Мемлекет мұқтажы үшін жер учаскелерін алып қою

Қалалық мәслихатта Азамат Айтхожиннің төрағалығымен заңдылық, құқық тәртібі және жұртшылықпен жұмыс мәселелері жөніндегі тұрақты комиссияның отырысы өтті.

Отырыс барысында депутаттар жер учаскелерін мемлекет мұқтажы үшін алып қоюға байланысты жер учаскелерін немесе өзге де жылжымайтын мүлікті иеліктен шығару туралы шарттарды келісу жөніндегі мәселені қарады.

Тұрақты комиссияның төрағасы Азамат Айтхожин алдыңғы отырыс мәселесін қарауды кейінге қалдыруға қатысты баяндады. Спикердің айтуынша, бюджет мәселелері жөніндегі тұрақты комиссияның төрағасы Кендебай Адамбекпен бірлесіп, заңда белгіленген тәртіппен тіркелген құқық белгілейтін құжаттардың және алынатын жер учаскесі үшін ақшалай өтемақы төлеу мөлшерінің сәйкестігіне көз жеткізу үшін тиісті жерді көріп қайтқан.

Тұрғын үй және тұрғын үй инспекциясы басқармасының басшысы Әнуар Саитов мәслихаттың тұрақты комиссиясының қарауына ұсынылатын, мемлекет мұқтажы үшін алып қоюға байланысты иеліктен шығарылатын жер учаскелерінің тізбесін ұсынды.

Тізімге әлеуметтік нысандар – газ тарату кешені, кіріктірілген паркингтері бар көппәтерлі тұрғын үй кешені, Азаматтық қорғаныс академиясының кешені, сумен жабдықтау желілері, көшелер, мектеп, қоғамдық кеңістік кірген.

Әнуар Саипов депутаттарға өтемақы сомасымен келіскен меншік иелері тұрақты комиссияның отырысына онлайн режимінде қатысуға шақырылғанын хабарлады.

Тұрақты комиссияның төрағасы Азамат Айтхожин меншік иелеріне мәселе кезектен тыс сессияда қаралып, тиісті шешім қабылданатынын мәлімдеді.