Қаланың шет аймақтары мен тұрғын алаптардың жол инфрақұрылымын дамыту

Владислав Сергеевтің төрағалығымен құрылыс, экология, көлік және тұрғын үй-коммуналдық шаруашылық мәселелері жөніндегі тұрақты комиссияның шет аймақтар мен тұрғын алаптардың жол инфрақұрылымын дамыту мәселесіне қатысты отырысы өтті.

Жол-көлік инфрақұрылымын дамыту басқармасы басшысының м.а. Мерей Байырхан өз сөзінің басында қаланың тұрғын алаптарын дамыту мақсатында 2010 жылы Астана қаласының шет аймақтарын дамыту тұжырымдамасы қабылданғанын атап өтті. Тұжырымдамаға сәйкес 2011 - 2022 жылдарда жолдар мен инженерлік желілер салынды, оның ішінде 2019 жылдан 2022 жылға дейін Көктал-1, Көктал-2, Комсомольский, Интернациональный, Достық тұрғын алаптарында, Оңтүстік-Шығыс шағын ауданының сол жағында инженерлік желілер салу бойынша жұмыстар жүргізілді. Соңғы төрт жылда орташа жөндеу аясында жалпы ұзындығы 80 км болатын 237 көше жөнделді. Ағымдағы жылы РБ және ЖБ-тен 6 тұрғын алапта 7 жобаны іске асыруға қаражат бөлінді.

Депутат Азамат Айтхожин Отау ш / а жағдайына қатысты сөз қозғады, онда жол-көлік оқиғалары жиілеп кеткендіктен, жасанды жол бұдырларын орнату қажет. Мичуринода аялдама тұрғын үйдің алдында орналасқан, бұл апатты тудыруы мүмкін, оны басқа жерге ауыстыру керек, мектеп аймағындағы жасанды жол бұдырларын жаңарту керек. Тігін фабрикасы ауданында жол-көлік оқиғасы орын алды, бағдаршам мен жаяу жүргіншілер өткелін орнату қажет. Оңтүстік-Шығыс шағын ауданын газдандырудан кейін жолдар қазылып тасталған. Депутат азаматтардың қауіпсіздігін қамтамасыз етуге қатысты және т.б. мәселелермен танысу үшін көшпелі отырыс өткізуді ұсынды.

Депутат Давид Лория сайлаушылармен кездесуден кейін Күмісбеков/Жангелдин көшелерінің қиылысында қауіпсіздікті сақтаудың қамтамасыз етілмегендігіне көз жеткізді. IKomek қызметі арқылы 15 шағым түскен, оның 9-ы осы жол қиылысына қатысты, жолда ешқандай таңбалар жоқ, тротуарлар жоқ, автомобильдер кез-келген жерде тұрақтап тұр. Әрі қарай № 60 мектептің бұрышында жасанды жол бұдырлары жаяу жүргіншілер өткелінде орналасқан. Бейбітшілік /Әуезов көшелерінің қиылысында екі балабақша орналасқан, тек бір жағында тұрақ бар. Республика даңғылында жол үстінде 60-70 см шұңқыр қалыптасқан.

Мәслихат төрағасы Ерлан Каналимов жол таңбаларына қатысты сұрақ қойды, әдетте мамыр айының ортасына қарай бұл жұмыс аяқталатын, бірақ биыл ол ұзаққа созылды. Төрағаның айтуынша, бұған дейін жол таңбалаумен қаланың 4 ауданында 4 бригада айналысқан және олар бойынша ешқандай мәселе туындамаған. Өткен жылдан бастап жасанды жол бұдырларын резеңке жабындарға ауыстыру және оларды қыстың алдында алып тастау туралы мәселе бірнеше рет көтерілді. Газдандыру жүргізілген тұрғын алаптарында шағымдар өте көп. Мердігерлердің ешқайсысы жолдарды тиісті деңгейде қалпына келтірмеген. Каналимов көшпелі отырыс өткізуді ұсынды, өйткені бұл - қала тұрғындарының қауіпсіздігіне қатысты мәселе. Газдандырудан кейінгі жолдар бір жыл бойы жөндеусіз қалыпта, кейіннен жолдарды қалпына келтіру үшін үлкен қосымша қаражат қажет болады.

