Елорда көшелеріне атау беру жөнінде жария тыңдаулар

Қалалық мәслихатта Нұрлан Көпешовтың төрағалығымен «Нұр-Сұлтан қаласының құрамдас бөліктеріне атау беру туралы» мәселе бойынша жария тыңдаулар өтті.

«Нұр-Сұлтан қаласының Тілдерді дамыту және архив ісі басқармасы» ММ басшысы Есіркеп Сәкен көшелерге, елорданың өзге де құрамдас бөліктеріне атау беру жөнінде қалалық ономастика комиссиясының қарауына келіп түскен ұсыныстар туралы баяндады.

Мәселен, көшелерге Орал Мұхамеджанов, Нұрлан Балғымбаев, Сафуан Шаймерденов, Нұркен Әбдіров, Олжабай батыр, Шерхан Мұртаза, Дүкенбай Досжан, Еркеғали Рахмадиев, Александр Сызганов, Еркін Әуелбеков, Қанай би, Хамза Есенжанов, Бопай ханым, Қайреден Қарбаев, Сабыр Ниязбеков, Бертіс би, Құман Тастамбеков, Шолпан Жандарбекова, Ақселеу Сейдімбек, Халифа бен Заид Әл Нахаян, Барлыбек Сыртанұлы, Ермұхан Бекмаханов, Тұрсынбек Кәкішев, Сәбит Мұқанов есімдерін, Бозоқ, Ботай, Түйменкент, Жарқұдық, Ақжал, Алшалы, Жалтыр атауларын беру туралы ұсыныстар түскен.

Бұдан басқа, Қабанбай батыр даңғылының бойында орналасқан скверге Ұлыбритания және Солтүстік Ирландия Біріккен Корольдігінің Патшайымы II Елизаветаның есімін беру туралы, сондай-ақ ҚР Сыртқы істер министрлігі ғимаратының жанында орналасқан аллеяға Нәзір Төреқұловтың есімін беру туралы ұсыныстар келіп түскен.

Ғалым, ҚР Көркемсурет академиясының академигі, тарих ғылымдарының докторы, профессор Марат Әбсеметов ономастикалық комиссияға келіп түскен ұсыныстарға қанағаттанушылық білдірді, себебі аталғандар негізінен ғылым, әдебиет, музыка өнері салаларының дамуына елеулі үлес қосқан тарихи тұлғалардың есімдері. Алайда, ғалымның пікірінше, Қазақ хандығының ханы, Абылай ханның немересі Кенесары Қасымұлының дәл осы жерде дүниеге келгенін, дәл осы жерде оның ұлы серіктері өмір сүргенін ұмытпау керек, сондықтан аллеяларға атау беру кезінде Кенесары есімінің жастарға патриоттық тәрбие беру ісіндегі тарихнамасы мен мызғымас маңызын ескерген жөн.

Нұр-Сұлтан қаласы Қоғамдық кеңесінің мүшесі Бауыржан Смайылов та көшелерге, елорданың басқа да құрамдас бөліктеріне атау беру жөніндегі ұсыныстарды қолдады.

Жарыссөзге Нұр-Сұлтан қаласы мәслихатының депутаттары қатысып, Қалалық тілдерді дамыту және архив ісі басқармасының ұсынысын қолдады.

Жария тыңдаулардың қорытындылары бойынша Нұр-Сұлтан қаласы мәслихаты тұрақты комиссияларының жария тыңдауларының хаттамасы дайындалып, қалалық әкімдіктің интернет-ресурсында және бұқаралық ақпарат құралдарында орналастырылатын болады.