Күзгі әскерге шақыру науқаны қарсаңында елорда мәслихатының депутаттары жергілікті әскери басқару органдарының нысандарын аралады

Астанада медициналық комиссиялар өткізуге және шақырылушылармен жұмыс істеуге барлық жағдай жасалғаны атап өтілді.

Сонымен қатар жастардың әскерге баруға неге құлықсыз екендігі, әскери қызметтің беделін арттыру және оның қауіпсіздігін қамтамасыз ету, ата-аналардың алаңдаушылығын азайту сияқты маңызды мәселелер талқыланды.

Жуырда Мемлекет басшысы заңға енгізілген түзетулерге қол қойды: енді әскерге шақыру жөніндегі повесткалар тек қағаз түрінде ғана емес, SMS арқылы немесе eGov порталы арқылы да жолданатын болады. Дегенмен қағаз түріндегі повестка сақталады – ол қолхатпен табысталады немесе пошта арқылы жеткізіледі. Одан бас тартуға болмайды: кез келген жағдайда хабарлама ресми болып саналады.

Повестка бойынша әскери комиссариатқа дәлелді себепсіз бармау әкімшілік жауапкершілікке әкеп соғады – ескерту жасалады немесе 5-тен 10 АЕК-ке дейін айыппұл салынады. Бір жыл ішінде қайталанған жағдай қасақана бұзу ретінде бағаланып, айыппұл мөлшері 15–20 АЕК-ке дейін ұлғаюы мүмкін.

Сапар қорытындысында депутаттар әскерге шақырылушыларға заманауи көзқарас пен құрметпен қарау – әскери қызметті қауіпсіз әрі беделді етуге, сондай-ақ оны қазақстандық жастар үшін лайықты таңдау ретінде қалыптастыруға ықпал ететінін атап өтті.