Нұр-Сұлтан қаласында «Jas sarbaz – Jastar jylynda» жобасының салтанытты жабылуы өтті

Асу алар «Жас сарбаз»!

Қазан айының басында «Jas sarbaz – Jastar jylynda» жобасының ашылу салтанатында қалалық мәслихаттың депутаты Мұхтар Есенжанұлы Төлеутаев жастарға патриоттық тәрбие берудің маңыздылығын және еліміздің жарқын болашағы тікелей оларға байланысты екенін атап өткен болатын. Бір айға созылған жобаның бұл күндері қорытындысы шығарылды. Қазақстан Республикасы Қорғаныс министрлігінің Ұлттық әскери-патриоттық орталығында "Jas sarbaz – Jastar jylynda" жобасының салтанатты жабылуы өтті. Іс-шара аясында күзгі әскери-қолданбалы спорт түрлері мен әскери-патриоттық әндер конкусы жеңімпаздары және қозғалыс белсенділері марапатталды.

«Jas sarbaz – Jastar jylynda» кешенді жобасы аясында №68665 әскери бөлімшесінде 3 күндік күзгі әскери-патриоттық ойындары, мектептер мен лицейлерде жеңіл атлетикадан марафон жарысы, футбол және волейбол сайыстары өткізілді. Ал аумақтық соғыс ардагерлерімен кездесу ісшаралары ұйымдастырылып, онда оқушылар еліміздің қазіргі заман тарихының қызықты мәліметтеріне қанықты. Жобаның жабылу салтанаты әскери-патриоттық әндер конкурсымен аяқталды. Жарыс жеңімпаздарынан басқа қазылар алқасы жас патриоттар арасынан үздік тәрбиеленушілерді де марапаттады.

Аталған ісшараға Қазақстан Республикасының Қорғаныс министрлігінің өкілдері, Нұр-Сұлтан қ. Қорғаныс істері департаменті басшылығы, Нұр-Сұлтан қаласы «Қоғамдық даму істері басқармасы» мемлекеттік мекемесінің басшысы Талғат Рахманберді, Мәжіліс депутаты Геннадий Шиповских, «Астана Жастары» ресурстық орталығының басшысы Шынғыс Тлеулин,  «Жас сарбаз» жасөспірімдер әскери-патриоттық қозғалысы Нұр-Сұлтан қалалық филиалының төрағасы – Асхат Налшыбек қатысты.

«Алдымен жастарды бүгінгі айтулы күнмен құттықтаймын. Елорданың дамуында тек билік өкілдері ғана емес жастардың да атқаратын рөлі зор. Осы жылы астаналық жастарға арналған және жалпы Жастар жылына арналған 600-ден астам шара өткізу жоспарлануда. Бас қалада 6 мыңға жуық жас сарбаз бар, олардың бәрі еліміздің болашағы. Жастарды қолдау басқармасын басқарғандықтан сіздермен тікелей жұмыс істеуге және жастардың бастамасын қолдауға дайынбыз», - деді қалалық Қоғамдық даму істері басқармасының басшысы Талғат Рахманберді.

«Жас сарбаздар» дайындық пен патриотизмнің, жеңіске деген жігердің жоғары дәрежесін көрсетті. Күзгі әскери-патриоттық жарыстардағы тәрбиеленушілердің көрсеткен үздік нәтижелерін айта кетуіміз қажет. Бүгін біз жас патриоттарымызды марапаттай отырып, олар еліміздің болашағын көркейтуге өз үлестерін қосады деп сенеміз», - деді Нұр-Сұлтан қаласы Қорғаныс істері жөніндегі департаментінің бастығының орынбасары – тәрбие, идеологиялық және әскери-патриоттық жұмыстар басқармасының бастығы капитан Жүсіпов Ерболат Мүбаракұлы.