Депутаттардың бастамасы бойынша елордада "Психологиялық қолдау қызметі" ашылады

"Nur Otan" партиясының елордалық филиалы жанындағы Әйелдер отбасы және балалардың құқықтарын қорғау мәселелері жөніндегі кеңестің бастамасы бойынша елордада қалалық "Психологиялық сүйемелдеу қызметі" ашылады, олар бүгінде Қостанай мен Шымкентте табысты жұмыс істеуде. Қалалық мәслихат депутаттары жобаны бірауыздан қолдады. Бүгінде қаламызда балалар мен отбасыларға көмек көрсетуде ведомствоаралық өзара іс-қимылдың бірыңғай тетігі жоқ, сондай-ақ шұғыл психологиялық көмек жүйесі жоқ. Бұл ретте, біздің қаламызда, жалпы еліміздегі сияқты балаларға қатысты зорлық-зомбылық, суицидтік мінез-құлық, балалар қылмысы сияқты тәуекелдер бар. Осы тәуекелдердің барлығын ескерту керек және барлық күш-жігерді осы факторлардың алдын алуға бағыттау керек. Жоба "SOS Детская деревня Астана" және қиын жағдайдағы балаларды қолдау орталығымен бірлесіп жүзеге асырылады. 

"Әкімдік тарапынан Т. Жүргенов көшесі, 26 үй, № 62 НП мекенжайындағы тұрғын үй кешенінің бірінші қабатында кеңсе қарастырылған. Жөндеу жұмыстарына смета әзірлеу бойынша жұмыстар жүргізілді, үй-жайларды жөндеуге конкурс жарияланды. Екі апта бұрын жөндеу жұмыстары басталды, штаттық кесте белгіленді",- деді қалалық мәслихаттың хатшысы Ерлан Каналимов.