Қала өмірінің барлық салаларының бейнебақылау және бейнеталдау жүйесінің тұсаукесері

Қалалық мәслихатта мәслихат депутаттарының «Tartip RK» ЖШС өкілдерімен заманауи технологияларды пайдалана отырып, қала өмірінің барлық салаларына бейнебақылау және бейнеталдау жүйелерін енгізу мәселелері бойынша кездесуі өтті.

Кездесуге қатысушыларға, мәслихат депутаттарына, мүдделі мемлекеттік органдардың, ведомстволық бағынысты ұйымдардың басшыларына «Tartip RK» ЖШС өз қызметі шеңберінде тығыз ынтымақтасып, Қытай Халық Республикасынан келген серіктестердің дайын шешімін негізге алатыны туралы ақпарат ұсынылды. Кездесудің мақсаты – кешенді шешімді таныстыру, сондай-ақ, өзара тиімді шарттарда қауіпсіздікті қамтамасыз ету саласындағы ынтымақтастықтың перспективаларын талқылау.

Кездесудің модераторы Астана қаласы мәслихатының заңдылық, құқық тәртібі және жұртшылықпен жұмыс мәселелері жөніндегі тұрақты комиссиясының төрағасы Азамат Айтхожин болды.

Тұсаукесер барысында «Beijing Anlu International Technology Co., Ltd» компаниясының профилі, қауіпсіз қалалардың негізгі технологиялары, шешімдері мен кейстері ұсынылды. Сонымен қатар, кездесуге қатысушылар барлық қауіпсіздік ішкі жүйелеріне енгізілуі мүмкін интеграцияланған қауіпсіздік интеллектуалды платформасының жобасымен таныстырылды.

Депутаттар елордада мемлекеттік-жекешелік әріптестік жобасы аясында «Сергек» қоғамдық және жол қауіпсіздігі жүйесі жұмыс істегенін, оның әзірлеушісі «Көркем Телеком» ЖШС компаниясы болғанын айтты. Қазіргі уақытта компаниямен келісімшарт мерзімі аяқталды. Бұдан әрі өз есебінен ЖИ-дің жаңа технологияларын және үлкен деректер талдауын енгізетін және бейнекамераларды қосымша орнататын БАӘ-ден Presight AI Ltd. компаниясының басқару процесі басталды.  Жұмыс көлемінің 60%-ын қазақстандық компаниялар жүзеге асыратын болады.

Алғашқы танысу кездесуі өткенін ескере отырып, барлық қатысушыларға тұсаукесер материалдарымен егжей-тегжейлі танысу үшін уақыт қажет.

Тұрақты комиссияның төрағасы Азамат Айтхожин кездесуді қорытындылай келе, мемлекеттік құрылымдардың басшыларына қала өмірінің барлық салаларына бейнебақылау және бейнеталдау жүйелерін енгізу мәселелері бойынша ұсыныстарды зерделеуді ұсынды.