заң) 10-бабына сәйкес, Нұр-Сұлтан қаласының мәслихаты (әрі қарай -Мәслихат) 179 сайлау комиссияларының құрамдарындағы бос орындар туралы, сондай-ақ 18 жаңадан құрылған учаскелік сайлау комиссияларының сайлау комиссияларының құрамдарын қалыптастыру туралы хабарлайды.
Мәслихат сайлау комиссияларының өкілеттік мерзімі ішінде олардың құрамдарына өзгерістер енгізуге құқылы.
Учаскелік сайлау комиссияларының сандық құрамын сайлау учаскелеріндегі сайлаушылар санына байланысты қаланың аумақтық сайлау комиссиясы анықтайды.
Әрбір саяси партия тиiстi сайлау комиссиясының құрамына бiр кандидатура ұсынуға құқылы.
Саяси партия сайлау комиссиясының құрамына осы саяси партияның мүшелерi болып табылмайтын кандидатураларды ұсынуға құқылы.
Саяси партиялардың ұсыныстары болмаған жағдайда, мәслихаттар сайлау комиссиясын өзге қоғамдық бiрлестiктердiң және жоғары тұрған сайлау комиссияларының ұсынысы бойынша сайлайды.
Саяси партиялар, өзге де қоғамдық бірлестіктер, олардың құрылымдық бөлімшелері және қалыптастырушыларға қатысты одан жоғары тұрғандар, сайлау комиссиялары 2020 жылдың 3-ші наурызынан 24-ші наурызына дейін мәслихатқа келесі құжаттарды ұсынады:
1) белгіленген нысанда электрондық түрде және қағаз форматта сайлау комиссияларының құрамдарына кандидаттар туралы мәліметтер;
2) тиісті сайлау комиссияларының құрамдарына кандидаттар ұсыну туралы саяси партияның, қоғамдық бірлестіктің немесе олардың филиалдарының (өкілдіктерінің) шешімінен үзінді көшірме;
3) саяси партияны, қоғамдық бірлестікті немесе олардың филиалдарын (өкілдіктерін) тіркеу туралы құжаттың көшірмесін;
4) кандидаттардың белгіленген тәртіппен сайлау комиссиясының жұмысына қатысуға келісім беру туралы өтініштері.
Сайлау комиссияларының құрамдарына кандидаттар туралы ақпараттың нысандары, кандидаттардың сайлау комиссияларының жұмысына қатысуға келісім беру туралы өтініштері мәслихаттың maslihat01.kz сайтында орналастырылған.
Сайлау комиссияларының құрамдарына ұсынылған адам Сайлау туралы Конституциялық заңның талаптарына сай келуге тиiс.
Сайлау комиссиясының мүшесі осы комиссияның құрамын қалыптастырған мәслихат орналасқан әкімшілік-аумақтық бірлік аумағында тұруы керек.
Сайлау туралы Конституциялық заңның 23-бабының 3-тармағында көзделген сайлау учаскелерін құру жағдайларын қоспағанда, сайлау комиссиясы құрамының жартысынан көбі бір ұйымның қызметкері болмауға тиіс.
Сайлау комиссияларының құрамына жақын туыстары (ата-аналары, балалары, бала асырап алушылары, асырап алынған балалары, ата-анасы бір және ата-анасы бөлек аға-інілері мен апа-сіңлілері (қарындастары), аталары, әжелері, немерелері) немесе жұбайы (зайыбы) кіре алмайды.
Мәслихатқа қағаз форматта ұсынылған барлық құжаттар қол қойылған, мөр басылған және орындалған күні, орындаушының аты-жөні, инициалдары мен оның телефон нөмірі көрсетілген болуы керек.
Сайлау комиссияларының құрамдары бойынша ұсыныстарды қабылдау 2020 жылдың 24 наурызына дейін, дүйсенбіден жұмаға дейін, сағат 08:30-дан 18:00-ге дейін жүзеге асырылады, үзіліс 13:00-ден 14:30-ға дейін.
Нұр-Сұлтан қаласы
мәслихат хатшысының м.а. М. Шайдаров
Мәслихаттың орналасқан жері: Нұр-Сұлтан қаласы, Бейбітшілік көшесі, 11.
Жауапты тұлға – Бейсикенов Дидар Мұратұлы, № 212 каб., қалааралық телефон коды (87172), қызмет нөмірі - 556635, электрондық пошта мекенжайы: maslihat_org@mail.ru