Астанадағы көлік жүктемесін қалай төмендетуге болады

Мәслихаттың кезекті сессиясына көлік жолдарының жай-күйі мен дамуы туралы баяндамамен әкімнің орынбасары  Қосман Айтмұхаметов қатысты.

Әкім орынбасарының сөзі бойынша қазіргі таңдағы басты мәселенің бірі – астана жолдарындағы көлік жүктемесін төмендету болып табылады. Ол көлік құралдары ең көп шоғырланатын бірнеше көшелерді атады.

– Әлеуметтік шиеленісті төмендету, сондай-ақ инженерлік желілер мен әлеуметтік объектілерге апаратын жолдарды   қамтамасыз ету мақсатында бірнеше көшелерде, соның ішінде Сейфуллин көшесі мен Тілендиев даңғылы маңайында жалпы ұзындығы 5,3 шақырымды құрайтын, төрт көшеде, Қошқарбаев көшесі маңайында - жалпы ұзындығы 9,1 шақырымды құрайтын, жеті көшеде құрылыс жұмыстары жүргізіліп жатыр. Сығанақ көшесінің маңайында Е11, Е13көшелерінің құрылысы басталды. Сонымен қатар ағымдағы жылы Жасыл орам көшесінде де инженерлік желілер құрылысы басталды, - деп атап өтті Қ.Айтмұхаметов.

Құрылысы басталып үлгерген, кіші айналма жол  қаланың көлік желісіне түсетін жүктеме мәселесін шешу түйініне айналып отыр, әрі әкім орынбасарының айтуы бойынша – айналма жол құрылысын әрі қарай жалғастыру қажет. Оның жалпы ұзындығы 35 шақырымды құрайды, 2008 жылдан бері 22,8 шақырым жол, 14 жол айырықтың 9-ы, көпірлер мен өтпежолдар салынды.

– Кіші айналма жол тәулігіне 90 мыңнан астам көліктің өтуіне мүмкіншілік тудырады, бұл орам кем дегенде 20 мың көліктің қала орталығына соқпай өтуіне мүмкіндік береді, - деп түсіндіріп өтті Қосман Айтмұхаметов.

Айналма жолдан басқа, Дүкенұлы көшесінен бастап Тәшенов көшесіне дейінгі аумақтағы Асанқайғы көшесін де созу қажет. Мұндай шара Уәлиханов көшесінің бойын көліктен тәулігіне 20 мың автомобильге дейін ішінара босату мүмкіндігін береді, сондай-ақ Республика даңғылының бойындағы көлік қарбаласын тоқтатуға септігін тигізеді. Бұл үдерісті 2017 жылы бастау қажет. Әкім орынбасарының айтуы бойынша, қазіргі күннің өзінде-ақ, Сейфуллин көшесін Уәлиханов көшесінен бастап Пушкин көшесіне дейін жүргізу жобаланып отыр және сондай-ақ Кенесары көшесінің құрылысын Сарыарқа даңғылынан Бейсекова көшесіне дейін жалғастыру жоспарлануда.

Қаланың шеткі жағы депутаттардың жіті назарын аударды. Қаланың шеті туралы сауалдарға жауап бере отырып, Қосман Айтмұхаметов Күйгенжар, Қазақауыл, Пригородный, Казгородок, Қараөткел, Заречный және Промышленный тұрғын алаптарында құрылыс жұмыстарының аяқталғандығы жайлы айтып өтті. Мәслихат депутаттарын қалада нөсер кәріздерін салу туралы мәселе де алаңдатты. Әкімнің орынбасары ЭКСПО және Орынбор көшелерінің аумағын жүктемеден босататын, № 27 және Тұран көшелерінің қиылысындағы тазалау құрылыстарындағы жұмыстардың да  жылдың соңына дейін аяқталатындығын айтты.

Қала жолдарындағы қиыншылықтарға егжей-тегжейлі көз жеткізу үшін халық қалаулылары қиыншылықтарды сипаттап және соңғы жөнделген күнін көрсете отырып, қиындық тудыратын аумақтардың жоспарын жасауды ұсынды. Әкімнің орынбасары Қосман Айтмұхаметов қазіргі таңда көшелерді күтіп ұстау, ағымдағы, орташа және күрделі жөндеулер кезінде орындалатын жұмыстардың түрлерінің сыныптамасын әзірлеу туралы конкурс жарияланғандығын айтты. Бекітілгеннен кейін аталмыш құжат алдағы уақытта көшелер желісін қанағаттанарлық жағдайда ұстауға мүмкіндік береді.

Сонымен бірге, сессияда мемлекет қажеттіліктері үшін жер телімдерін сатып алу туралы шарттар жобасы келісілді, қалалық ведомствоаралық комиссия құрамы бекітілді, қалалық мәслихаттың кейбір шешімдеріне өзгерістер енгізілді.

Сессияға Парламент Сенатының депутаты С.Р.Жақсыбеков, қалалық басқармалар мен департамент басшылары, қоғамдық ұйымдар мен бұқаралық ақпарат құралдарының өкілдері қатысты.

Мәслихат сессиясы жұмысының барысында Астана қаласының әкімі А.О.Исекешов сайлау округтары тұрғындарының күнделікті мәселелеріне және астананың даму болашағына қатысты, депутаттардың қойған сауалдарына жауап берді.