«Nazarbayev Universiti» магистранттарымен мәслихат депутаттарының кездесуі

Астана қаласының мәслихатында депутаттардың «Nazarbayev Universiti» магистранттарымен кездесуі өтті. Кездесудің мақсаты жас мамандарды өкілді органның қызметімен таныстыру, мәслихаттардың ҚР Парламентімен өзара іс-әрекеті, елорданы дамытудың өзекті мәселелерін және жергілікті деңгейде басқару үдерістеріндегі жас мамандардың рөлін талқылау болды. 

Мәслихат төрағасының міндетін атқарушы Асқар Смағұлов жас мамандарды мәслихаттың құрамы мен құрылымы, тұрақты комиссиялардың саны және олардың құзыреті, жұмыстың негізгі бағыттары мен проблемалық мәселелер туралы хабардар етті.

Бюджет, экономика, өнеркәсіп және кәсіпкерлік мәселелері жөніндегі тұрақты комиссияның төрағасы Кендебай Адамбек мәслихаттың жұмысы, шешімдер қабылдау тетіктері, қала әкімдігімен, халықпен, қоғамдық институттармен өзара іс-әрекет, оның ішінде, елорданы дамытудың жоспарларын, әлеуметтік бағдарламаларын, жергілікті бюджетті бекіту жөніндегі комиссияның қызметі туралы айтты.

Магистранттар белсенді сұрақтар қойып, елорданың өкілді және атқарушы билігінің, сондай-ақ, ҚР Парламентімен өзара іс-әрекетін қалыптастыру тәжірибесіне үлкен қызығушылық танытты.

Депутаттар мұндай кездесулер билік пен болашақ көшбасшылар арасындағы байланысты нығайтуға ықпал ететінін, жастардың ашық басқару қағидаттарын түсінуін қалыптастыратынын және азаматтық белсенділікке итермелейтінін атап өтті.

Кездесу қорытындысы бойынша диалогты жалғастыру және магистранттардың мәслихат отырыстарына қатысу мүмкіндігі, сондай-ақ, хаттамаларды, нормативтік құқықтық актілерді, конференциялар мен форумдардың материалдарын зерттеу туралы уағдаластыққа қол жеткізілді.