Кезектен тыс сессия: елорданың көшелері мен білім беру ұйымдарына атаулар беру

Қалалық мәслихатта Ерлан Каналимовтың төрағалығымен кезектен тыс сессия өтті.

Астана қаласының кейбір құрамдас бөліктеріне атау беру және олардың атын өзгерту туралы мәселе бойынша тілдерді дамыту және архив ісі басқармасының басшысы Сәкен Есіркеп сөз сөйледі. Мәселен, қала көшелерінің біріне венгр ақыны, Венгр революциясының белсенді қайраткері Шандор Петефидің есімін, халықаралық қатынастарды нығайту мақсатында Түркиядағы Анадолы түбегінің атауын беру, сондай-ақ қоғам қайраткері Нәзір Төреқұловтың, күйші-композитор Тәттімбеттің, ұлы ойшыл Қорқыт атаның, ақын Сырбай Мәуленовтың және Қазақстанның басқа да көптеген танымал тұлғаларының есімдерін беру ұсынылған.

Депутат Бауыржан Смайылов қаланың жаңа аудандарының біріне көрнекті қоғам қайраткері Жұмабек Тәшеновтің есімін беру туралы ұсыныс айтты.

Тілдерді дамыту басқармасының басшысы депутаттарға отырыстың күн тәртібіндегі екінші мәселе, «Кейбір білім беру ұйымдарына жеке тұлғалардың есімдерін беру туралы» баяндады. Өз баяндауында ол қалалық кеңістікке ат қоюдың маңыздылығына назар аударды, өйткені бұл процестің терең тарихи мағынасы бар, ол бүкіл ел мен елорданың рухын бейнелейді. Қаланың жалпы білім беретін мектептеріне Шәкен Айманов, Әлімхан Ермеков, Қасым Қайсенов, Шерхан Мұртаза, Рахымжан Қошқарбаев, Сұлтанбек Қожанов, Жүсіпбек Аймауытов және басқа да танымал жазушылардың, ғалымдардың, ақын-публицистердің, ҰОС батырларының, режиссерлердің, драматургтердің есімдері берілген.

Тұрғын үй және тұрғын үй инспекциясы басқармасының басшысы Әнуар Саипов мемлекет мұқтажы үшін алып қоюға байланысты иеліктен шығарылатын жер учаскелерінің тізбесін ұсынды.

Тізбеге мынадай әлеуметтік объектілер кірген: кіріктірілген үй-жайлары мен паркингтері бар көппәтерлі тұрғын үй кешендері, Сарыарқа даңғылы, Асан қайғы, Сырдария және тағы басқа көшелер, КЛ10 желілерінің дәлізі, кіші айналма жол (V учаске), арнайы трасса, жалпы білім беретін мектептер, дарынды балаларға арналған республикалық мектеп-интернат, Сарыарқа даңғылы мен Кеңесары көшесінің қиылысы.

Астана қаласы бойынша Тексеру комиссиясының төрағасы Иманжүсіп Ақпомбаев Тексеру комиссиясының мүшелігіне бес жыл мерзімге Амандық Молдашевті тағайындау туралы баяндады. Ақпомбаев тағайындалған кандидаттың қаржы саласында 40 жылдан астам тәжірибесі бар екенін, Республикалық бюджеттің атқарылуын бақылау жөніндегі есеп комитетінің Сапаны бағалау және бақылау бөлімі басшысының орынбасары, ҚР ДСМ Ішкі аудит департаментінің директоры лауазымдарында және басқа да мемлекеттік органдарда қызмет еткенін атап өтті.

Депутаттар Владислав Сергеев, Бауыржан Смайылов және Нұрлан Көпешев Амандық Молдашевтің кандидатурасын қолдап сөз сөйледі.

Мәслихаттың кезектен тыс сессиясының талқылауына шығарылған барлық мәселелер қаралып, олар бойынша тиісті шешімдер қабылданды.