Астананың Қоғамдық кеңесі өткізген қоғамдық тыңдалымның басты тақырыбы қаладағы көлік инфрақұрылымының жағдайы мен дамуы болды.
27.07.2016
Атқарушы органдар астананың көлік кешенін дамыту бойынша қолға алған шаралар туралы баяндаманы Астана қаласы әкімінің бірінші орынбасары Хорошун Сергей Михайлович жасады. Баяндамадан байқап отырғанымыздай, бүгінгі таңда көлік құралдарының саны жыл сайын артып келеді. Астанада 340 мыңнан астам көлік құралдары тіркелген. Typsa, PriceWaterhouseCoopers, Systra, UITP халықаралық кеңесшілерін қатыстыру арқылы көлік кешеніне көлік жүйесі мен инфрақұрылымының дамуы, жол-көше желісіне жүктеменің төмендеуі, көліктің балама түрлерін дамыту бағыттары бойынша талдау жасалған. Аталған міндеттердің шешімін табу үшін астананың көлік кешенін дамыту бағдарламасы әзірленіп отыр. Қоғамдық көліктердің халыққа қызмет көрсету сапасын жақсарту үшін маршруттық желіні кешенді жаңарту, жылжымалы составты жаңарту, «Buslane» бөлінген жолақтары бағдарламасын жүзеге асыру, ASTRABus сервистерін дамыту, электронды төлем жүйесін енгізу, аялдама кешендерін және көлік орталықтарын дамыту қолға алынған.
Астананың көлік кешенінің жұмысын жетілдіру және жақсарту мақсатында қандай шаралар қолданылатыны жөнінде Астана жолаушылар көлігі басқармасының басшысы Едиль Сулейменов сөз сөйлеген.
Оның сөзіне сүйенсек, «Astra Plat» қоғамдық көлікте жолақысын электронды төлеу жобасының алғашқы кезеңі осы аптада іске қосылады. Бастапқыда «Astra card» арнайы карталары арқылы жол ақысын экспресс-маршруттар жолаушылар төлей алады. Бұл жағдайда баға әртараптандырылады және әрбір 15 шақырым сайын артып отырады.
Жобаны әзірлеушілер жолаушылар үшін арнайы тарифтер қарастырған. Мысалы, жол ақысын бір рет төлеп, бір сағат бойы қала ішінде бірнеше рет көліктерге ауысып отыру арқылы жүруге болады.
Баяндамашы айтып кеткендей, мұндай шаралар қоғамдық көліктегі жолаушылар ағынын арттырып, қала жолдарына жүктемені азайтады.
Астана жолдарының жүктемесінде сырттан келетін көліктердің рөлі зор. Қарбалас сағаты күннің бірінші жартысында байқалады. Осыған байланысты қалаға ақылы кіруді енгізу жоспарланып отыр. «Астана LRT» ЖШС басқарма төрағасы Талгат Ардан айтып өткен деректерге сәйкес астанаға күн сайын 75 мыңға жуық автокөлік келеді екен. Астанаға кіру ақысы тек белгілі сағаттарда ғана алынады және 200 теңгені құрайды.
Баяндамашы ақылы тұрақтар жүйесі жобасын жүзеге асыру туралы да айтып кетті.
- Ақылы тұрақтарды енгізу әзірге Нұрлы жол желекжолының екі жағынан – Орынбор көшесінен Қабанбай батыр даңғылына дейін жүзеге асырылған. Барлығы 910 орын, - деп нақтылап кетті Талгат Ардан.
Тұрақ ақысын ұялы қосымша арқылы да төлеуге болады. Жаңа әкімшілік және ескі орталықтарды қамтитын сынама жобаны іске қосу тамыз айының соңына жоспарланған.
Астанада жол жөндеу жұмыстарын жүргізу барысы, қандай көшелерде құрылыс қарқынды жүріп жатқаны жөнінде тыңдалым барысында қаланың автокөлік жолдары басқармасының басшысы Сымбат Мырзагулов тоқталып кетті.
Баяндамашының сөзіне сәйкес 2011-2016 жылдар аралығында Астанада 101 ш жол және 275,25 ш инженерлік желілер салынған. Күйгенжар, Қазақ ауылы, Пригородный, Казгородок, Қараөткел, Заречный және Промышленный тұрғын үй массивтерінде жұмыстар аяқталған.
- Қалада автокөліктер санының артуы қаланың ескі бөлігінде көлік кептелістерінің пайда болуына алып келді. 2010 жылдан бастап Жангельдин, Московская, 9 мамыр көшелерін қайта қалпына келтіру жұмыстары жүргізілді. Осы жұмыстар жалғасын табады. Біз Желтоқсан көшесін кеңейту мен Әуезов көшесін қалпына келтіруді жоспарлап отырмыз, - деп хабарлады Сымбат Мырзыгулов.
Баяндамашы белсенді дамып, құрылыс салынып жатқан аудандарда да құрылыс жұмыстарын жүргізу қажеттілігін айтып кетті. Мысалы, Тілендиев даңғылы ауданында жалпы ұзақтығы 5,3 шақырым болатын төрт көше – Алматы, Жангельдин және Алматы-1 салу керек. Қошқарбаев және Жұмабаев көшелері аумағында жалпы ұзақтығы 9,1 шақырым болатын жеті көше керек. Басқарма келесі жылы «Мыңжылдық» бақжолының бағытын дамытып, Нәжімеденов және Байтұрсынов көшелерін салуды жоспарлап отыр.
Қоғамдық тыңдалым жұмысына астана әкімінің бірінші орынбасары Сергей Хорошун, Астана қаласы Қоғамдық кеңесінің төрағасы Сансызбай Есилов, қала басқармалары мен ведомстволары басшылары, қоғамдық ұйымдар мен БАҚ өкілдері қатысты.