Мәслихаттың астана бюджетін нақтылау жөніндегі кезектен тыс сессиясы
Астана қаласының мәслихатында Табиғат Зейнұлқабденнің төрағалығымен кезектен тыс сессия өтті, оның шеңберінде депутаттар мәслихаттың «Астана қаласының 2026-2028 жылдарға арналған бюджеті туралы» шешіміне өзгерістер енгізу туралы сұрақты қарады.
Кезектен тыс сессия жұмысына қала әкімінің орынбасары Евгений Глотов, қала аудандарының әкімдері, мемлекеттік органдар мен ұйымдардың басшылары, қоғам мен бұқаралық ақпарат құралдарының өкілдері қатысты.
Астана қаласы Экономика және бюджеттік жоспарлау басқармасының басшысы Айжан Түгелбаева негізгі баяндама жасады. Ол экономиканың негізгі салаларының негізгі көрсеткіштеріне тоқтала отырып, ағымдағы жылдың жеті айының қорытындысы бойынша Астананың әлеуметтік-экономикалық дамуы туралы ақпарат ұсынды. Ұсынылған мәліметтерге сәйкес, жалпы өңірлік өнімнің өсімі 8,9% құрады. Өнеркәсіп өндірісінің көлемі 11,3%-ға, құрылыс жұмыстарының көлемі 3,4%-ға ұлғайды. Бюджет шығындарын нақтылау туралы айта отырып, Айжан Түгелбаева қосымша қаражаттың негізгі бөлігі әлеуметтік маңызы бар бағыттарға қарастырылатынын атап өтті. Олардың қатарында - білім беру, денсаулық сақтау және әлеуметтік қорғау салалары, қоғамдық көлікті субсидиялау, сондай-ақ қалалық аумақты күтіп ұстау және дамыту.
Сессия барысында депутаттар елорданың ағымдағы әлеуметтік-экономикалық басымдықтарын ескере отырып, ұсынылған өзгерістер мен бюджеттік параметрлерді нақтылауды талқылады.
Көктал тұрғын алабындағы екі маңызды нысанның: Н. Тілендиев даңғылы мен Ш. Бейсекова көшесінің, сондай-ақ Абайдың 150 жылдығы көшесінің қиылысындағы екі деңгейлі айырықтың құрылысын аяқтау мерзімдері мәселелері бойынша тұрғындардың өтініштеріне ерекше назар аударылды.
Бұдан басқа, кезектен тыс сессияның күн тәртібіне кәмелетке толмағандардың істері және олардың құқықтарын қорғау, әйелдер істері және отбасылық-демографиялық саясат, құқық бұзушылықтардың алдын алу жөніндегі ведомствоаралық комиссиялардың, сондай-ақ Астана қаласының тарих және мәдениет ескерткіштерін қорғау жөніндегі комиссияның құрамдарын бекіту туралы сұрақтар енгізілді.
Кезектен тыс сессияның қорытындысы бойынша депутаттар отырыс барысында қаралған барлық сұрақтар бойынша тиісті шешімдер қабылдады.
