Бюджетті нақтылай отырып…

Өз сөзінде қала әкімінің орынбасары Андрей Лукин бүгін талқылауға ұсынылатын мәселелерге астана тұрғындарының өмір сүру жағдайы, астананың имиджі және ЭКСПО-2017 ауқымды шарасын өткізу тәуелді болатынын баса айтты.

Ұсынылып отырған бюджетті нақтылау шеңберінде қала әкімінің орынбасары Андрей Лукин астанаға қажетті маңызды жобалар туралы айтып өтті. Депутаттар мақұлдаған қаражат астананы дамыту бойынша негізгі міндеттердің шешімін табуға бағытталады. Атап айтқанда қыс қарсаңында төтенше жағдайлардың алдын алуға, астанада жаңа зираттар салуға, құйынды кәріз жүйесі құрылысын жалғастыруға, Астана су қоймасындағы бірінші көтергіш сорғыш станциясын қайта жаңартуды жобалауға, мүгедектерді әлеуметтік қолдау мен басқа да шараларға жұмсалады. Билік пен депутаттардың алаңдаушылығын тудырып отырған мәселе автокөлік жолдарының сапасы болып табылады, осы мақсатқа да бюджеттен қаражат бөлінген.

Астананың мәдени өмірі де назардан тыс қалған жоқ. «Жастар» театры мен Қуанышбаев атындағы қазақ драма театрына қойылымдар қоюға қаражат бөлінген. Бұдан басқа, осы қаражатқа астананың символы – Бәйтерекке жөндеу жұмыстарын жүргізу қарастырылған, аталған нысан салынған сәттен бері жөндеу жүргізілмеген.

Өз сөзін қорыта келе, қала әкімінің орынбасары Андрей Лукин қатысушыларды бөлінген қаражаттың толық көлемде игерілетініне сендірді.

Сонымен қатар, мәслихат сессиясында қала әкімдігінің жеке құрамына өзгеріс енгізу, мемлекеттік қажеттілікке жер телімдерін сатып алу, Астана қаласы мәслихатының «Қосымша дәрі-дәрмекпен қамтамасыз ету туралы» шешіміне өзгертулер мен толықтырулар енгізу, Астана қаласының ревизиялық комиссиясының мүшесін лауазымынан босату, аккредитация бойынша комиссия құрамы туралы мәселелер қарастырылды.

Сессия жұмысына қала әкімінің орынбасары А.И.Лукин, «Алматы», «Есіл», «Сарыарқа» аудандарының әкімдері, қала басқармалары мен департаменттерінің басшылары, қоғамдық бірлестіктер мен бұқаралық ақпарат құралдарының өкілдері қатысты.