Денсаулық сақтау саласын дамыту мәселелері жөніндегі жұмыс отырысы

Қалалық мәслихатта Ерлан Каналимовтың төрағалығымен денсаулық сақтау саласын дамыту мәселелері бойынша жұмыс отырысы өтті.

Мәслихат төрағасы Ерлан Каналимов денсаулық сақтаудың қолжетімді және тиімді жүйесін қамтамасыз ету жергілікті атқарушы органдардың әлеуметтік саясатының басым міндеті болып табылатынын атап өтті. Қазіргі уақытта елорданың денсаулық сақтау саласын дамыту жөніндегі үш жылдық жоспар бекітілген.

Қоғамдық денсаулық сақтау басқармасының басшысы Әлия Рүстемова өз сөзінің басында қаланың денсаулық сақтау ұйымдарының желісі бойынша статистикалық деректерді ұсынды. Ол қаладағы негізгі проблемалардың бірі ретінде медициналық ұйымдардың жетіспеушілігін атады. Рүстемова жедел көмек көрсету қажеттілігінің жоғары болуы жоспарлы істермен тиісті дәрежеде айналысуға мүмкіндік бермейтінін атап өтті. Денсаулық сақтау объектілерін салу жоспарына қатысты ол 2024 жылы Алматы және Сарыарқа аудандарында екі перинаталдық орталықтың құрылысын бастау жоспарланып отырғанын хабарлады. Балаларға арналған медициналық мекемелердің жетіспеушілігіне байланысты №2 емхана базасында травматологиялық пункт филиалын ашу туралы шешім қабылданған.

Депутат Бауыржан Смайылов сайлаушылардың теміржол ауруханасының жағдайына байланысты мәселеге алаңдайтынын жеткізді.

Әлеуметтік-мәдени даму мәселелері жөніндегі тұрақты комиссияның төрағасы Асқар Смағұлов ауысымда 500 науқастың орнына іс жүзінде нормадан тыс 1000 адамға қызмет көрсетілетін медициналық мекемелердің үлкен жүктемесі мәселесін көтерді.

Мәслихат төрағасы IKomek 109 қызметіне келіп түскен өтініштерге талдау жүргізілгені туралы айтып өтті, өтініштер арасында алғашқы медициналық көмек қызметіне қатысты мәселе жиі кездеседі. «Халық денсаулығы және денсаулық сақтау жүйесі туралы кодекске» сәйкес қалада қадамдық қолжетімділікте медициналық көмек көрсетілуі тиіс. Мәслихат төрағасы көтерген келесі мәселе - салауатты өмір салтын насихаттау, қазіргі уақытта ол қалада тиісті деңгейде жүргізіліп жатқан жоқ. Сондай-ақ, Каналимов терапевтік бейіндегі орындардың тапшылығы, балалар мен ересектерге арналған травматологиялық пункттердің тапшылығы, жедел медициналық жәрдем қосалқы станцияларының жетіспеушілігі мәселесін көтерді.

Жылыту маусымына дайындыққа байланысты мәслихат төрағасы автономдық жылыту жүйесі бар ауруханаларға желілерді төсеу схемасын ұсынуды сұрады. Каналимов ӘМД мәселелері жөніндегі тұрақты комиссияға және денсаулық сақтау басқармасына аталған проблемалық мәселелер бойынша кеңес өткізуді ұсынды.