2025 жылға арналған бюджетті бірінші нақтылау жөніндегі мәслихат отырысы

Табиғат Зейнұлқабденнің төрағалығымен 2025 жылға арналған бюджетті бірінші нақтылау жөнінде мәслихаттың екінші отырысы өтті.

Қаланың алты ауданының әкімдері сөз сөйлеп, аудандардың әлеуметтік-экономикалық дамуы бойынша міндеттерді іске асыру үшін қосымша қажеттіліктер туралы баяндады. Қаржыландыру «Елді мекендердің санитариясын қамтамасыз ету», «Елді мекендерді абаттандыру және көгалдандыру» бағдарламалары шеңберінде жүзеге асырылатын болады. Сонымен қатар, бір бөлігі консервацияланған зираттардың қоршауларын жөндеуге, шаңғы-ролл трассасын жөндеуге, көшелерді жарықтандыруды жаңартуға, жаңа жылы аялдамалар, модульдік дәретханалар, тротуарлар, тұрғын алаптардағы нөсер кәріздерін салуға және т. б. қаражат қажет. Қосымша қажеттілік мәселелері тұрақты комиссиялардың отырыстарында талқыланған, олардың барысында басым болып табылмайтын шығыстарды қысқарту жөніндегі ұсыныстар қаралды.

Мәслихат төрағасы Табиғат Зейнұлқабден зираттарды жөндеу мәселесіне қатысты сұрақтар қойды, нақты қандай зираттарда қоршаулар жөнделетінін және олардың қаншасы консервацияланғанын сұрады.

Депутат Ғабит Тәжімұратов депутаттардың Тельман тұрғын алабындағы жерлеу орнына барып көру барысында олар жаңа қоршау салу қажеттігіне көз жеткізгендерін атап өтті.

Депутат Владислав Сергеев Оңтүстік-Шығыс тұрғын алабында тротуар құрылысын қосымша қаржыландыруды қолдады.

Мәслихат төрағасы Табиғат Зейнұлқабден аудан әкімдеріне жаңа жылы аялдамаларды, модульдік дәретханаларды орнату барысында халықтың сұранысын барынша қанағаттандыру үшін округ депутаттарымен орналастыру орындарын талқылауды ұсынды.

Инвестициялар және кәсіпкерлікті дамыту басқармасының басшысы Халел Әкімжанов басқармаға «Кәсіпкерлік қызметті қолдау», «Республикалық маңызы бар қаланың, астананың инвестициялық қызметін дамытуды қамтамасыз ету жөніндегі қызметтер», «2021-2025 жылдарға арналған кәсіпкерлікті дамыту жөніндегі ұлттық жоба шеңберінде кредиттер бойынша пайыздық мөлшерлемені субсидиялау және басым жобаларға кредит беру тетігі» бағдарламалары бойынша қосымша қаржыландыру көзделгенін хабарлады.

Энергетика басқармасына «Жылу-энергетикалық жүйені дамыту», «Газ тасымалдау жүйесін дамыту» бағдарламаларына, тарату және трансформаторлық пунктер, қосалқы станциялар құрылысы бойынша қосымша қаражат бөлінді.

Мәслихат төрағасы №1 Индустриялық парк аумағында үш тарату пунктін салу мәселесін қосымша талқылауды ұсынды.

Коммуналдық шаруашылық басқармасының басшысы Ерлан Сыздықов «Сумен жабдықтау және су бұру жүйесін дамыту», «Сумен жабдықтау және су бұру жүйесінің жұмыс істеуі», «Нөсер кәрізін дамыту» бағдарламалары бойынша, сондай-ақ «Астана Тазалық» үшін техника сатып алуға қосымша қажеттілік туралы баяндады.

Депутат Владислав Сергеев сайлауалды бағдарламаның пункттерінің бірі Оңтүстік-Шығыста нөсер кәрізін салу болып табылатынын атап өтті.

Мәслихат төрағасы Табиғат Зейнұлқабден «Астана Тазалық» базасына барып қайтуды ұсынды және коммуналдық шаруашылық басқармасы объектілерін аралау кестесін жасауды сұрады.

Қоршаған ортаны қорғау және табиғатты пайдалану басқармасының басшысы Дәулет Досқұлов қосымша қаржыландыру «Қоршаған ортаны қорғау объектілерін дамыту» бағдарламасы, «Абаттандыруды дамыту» бағдарламасы бойынша бөлінгенін хабарлады.

Депутат Владислав Сергеев жағалауды абаттандыру мәселесін сол жерге барып талқылауды ұсынды. Оның пікірінше, BI Group компаниясы жағалауды абаттандырумен өзі айналысуы тиіс.

Көлік және жол-көлік инфрақұрылымын дамыту басқармасының басшысы Асхат Қарағойшин «Көлік инфрақұрылымын дамыту», «Автомобиль жолдарының жұмысын қамтамасыз ету», «Жол қозғалысын реттеудің техникалық құралдарын орнату және реконструкциялау» бағдарламалары бойынша, оның ішінде Көктал, Оңтүстік-Шығыс, Интернациональный, Мичурино тұрғын алаптарындағы жұмыстар үшін қосымша қажеттілік туралы хабарлады.

Депутаттар Абайдың 150 жылдығы көшесінің аяқталу мерзімі, Тілендиев көшесі қиылысындағы жол айрығы, Мичурино, Интернациональный тұрғын алаптарына қажеттілік, №23 мектеп бойынша жұмыстарды аяқтау жағдайы, Чехоев көшесіндегі оңалту орталығы бойынша сұрақтар қойды.

Құрылыс басқармасына «Коммуналдық тұрғын үй қорының тұрғын үйін жобалау және (немесе) салу, реконструкциялау», «Қаланы абаттандыруды дамыту», «Қала шеттерінің әлеуметтік және инженерлік инфрақұрылымын дамыту» бағдарламалары бойынша және т. б. қосымша қаражат бөлінді.

Депутаттар «Amanat» партиясының Жол картасы пункттерін іске асыруға бірінші кезекте қаражат бөлуді, №91 мектеп бойынша қаражат бөлуді қолдауды ұсынды.

Тұрғын үй және тұрғын үй инспекциясы басқармасына «Тұрғын үй мәселелері бойынша жергілікті деңгейде тұрғын үй қоры саласындағы мемлекеттік саясатты іске асыру жөніндегі қызметтер», «Апатты және тозығы жеткен тұрғын үйлерді бұзу» (26 апатты үйді бұзуды жүргізуге) бағдарламалары бойынша қосымша қаражат бөлінді.