Жедел медициналық жәрдем станциясының мәселелері бойынша мәслихат отырысы

Ерлан Каналимовтың төрағалығымен қалалық жедел медициналық жәрдем станциясының проблемалық мәселелері бойынша мәслихат отырысы өтті.

Қоғамдық денсаулық сақтау басқармасының басшысы Әлия Рүстемова депутаттарға жазғы кезеңде жедел медициналық жәрдем станциясына 400-ге дейін, қысқы уақытта 700-ге дейін өтініш түсетінін баяндады. Жедел жәрдем бюджеті 2023 жылмен салыстырғанда өсті. Спикер негізгі шығындар еңбекақы қорымен байланысты екенін атап өтті. Бүгінгі таңда жедел медициналық жәрдем автопаркі 156 бірлік санитарлық көліктен тұрады. Қосымша қажеттілік - 9 автокөлік, сонымен қатар көлікке қызмет көрсететін техниктердің жалақысын көтеруге қатысты проблемалар бар. Басқарма басшысының айтуынша, көлікке толық аудит жүргізілді, Жол картасы әзірленді, көлікті беру ережесі бекітілді, көліктің электрондық тіркелімі құрылды. Алматы, Нұра және Байқоңыр аудандарында қосалқы станциялар ашу жоспарлануда, бүгінде жер учаскелері анықталған.

Мәслихат төрағасы Ерлан Каналимов басқарма басшысының 9 бірлік автокөлік сатып алу мәселені шешуге көмектеседі деген сеніміне қатысты пікірін білдірді. Заманауи талаптарға сәйкес, өз бетінше жөндеудің орнына, аутсорсингке көшу керек. Жедел медициналық жәрдем көліктерінің қатысуымен ЖКО-ның артуы анықталған, бұл жүргізушілердің кәсіпқойлығының төмен екенін көрсетеді. Жүргізушілердің жалақысын көтеру мәселесін ешкім көтермейді. Ауысымнан кейін басқа ауысым жүргізушілеріне көлікті беру процесін ешкім бақыламайды. Басқармаға қомақты қаражат бөлінеді. Тәсілдерді өзгерту керек, басқарудың, есепке алудың, бақылаудың жаңа форматы қажет. Автокөлікті бейнекамералармен жабдықтау, шиналарға қысым датчиктерін қою керек. Кадр мәселелерімен шұғыл түрде айналысып, жүргізушілер мен диспетчерлерді іріктеу қажет.

Депутат Кендебай Адамбек мәслихат төрағасын қолдады, тәртіп орнату бойынша жедел шаралар қабылдау қажет. Депутаттың пікірінше, жұмысты үш кезеңмен жүргізу керек. Біріншіден, қосалқы станция ғимараты нашар жағдайда. Ғимаратты жалға алуға қанша қаражат кететіні туралы мәліметтер жоқ, мүмкін ғимаратты сатып алу орынды болатын шығар. Автокөлік мәселесіне келсек, Адамбек дизельді көліктерден бас тарту керек деп санайды. Жоспарға сәйкес, Ережелерді әзірлеу мерзімі ағымдағы жылдың наурыз айы, дегенмен мәселені бір апта ішінде шешуге болады.

Депутат Асқар Смағұлов отырысқа қатысушылардың назарын деректердегі қайшылықтарға аударды. Мәселен, спикердің айтуынша, көліктің амортизация мерзімі төрт жыл, егер бүгінгі күні 156 көлік бірлігі болса, онда 25 бірлікті үнемі ауыстырып отыру қажет. Есеп саясаты жоспарлы болуы керек. 9 көлік сатып алу барлық мәселелерді шешеді деген пікір қате. Сондай-ақ, автокөліктердің қызмет ету мерзімі 4 жыл ма, әлде 7 жыл ма, анықтау керек.

Мәслихат төрағасы Ерлан Каналимов жүргізушілердің көлікке ұқыпты қарауы үлкен рөл атқаратынын атап өтті. Жедел медициналық жәрдем қызметін оңтайландыру қажет. Шақыруға сол мекенжайға жақын орналасқан бригаданы жіберуге болады. Мәслихат төрағасы пилоттық режимде бірыңғай шұғыл қызметті іске қосуды ұсынды. Сонда әртүрлі жерлерде үш қызметті жалға алуды қаржыландыру қажет болмайды. Сонымен қатар, Каналимов басқарма басшысына медициналық жабдықтар, соның ішінде көліктер үшін шетелдік тауарларды сатып алуға тыйым салынбағанын, осы артықшылықты пайдалану керектігін еске салды.

