Мемлекет мұқтажы үшін жер учаскелерін иеліктен шығару

Қалалық мәслихатта Азамат Айтқожиннің төрағалығымен заңдылық, құқық тәртібі және қоғаммен жұмыс мәселелері жөніндегі тұрақты комиссияның отырысы өтті.

Депутаттар жер учаскелерін мемлекет мұқтажы үшін алып қоюға байланысты жер учаскелерін немесе өзге де жылжымайтын мүлікті иеліктен шығару жөніндегі шарттарды келісу туралы мәселені қарады.

Тұрғын үй және тұрғын үй инспекциясы басқармасының басшысы Әнуар Саипов мәслихаттың тұрақты комиссиясының қарауына шығарылатын, мемлекет мұқтажы үшін алып қоюға байланысты иеліктен шығарылатын жер учаскелерінің тізбесін ұсынды. Ол пайдалануға беру жоспарланып отырған әлеуметтік нысандардың тізімін – бірқатар көшелерді, мектептерді, шағын айналма жолдың екі учаскесін, әкімшілік ғимаратты таныстырды.

Депутат Кенжебай Адамбек сөз сөйлеп, іс жүзінде бірдей жер учаскелері үшін өтемақы төлеудегі елеулі айырмашылыққа назар аударды.

Тұрақты комиссияның төрағасы Азамат Айтқожин әріптесін қолдап, келесі аптада бағалаушыларды, мемлекеттік органдардың өкілдерін шақырып, отырыс өткізуді ұсынды. Сонымен қатар, ол әр тармаққа нормативтік құқықтық актілерге сілтеме жасай отырып түсініктеме беретін кесте дайындауды сұрады.

Өтемақы сомасымен келіскен меншік иелері тұрақты комиссияның отырысына онлайн режимінде қатысты.

Тұрақты комиссияның төрағасы Азамат Айтқожин оларға жүгініп, мәселе кезектен тыс сессияның қарауына шығарылатынын және ол бойынша тиісті шешім қабылданатынын мәлімдеді.