Шексіз дарынды балақайлар
31.05.2017
Қалалық маслихат депутаттары Халықаралық балаларды қорғау күні қарсаңында елордамыздың дарынды балаларға ерекше бай екеніне тағы да көз жеткізді. Мереке қарсаңында М.Өтемісов атындағы Оқушылар сарайында республикалық «Нұр Астана» фестивалі өтті.
Халық қалаулыларын әсіресе, өздерінің шығармашылық қабілетін ешқандай өмірлік жағдайларға қарамастан, түрлі байқаулар мен жарыстарға белсене қатысып, өнерлерін паш етіп жүрген балақайлар қуантты. Бұл жолғы дәстүрлі шығармашылық марафонда жүзден аса дарын иелері өнер көрсетті. Байқауға қатысушылардың арасында Астана қаласы әкімдігінің Балаларға арналған психоневрологиялық медико-әлеуметтік мекемелерінің тәрбиеленушілері, №65 түзету мектебі мен Ақмола, Қарағанды және Қызылорда областарының Балалар үйі қатысты.
Ұйымдастырушылардың айтуы бойынша, олар бес жылдың көлемінде ерекше назар мен қамқорға мұқтаж балалардың бақыт күлкісі орнаған жылы жүздерін көру үшін жан-жақты қолдауға тырысқан.
Қоғамдық фонд «Мейірімділік-М қайырымдылық ұйымы» 2011жылдың 7-желтоқсанында құрылған. Ұйым жұмысының негізгі мақсаты- жетім балалар мен көп балалы, жағдайы төмен отбасылардың балаларына материалдық және рухани колдау көрсету.
Республикалық «Нұр Астана» фестивалін құттықтау сөзімен Қазақстан Республикасы Парламент Мәжілісінің VI шақырылым депутаты Наталья Жумадильдаева ашты.
Байқауға қатысушы жас дарындарға қолдау көрсетіп Астана қаласы маслихатының депутаттары Қарақат Әбден мен Сергей Солодовниковтар да келіп, елордалық депутаттық корпус атынан қоғамдық фонд «Мейірімділік-М қайырымдылық ұйымына» музыкалық аспап сыйлады.
–Елордамызда балалардың шығармашылық қабілетін ашуға себеп болатын жас дарындарға арналған іс-шаралар көптеп ұйымдастырылады. Балалардың әрқайсысы шексіз дарын иесі екеніне күн сайын көз жеткізудеміз. Сондықтан оларға алға қойған ұлы мақсаттарына қол жеткізулеріне жағдай жасап, қолдау керек,- екенін айта кетті елордамыздың 19 таңдау округінің депутаты Қарақат Әбден.
Шығармашылық байқау барысында қатысушылар вокалдық және хореографиялық қырларын көрсетті. Байқау қорытындысы бойынша жеңімпаздар жарияланып, қалған қатысушылар да дипломдармен марапатталып, назардан тыс қалмады. Байқауға қатысқан әр бала сыйлыққа ие болды. Енді балалар өздерінің шығармашылық мүмкіндіктерін паш ететін келесі байқауды асыға күтеді.