«Jańa Dala / Green Day ‘2023» Қазақстан Дала күні өтіп жатыр

Биыл ауқымды іс-шаралардың бірі – «Jańa Dala / Green Day ‘2023» Қазақстан Дала күні өзінің алғашқы онжылдығын атап өтуде.

Дала күніне әлемнің 18 елінен келген аграрлық саланың кәсіби мамандары қатысуда. Австрия, Беларусь, Германия, Испания, Италия, Қазақстан, Канада, Қытай, Қырғызстан, Нидерланды, Польша, Ресей, Сербия, АҚШ, Түркия, Финляндия, Украина және Чехия елдерінің 150-ден астам компаниясы екі күн бойы осы саладағы соңғы жетістіктерін, ауыл шаруашылығы, селекция, мал шаруашылығына қатысты заманауи технологиялары мен жоғары өнімді техника үлгілерін көрсетеді.

«Аграрлық несие корпорациясы» АҚ «Jańa Dala / Green Day '2023» Қазақстан Дала күнінің негізгі серіктестерінің бірі. Жыл сайын осы іс-шара аясында филиал өкілдері шаруаларға несие бағдарламалары мен шарттарын таныстырып, түсіндіреді.

Астана қалалық Мәслихатының депутаты Жанаргүл Құлмағамбетова мұндай іс-шаралар ауыл шаруашылығы тауарын өндірушілер үшін өте қажет екенін атап өтті. Мұнда шаруа қожалықтары мен кәсіпорындардың жұмысын көрсетуге, соңғы үлгідегі ауыл шаруашылығы техникаларымен жақын танысуға мол мүмкіндік бар. Сонымен қатар, шаруалар көрмедегі керемет техникаларға қол жеткізу мүмкіндіктерін білу үшін «Аграрлық несие корпорациясы» АҚ мен «ҚазАгроҚаржы» АҚ-нан несие рәсімдеу жөнінде кеңес алды.

Биыл «Jańa Dala / Green Day»  ауқымды іс-шарасына 5 мыңнан астам фермер қатысып жатыр.

Дала күніне келгендер іскерлік және танымдық, ойын-сауықтық сипаттағы іс-шараларға өздері қатысып, көре алады. Генетикасы мықты асыл тұқымды ірі қара малдың аукционы, «Үздік бұқалар» байқауы, мал бағатын «ақылды» иттердің іс-әрекетіне қатысты шеберлік сабағы, ауыл шаруашылығы жәрмеңкесі және тағы басқа да қызықтар өтуде.