Қоғамдық кеңестің бірінші отырысы

«Қоғамдық кеңестер туралы» Заңның 13-бабына сәйкес Астана қаласы Қоғамдық кеңесінің бірінші отырысы өтті.

Отырысты Қоғамдық кеңесті қалыптастыру жөніндегі Жұмыс тобының жетекшісі – «Қазақстанның азаматтық альянсы» заңды тұлғалар бірлестігінің төрағасы Бану Нұрғазиева ашты. Ол ағымдағы жылдың ақпан айында азаматтық қоғам өкілдерінен (конкурстық негізде сайланған) және мемлекеттік органдар өкілдерінен тұратын Жұмыс тобы Қоғамдық кеңестің жаңа құрамын қалыптастыру рәсімін бастағаны туралы баяндады. Жұмыс тобы өткізген іс-шаралардың қорытындысы бойынша «Қоғамдық кеңестер туралы» Қазақстан Республикасы Заңының 9-бабы 8-тармағына сәйкес, мәслихат төрағасының 2025 жылғы 18 наурыздағы өкімімен Астана қаласы Қоғамдық кеңесінің жаңа құрамы бекітілді.

Мәслихат төрағасының міндетін атқарушы Асқар Смағұлов құттықтау сөз сөйлеп, қатысушыларды кеңес мүшелігіне сайлануымен құттықтады. Ол іріктеу аясында кандидаттардан барлығы 68 өтініш түскенін атап өтті. Тілек білдірушілердің көптігіне байланысты әңгімелесу бірнеше күн бойы, әр кандидатпен жеке-жеке өткізілді. Жинаған ұпайларының нәтижелері бойынша ашық дауыс беру арқылы 31 адам сайланды, тағы 12 кандидат резервтік тізімге алынды. Сайланғандардың қатарында қоғамдық бірлестіктердің өкілдері, білім беру жүйесінің қызметкерлері, журналистер, ведомстволық бағынысты ұйымдардың өкілдері, кәсіпкерлер, заңгерлер және басқалар бар. Кеңес құрамына 19 ер және 12 әйел адам кірді.

Асқар Смағұлов Қоғамдық кеңес мүшелеріне мәслихат депутаттары сындарлы диалогқа және елорда мен оның тұрғындарының игілігі үшін бірлескен нәтижелі жұмысқа дайын екендігін айтты.

Қоғамдық кеңестің төрағасы болып Қазақстан Республикасы Президентінің жанындағы Мемлекеттік басқару академиясының Басқару институтының директоры Зулфухар Гаипов сайланды.

Ол өз сөзінде Қоғамдық кеңес құрылымындағы алдағы өзгерістер туралы хабарлады.  Бұрын кеңес бес комиссиядан тұрған.  Қазіргі уақытта жастар ісі жөніндегі бөлек комиссия құру қажеттілігі бар. Қоғамдық кеңес төрағасының пікірінше, жастармен жұмыс ерекше назар аударуды қажет ететін маңызды бағыт болып табылады. Жастар мен жасөспірімдерге қатысты мәселелерге көбірек көңіл бөле отырып, олардың дамуы мен өз қабілеттерін іске асыра білуі үшін жағдай жасау қажет. Комиссия жұмысы жастармен өзара іс-қимылды жақсартуға, бастамаларды дамытуға, жас таланттарды қолдауға және өскелең ұрпақты әлеуметтік маңызды қызметке тартуға ықпал ететін болады, деп атап өтті төраға.  

Бұдан әрі Қоғамдық кеңестің төрағасы кәсіби және қоғамдық жұмыс тәжірибесін ескере отырып, комиссия төрағаларын сайлауды ұсынды.

Талқылау нәтижелері бойынша комиссия төрағалары болып келесі адамдар сайланды:

Олжас Сыдықбек - Ақпараттық-талдау жұмысы мәселелері жөніндегі комиссияның төрағасы;

Азамат Оспанов - Бюджет, экономика және қаржы мәселелері жөніндегі комиссияның төрағасы;

Кәрібек Құрманалиев - Азаматтық қоғамның әлеуметтік саясат саласындағы мүдделерін білдіру жөніндегі комиссияның төрағасы;

Есберген Алауханов - Кәсіпкерлікті дамыту, заңдылық және құқық тәртібі мәселелері жөніндегі комиссияның төрағасы;

Юсуп Келигов - Энергия тиімділігі, тұрғын үй-коммуналдық шаруашылық, құрылыс және экология мәселелері жөніндегі комиссияның төрағасы;

Бақдәулет Жанділдаев - Жастар ісі жөніндегі комиссияның төрағасы.