Жуырда құрылған «Сарайшық» ауданының өзекті мәселелері кезекті көшпелі кеңесте талқыланды

Аудан әкімі Мақсат Саматұлы қосымша қажеттіліктер мен бюджет қаражатын тиімді пайдалану жайын баяндады.

Ауданда бірқатар шешімін күтетін мәселелер бар. Атап айтқанда, «Интернациональный», «Мичурино» және «Күйгенжар» тұрғын үй алаптарын сумен қамтамасыз ету, «Промышленный» тұрғын үй алабында нөсер кәрізі жүйесінің болмауы, жаңа теміржол вокзалы маңында орналасқан көшелердің құрылысын жүргізу – басты проблемалардың қатарында.

Бүгінде ауданда 227 аула болса, оның 52-сінде жөндеу жұмыстары қажет. Сонымен қатар, «Bravo Family» тұрғын үй кешені маңынан сквер салу жоспарланған. Жоба әзірленіп, скверді абаттандыруға арналған жер телімінің нысаналы мақсатын өзгерту бойынша жұмыстар жүргізілді.

Кеңес барысында халықтың тығыз қоныстанған тұрғын алаптарына ерекше назар аудару ұсынылды. Депутаттар Байтурсынұлы мен Нұрмағамбетов көшелерінің қиылысында 900 орындық мектеп құрылысын жеделдету, рұқсатсыз қоқыс үйінділерін жою қажеттігін атап өтті.

Сонымен қатар, депутаттар тұрғын үй кешендерінің эскиздерін келісу кезінде аудан әкімдерін белсенді қатыстыруды ұсынды. Эскиздік жобаларда балалар және спорт алаңдары алдын ала қарастырылуы тиіс. Бұл кейін бюджет қаражатын мақсатсыз жұмсамауға мүмкіндік береді.