Елордамызда Мәскеу қаласының мәдениет күндері аясында Астана қаласы мәслихатының депутаттары Мәскеу қалалық Думасындағы әріптестерімен кездесті

Кездесу барысында елордалық мәслихаттың құрылымы, негізгі қызмет бағыттары, тұрғындармен және қалалық әкімдікпен өзара әрекеттесуі, сондай-ақ әртүрлі өмір сүру салаларын дамытуға арналған Кешенді жоспарларды жүзеге асыру жөнінде ақпарат берілді. Астана қаласы мәслихатының рөлі тұрғындар үшін қолайлы өмір сүру және жұмыс істеу жағдайларын жасауға бағытталған.

Ағымдағы жылы Астана қаласының мәслихаты да, Мәскеу қалалық Думасы да 30 жылдық мерейтойын атап өтті. Тамыз айында, Мәскеуде өткен Астана қаласының мәдениет күндері аясында елордалық мәслихат депутаттары Мәскеу қалалық Думасы мен Санкт-Петербург қаласының Заң шығарушы жиналысының жұмысымен танысты. Мәскеу мәдениет күндері шеңберінде шетелдік қонақтар шығармашылық кездесулер, театр режиссерлерінің және олимпиада чемпиондарының мастер-класстарын өткізеді. Сондай-ақ бизнес-миссиялардың ашылуы, көрмелер мен дөңгелек үстелдер ұйымдастыру жоспарланған. Іс-шаралар аясында жанұялық мюзиклдің қойылымы да өтеді.