Депутат Ғабит Тәжімұратов техникалық тексеруге қанша қаражат бөлінетіні туралы сұрады. Депутаттың пікірінше, аутсорсинг ұзақ мерзімді болуы керек, алдымен конкурсқа қатысушының материалдық-техникалық базасын зерделеу, қосалқы бөлшектердің жеткілікті болуын талап ету қажет, онсыз шарт жасаспау керек. Техникалық сараптама жүргізу керек, өйткені жүргізушілер көлікке ұқыпты қарамайды, сынған күйінде қалдырады. Жол-көлік оқиғасынан кейін шығындарды қызмет көрсетушінің көтеруін талап ету қажет.

Ерлан Каналимов көлікке автокөліктің жай-күйіне толық жауапты болатын екі бригаданы бекітуді ұсынды.

Депутат Дархан Рамазанов штатта тәлімгер жүргізуші позициясы бар ма және жүргізушілер қандай қағида бойынша жұмысқа қабылданатынын сұрады. Сондай-ақ, депутат виртуалды тренажерді, экстремалды жүргізу тренажерін пайдалануды ұсынды. Дархан Рамазановтың айтуынша, депутаттар барған автопаркте жүргізушілер аутсорсинг қызметінің сапасына риза.

Депутат Владислав Сергеев 90-нан аса ЖКО, бұл екі есеге артқанын көрсететінін атап өтті. Депутаттың бақылауы бойынша жүргізушілер рөлде отырған кезде телефонмен сөйлесіп отырады. ЖКО санын азайту үшін бейнекамералар қажет. Іс жүзінде 70 көлік жұмыс істейді, кем дегенде 20-30 көлік сатып алу керек.

Депутат Алтыншаш Табулдина стандартқа сәйкес 150 көлік болуы керек, барлығы 156 екенін, олардың бір бөлігі жұмыс істемейтінін айтты. Медициналық бригадалар құрылған, бірақ көліктердің жетіспеуіне байланысты олар дамылсыз жұмыс істейді.

Депутат Нұрлан Өтешев денсаулық сақтау объектісіне барған кезде тұрғындардан түскен сұрақтарды оқыды. 1991 жылдан бері перинаталдық орталықта күрделі жөндеу жүргізілмеген. Бүгінгі күні ЖСҚ әзірленбеген. Ғимараттың едәуір бөлігін, 600 шаршы метрді вакцина қоймасы алып жатыр, оны басқа жерге ауыстыруға бола ма.

Депутат Бауыржан Смайылов тұрғын алаптарының проблемаларына назар аударуды сұрады. Мысалы, 15-ші округте амбулатория өте кішкентай, осыған қатысты тұрғындар шағымдануда. Депутат денсаулық сақтау объектілерін бірге аралап шығуды ұсынды.

Мәслихат төрағасы Ерлан Каналимов басқарма басшысынан депутаттардың ескертулері мен ұсыныстарын ескере отырып, Жол картасын пысықтауды сұрады. Әкімдіктің уәкілетті құрылымдық бөлімшелерімен бірлесіп жер учаскелерін анықтап, тез тұрғызылатын үш қосалқы жедел медициналық жәрдем станциясының құрылысын жоспарлау қажет, сондай-ақ жеке тұрған ғимараттарда 50-60 шаршы метрлік шағын станциялардың орналасу пункттерін айқындап, оларды көппәтерлі тұрғын үй кешендерінен көшіру қажет. Тек медицина қызметкерлерінің ғана емес, қосалқы станциялардың басқа да қызметкерлерінің жалақысын арттыру мәселесін көтерген жөн.

Отырысты қорытындылай келе, мәслихат төрағасы Парламент Сенатында денсаулық сақтау мәселесі қаралатынын атап өтті. Барлық проблемалық мәселелерді қамту қажет. Депутаттар елорда халқына үздіксіз жедел медициналық көмекті қамтамасыз етуге қатысты барлық мәселелерді шешуге жәрдем көрсетуге дайын.