Елордада өткен республикалық конференцияда мәслихаттардың міндеттері талқыланды
06.12.2019
Нұр-Сұлтанда Қазақстан мәслихаттарының құрылуына 25 жыл толуына арналған «Жергілікті өзін-өзі басқару жүйесіндегі, өңірлердің әлеуметтік-экономикалық дамуындағы және қоғамдық сенімді нығайтудағы мәслихаттардың рөлі» атты республикалық конференция өтті.
Республикалық конференция барысында мәслихаттардың алдағы жылдардағы негізгі міндеттері мен жұмыс бағыттары туралы ҚР Парламенті Сенатының төрайымы Дариға Назарбаева баяндады.
Басымдықтар қатарында ол халықпен кері байланысты қамтамасыз етуді ерекше атап өтті.
«Жергілікті өзін-өзі басқару жергілікті мәселелерді шешуге қоғамды белсенді тартуды көздейді. Көптеген азаматтар қоғамдық мәселелерге араласып, көмек көрсетуге бастама көтеруде. Бұл мәслихаттардың қызметі барынша қоғамдық және ашық болуы тиіс дегенді білдіреді. Барлық түйткілді мәселелерді халықпен ашық түрде талқылап, азаматтармен бірге олардың шешілуіне қол жеткізу керек. Бұл ретте заманауи коммуникациялық технологиялар үлкен мүмкіндіктер туғызады», - деді Сенат төрайымы.
Конференцияға Нұр-Сұлтан қаласының мәслихат депутаттары да қатысты.