Қалалық мәслихаттың бюджет, экономика, өнеркәсіп және кәсіпкерлік мәселелері бойынша тұрақты комиссиясының отырысы болып өтті.
14.07.2016
Жиналыс барысында энергетика саласындағы инвестициялық жобаларды жүзеге асыруға бөлінген бюджет қаражатын тиімді пайдалану шаралары туралы депутаттарға Астана қаласы энергетика басқармасының басшысының м.а. Бактыбек Жапаев баяндады.
Баяндамашының сөзіне сәйкес, басқарма 54 бюджеттік инвестициялық жобаны жүзеге асырып отыр.
Бюджеттен бөлінген қаражат жылу энергетикалық жүйелерді дамытуға жұмсалады.
- Қаланы жылу және энергиямен қамту тиімділігін арттыру мақсатында Басқарма ЖЭО-1, ЖЭО-2 қолданыстағы энергия көздерін жаңарту мен жаңа ЖЭО-3 құрылысын салу бойынша жобаларды жүзеге асырып отыр, - деп түсіндірді Б.Жапаев.
ЖЭО-2 кеңейту және қайта құру ЭКСПО нысандарын, жаңа вокзалды, көп қызметті «Абу Даби Плаза» кешенін және басқа да көптеген әлеуметтік маңызы бар нысандарды жылумен қамтуға мүмкіндік береді.
Бюджет қаражаты қолданыстағы магистральдік жылу желілерін қайта құруға, жылу жолы құрылысын салуды жалғастыруға және бірқатар әлеуметтік нысандарды орталықтандырылған жылумен қамтуға ауыстыруға жұмсалады.
Басқарма қолданыстағы және жаңа трансформатор подстанцияларын, шоғырсымды және ауа электр беру желілерін және т.б. салу мен қайта жаңарту бойынша жобаларды да жүргізіп отыр.
Талқылау барысында депутаттар Көкталдағы жағдайды айтып өтті, мұнда жеке меншік сектордың пешпен жылыту қалдықтары ауаны біршама ластап отыр. Осыған байланысты халық қалаулылары осы үйлерді орталық жылумен қамтуға қосуға қызығушылық танытты. Баяндамашы 5-ші ЖЭО-3 іске қосылғаннан кейін 2017-2018 жылғы жылыту маусымына қарай осы аудан қамтылатынын, дегенмен орталықтандырылған жылумен қамту тек әлеуметтік маңызы бар нысандарды ғана қамтитынын, ал тізімге жеке меншік сектор енбейтінін айтты.
Отырыс жұмысына астаналық мәслихат хатшысы Жанат Нурпиисов, қалалық басқармалар, қоғамдық ұйымдар мен бұқаралық ақпарат құралдарының өкілдері қатысты.