Мүмкіндігі шектеулі жандарға қол жетімсіз объектілер- депутаттар бақылауында
19.05.2017
Астана қалалық маслихатының әлеуметтік-мәдени даму жөніндегі тұрақты комиссия депутаттары қаланың әлеуметтік объектілеріне мүмкіндікті өз бетімен тексеруді жөн көрді. Мажит Шайдаровтың төрағалығымен өткен тұрақты комиссия отырысында әлеуметтік және тасымалдау инфрақұрылым объектілеріне мүмкіндіктерді қамтамасыз ету есептері тыңдалды. Жұмыспен қамту, еңбек және әлеуметтік қорғау басқармасының ақпараттары бойынша Астана қаласында 2012 жылдан 2016 жылдар аралығында 365 объекті төлқұжаттандырылды,оның ішінде икемделгені 46.
2016 жылы әлеуметтік және көлік инфрақұрылым объектілерінің мүмкіндігі шектеулі жандарға қол жетімділікпен қамтамасыз етілген үлесі 55,9% құрады. 2017 жылы 705 объектіні төлқұжаттандыру жоспарланған. Объектілерді төлқұжаттандыру мен икемдеу туралы ақпараттар Интерактивтік қол жетімді картаға енгізіледі.
- 2017 жылы қол жетімді объектілердің үлесі 70% құрауға тиіс, 2017 жылға икемдеу жоспарланған объектілер саны- 809, оның ішінде: Алматы ауданында-243, Сарыарқа ауданында-340; Есіл ауданында-185; объектілер: денсаулық сақтау- 19; мәдениет- 5; тұрғын үйлер- 14,- құрайтынын айта кетті басқарма басшысының орынбасары Сәуле Нұрғожина.
Еңбек, әлеуметтік қорғау және көші-қон комитеті басшысы Орал Мұқияевтің айтуы бойынша, мүмкіндігі шектеулі жандардың құқығын қорғау бойынша әрекеттегі заңнама нормаларын ұстануды қадағалау жүргізілуде. 2016 жылы 16 тексеру жұмыстары, соның ішінде 8 жоспардан тыс тексеру жұмыстарын жүргізу нәтижелері бойынша 1,3 млн. теңге айыппұл төленіп, 7 объекті мүмкіндігі шектеулі жандарға қайта жабдықталды, 1 объектіде жұмыс жүргізілуде.
2017 жылдың 1-қаңтарынан бастап 7 тексеру жұмыстарының нәтижелері бойынша анықталған бұзушылықтарды жою ұйғарымы берілген.
Астана қаласы жолаушылар көлігі басқармасының ақпараттары бойынша, қалаішілік маршруттарға 1025 автобус қызмет көрсетеді, оның ішінде 609 автобус арбада отыратын мүгедектердің мініп және түсуіне ыңғайлы қайырмалы жабдықпен қамтамасыз етілген.
Үстіміздегі жылдың 1-маусымында қаламызға мүгедектерге арналған қайырмалы жабдықпен қамтылған қосымша сатып алынған 380 автобус жеткізіледі.
Қазіргі уақытта, аудан әкімдігі аппараттарымен саябақтардың, шағын бақтардың, аула ішіндегі территориялардың, жер асты және жер үсті өткелдердің мүмкіндігі шектеулі қала тұрғындарына қолдануға қаншалықты қол жетімдігін тексеру жұмыстары жүргізілуде.
Өз кезегінде, депутаттар қарап шығу барысында арбада отыратын мүгедектерге арналған көтергіштері бар бірқатар объектілердің құрылыс нормаларына сәйкес келмейтіні анықталғанын ескертті.
Аталмыш мәселелерді талқылау нәтижесі бойынша, әлеуметтік-мәдени жұмыстар жөніндегі тұрақты комиссиямен қалалық мекемелерге ұсынымдар мен көрсетілген жұмысты жақсартуға қатысты ұсыныстар берілген қаулы қабылданды.
Бұдан өзге, халық қалаулылары өз округтерінде мұндай объектілердің бар-жоғын тексеріп, көз жазбай қадағалауға алуды шешті.
Отырысқа Астана қалалық маслихатының хатшысы- Нұрпейісов Ж.Ғ., мемлекеттік мекеме басшылары және жергілікті бұқаралық ақпарат құралдарының өкілдері қатысты.