Жер учаскелерін иеліктен шығару туралы шарттардың жобаларын келісу

Қалалық мәслихатта Нұрлан Көпешовтың төрағалығымен заңдылық, құқық тәртібі және жұртшылықпен жұмыс мәселелері жөніндегі тұрақты комиссияның отырысы өтті.

Депутаттар «Жер учаскелерін мемлекет мұқтажы үшін алып қоюға байланысты жер учаскелерін немесе өзге де жылжымайтын мүлікті иеліктен шығару туралы шарттардың жобаларын келісу туралы» мәселені қарады.

«Астана қаласының Тұрғын үй және тұрғын үй инспекциясы басқармасы» ММ басшысы Әнуар Саипов мәслихаттың тұрақты комиссиясының қарауына шығарылатын, мемлекет мұқтажы үшін алып қоюға байланысты иеліктен шығарылатын жер учаскелерінің тізбесін ұсынды. 

Бұл тізбеге мынадай объектілер кірді: Хусейн бен Талал көшесі; Тәуелсіздік даңғылынан А. Тоқпанов көшесіне дейінгі көшелер; Асан Қайғы көшесі; №37 көше; В8 көшесі; Қобланды батыр көшелері құрылысы; В12 көшесі бойында сумен жабдықтау және су бұру желілерінің құрылысы; А102 және А104 көшелерінің, Е796 және Е 899 көшелерінің қиылысы ауданындағы мектептердің құрылысы; жылу магистралінің күзет аймағы (5-ші енгізу); Мыңжылдық аллеясы бойында скверлер мен бульварлар салу.

Отырыс барысында депутаттардың жер учаскелерінің меншік иелерімен онлайн режимде кездесуі өтті. Отырысқа барлық меншік иелері немесе олардың өкілдері қатысып, жер учаскесі үшін өтемақы сомасымен келісетіндерін растады.

Тұрақты комиссия отырысын қорытындылай келе, Н. Көпешов шарттардың жобаларын келісу туралы мәселе мәслихаттың кезектен тыс сессиясының қарауына шығарылатынын айтты.