          Сондай-ақ, мәслихат төрағасы үшінші жыл қатарынан Алаш, Төле би көшелеріне, Жағалау, Оңтүстік-Шығыс ш/а, Өндіріс кентіне қатысты тұрғындардан шағымдар келіп жатқанын атап өтіп, жеке отырыс өткізуді ұсынды. 3,5 айда IKomek қызметіне 1500 шағым түскен. Көптеген жаңа тұрғын үй кешендері салынуда, ал оларға кірме жолдар жоқ, мысалы, «Отау» ТК. Қиылыстарға келетін болсақ, Еуропа елдеріндегі қиылыстарды және біздікін салыстыратын болсақ, біздікі әртүрлі ойыншықтармен безендірілген шыршаға ұқсайтынын байқауға болады, мысалы, бір қиылыстағы 12 бағанда әртүрлі бағдаршамдар мен камералар орналастырылған. Мүмкін, стандартты қайта қарау қажет шығар. Тұрақ аймақтары бойынша үй аулаларында ауыр жүк көліктеріне, крандарға, автобустарға тұрақтауға рұқсат етіле ме деген сұрақ туындайды. Сондай-ақ, жылдар бойы үйлердің аулаларында қараусыз қалдырылған көліктермен ешкім айналысып жатқан жоқ. 54 бағдаршам қиылысы бойынша өткен жылғы мәселе шешілген жоқ. Мәслихат төрағасы депутаттар жұмыстың қандай мерзімде аяқталатынын білуі үшін, аталған проблемаларды орындау мерзімдерімен және мердігер ұйымдардың атауларымен мәселелерді шешу жөніндегі жоспарларды мәслихатқа ұсынуды сұрады.

         Депутат Бауыржан Смайылов көлік басқармасы басшысының м.а. атына сын айтты, депутаттың пікірінше, ақпаратты қандай көшелер жөнделгені, қайсысы жөнделмегені көрсетілген схема түрінде беру қажет еді. Депутаттың пікірінше, Көктал т/а жолдарды жөндеуді 2025-2026 жылдарға қалдыруға болмайды, келесі жылы бастау керек. Сондай-ақ, депутат 2019 жылы көшелердің бірін жөндеу басталғанын, бірақ кейін тоқтатылғанын атап өтті. Осы уақытқа дейін ешқандай қозғалыс байқалмайды. Тұрғындармен кездесу барысында ШОБ өкілдері жолдарды жөндеудің жоқтығына шағымданды. Депутат басқарма орынбасарына осы мәселені сол жерлерге барып шешуді ұсынды. Сондай-ақ, депутатқа Сүйінбай көшесінде тұратын тұрғындар шағымдармен жүгінген.

Депутат Талғат Ерғалиев мүмкіндігінше Агроқалашық бойынша жолдар мен нөсер кәріздерін дамыту жоспарын ұсынуды сұрады, соңғы 10 жылда қала және Агроқалашық тұрғын алабындағы жолдар мен нөсер кәріздеріне қанша қаражат жұмсалды, осы арқылы қаланың шет аймақтары тұрғындарының мүдделері қаншалықты шектелгенін байқауға болады. Герцен, Бейсеков, Ақан сері көшелерінде тротуарлар жоқ. Депутаттың келесі сұрағы Бейсеков көшесін абаттандыруға қатысты болды. Депутаттың пікірінше, басқармада шет аймақтарды дамыту перспективасының жоспары әзірленуі тиіс.

Депутат Ғабит Тәжімұратов Пригородный, Тельман т/а жолдарды жөндеуге қатысты сұрақ қойды. Family Village тұрғындары күн сайын шағымданады, ол аймақта үнемі апаттар орын алады, өйткені барлық көлік Мәңгілік ел даңғылына іргелес жалғыз көшемен қозғалуға мәжбүр. Өткен жылы Amanat партиясының Жол картасы бекітілді, және картада белгіленген барлық тармақтардың қаржыландырылғанын атап өту керек. Хаттамада орындау мерзімдерін белгілеу қажет.

«Жол активтері сапасы ұлттық орталығы» РМК Астана қаласы бойынша филиалының директоры Асхат Оқасов сөз сөйледі. Директор жергілікті желі жұмысының сапасын бақылау қорытындысы бойынша 2022 жылы Астана 4-ші орында, жол - құрылыс материалдарының сапасын сараптау нәтижелері бойынша 10-шы орында тұрғанын баяндады. Сараптамамен 128 жұмыс істеп тұрған объектілердің ішінде 106 (83%) объект қамтылды. Спикер проблемалық мәселелердің ішінде құрылыс, отын-энергетикалық кешені басқармаларымен 2023 жылға шарт жасаспауды атады. Бұдан әрі Окасов жолдарды диагностикалау, жолдарды паспорттау көрсеткіштеріне егжей-тегжейлі тоқталды.

Комиссия төрағасы Сергеев баяндамашыдан ұйымдар ескертулерді жоймаған 10 жағдай бойынша мәслихатқа материалдар енгізуді сұрады. Сапасыз жұмыс істейтін мердігерлер осы жылы да жұмыс істеп жатыр, осыған қатысты талдау жасала ма деген сұрақ туындайды.