Қалалық мәслихаттың ардагерлерді әлеуметтік қолдау мәселелері жөніндегі кезектен тыс сессиясы

Қалалық мәслихатта Ерлан Каналимовтың төрағалығымен кезектен тыс сессия өтті.

Чернобыль атом электр станциясындағы апаттың салдарын жоюға қатысқан ардагерлер мен оларға теңестірілген адамдарға және басқа мемлекеттердің аумағындағы ұрыс қимылдарының ардагерлеріне әлеуметтік қолдау шараларын жақсарту сияқты өзекті мәселе қаралып, бірауыздан қолдау тапты. Өзгерістерге сәйкес осы санаттардағы адамдарға атаулы және мерекелік күндерге орай көрсетілетін әлеуметтік көмекті 35 АЕК-тен 45 АЕК-ке дейін; коммуналдық қызметтерді төлеуге арналған ақшалай төлемдердің мөлшерін 2,4 АЕК-тен 4,5 АЕК-ке дейін ұлғайту көзделеді.

Сессияның күн тәртібіндегі «Қазақстан Республикасының астанасы - Астана қаласын басқару схемасы туралы» мәселе бойынша Астана қаласы әкімі аппараты басшысының орынбасары Жаңасыл Шаукентаев сөз сөйледі.

Отын-энергетикалық кешен мен коммуналдық шаруашылық жөніндегі үлкен бір басқарманы екі басқармаға бөлу ұсынылды, өйткені әртүрлі қызмет салаларының бір бағыныста болуы екі салада да шешім қабылдаудың жеделдігін шектейді. Жаңадан құрылатын басқармалар атауларына сәйкес өздерінің тікелей функционалымен айналысатын болады.

Депутат Бауыржан Смайылов сөз сөйлеп, электр энергиясымен қамтамасыз ету және нөсер кәрізі мәселелері бойынша функциялардың бөлінуін қолдайтынын білдірді.

Мәслихат төрағасы Ерлан Каналимов функцияларды бөлу бойынша енгізілетін өзгерістер бекітілген лимит шеңберінде жүргізілетінін және қосымша шығыстарды талап етпейтінін атап өтті.

Сессияның күн тәртібіне шығарылған барлық мәселелер қаралып, олар бойынша тиісті шешімдер қабылданды.