Елорданың 2022-2024 жылдарға арналған бюджетінің жобасы қаланың қоғамдық кеңесінде талқыланды

Сансызбай Есіловтың төрағалығымен Нұр-Сұлтан қаласының қоғамдық кеңесінде алдағы үш жылдық кезеңге арналған бюджет бойынша қоғамдық тыңдау өтті.      

Оған Қоғамдық кеңес мүшелерінен басқа мәслихат депутаттары, қалалық басқармалар мен департаменттердің, үкіметтік емес ұйымдардың, Нұр-Сұлтан қаласының Кәсіподақ орталығының және бұқаралық ақпарат құралдарының өкілдері қатысты.

Экономика және бюджеттік жоспарлау басқармасының басшысы Қайсар Манқараев қоғамдық тыңдауға қатысушыларды биылғы 10 айдағы елорданың әлеуметтік-экономикалық даму қорытындыларымен қысқаша таныстырды. Таяу жылдары бюджеттік саясаттың басымдықтары инвестициялық жобаларды қаржыландыру және азаматтарды әлеуметтік қолдау, барлық әлеуметтік кепілдіктер мен халық алдындағы міндеттемелерді сақтау болып табылады.

Әлеуметтік тұрақтылықты қамтамасыз ету үшін жалақы бойынша берешекті өтеу және қызметкерлердің босатылуына жол бермеу, азаматтардың жекелеген санаттарына әлеуметтік көмек көрсету және қолдау көрсетудің атаулылығын қамтамасыз ету және тиімділігін арттыру, халықты жұмыспен қамту орталықтарына өтініш бергендердің ішінен ерекше қажеттіліктері бар адамдарды жұмысқа орналастыру бойынша жұмыс 85% - ға дейін жалғасады.

Тұтастай алғанда, экономиканың дамуына № 1 Индустриялық парктің жобаларын және ұлттық жобаларды іске асыру арқылы қайта өңдеу және сервис салаларында қабылданатын шаралар ықпал ететін болады. 2026 жылға дейін Индустриялық парк аумағында 900-ге жуық жұмыс орнын құрумен 12 жаңа инвестициялық жобаны іске асыру жоспарланған.

Болашақта бизнесті жүргізудің қолайлылығын жақсарту жөніндегі шаралар жалғастырылатын болады. Жаңа экономиканың басым секторларын дамытуды ынталандыру үшін Нұр-Сұлтанда кредиттерді арзандату, гранттық қаржыландыру, инфрақұрылымдық қамтамасыз ету тетіктерін көздейтін бизнес-бастамаларды қолдау бағдарламаларын іске асыру жалғасады.

Инфляцияның өсуіне жол бермеу мақсатында бәсекелес ішкі нарықтардың дамуын, бағалық сөз байласуға және жосықсыз бәсекелестікке қарсы күресті ескере отырып, бағаларды тұрақтандыру жөніндегі шараларды іске асыру жалғасатын болады.

Бюджеттік бағдарламаларды мониторингілеу жөніндегі сараптама тобының отырысында бюджет жобасын алдын ала талқылау Қоғамдық кеңес мүшелеріне өздерін қызықтырған сұрақтарға толық жауап алуға мүмкіндік берді.

Сонымен қатар, қоғамдық тыңдауға қатысушылар бюджет жобасын талқылау барысында өткізіліп жатқан іс-шаралармен қатар бірқатар проблемалық мәселелер бар екенін атап өтті. Осылайша, бюджетті тиімсіз жоспарлау қаржы жылы ішінде бюджеттік бағдарламалардың кейбір әкімшілерінің бюджеттің шығыс бөлігін қайта қарауға, қаражатты қала аудандарына пропорционалды емес бөлуге алып келеді. Мәселен, “Байқоңыр” ауданы әкімдігінің шығыс бөлігінде екі есе аз, “Сарыарқа” ауданы әкімдігінде ауданды ұстауға, оның ішінде Өндіріс, Лесозавод, Көктал, Мясокомбинат тұрғын үй алаптарын жарықтандыру, санитарлық тазарту, абаттандыру мәселелерін шешуге арналған бюджет қаражаты бір жарым есе аз қарастырылады.

Сондай-ақ, қалалық емханаларда магнитті-резонансты томография (МРТ), компьютерлік томография (КТ), адам ағзасын ультрадыбыстық зерттеу (УДЗ) үшін жабдықтар жетіспейді немесе іс жүзінде жоқ екені аталып өтті.

Қоғамдық кеңес мүшелері бір білім алушы балаға бір реттік тамақтану құнын, тамақтану сапасын арттыру мәселелерін бірнеше рет көтерген болатын.

Қоғамдық тыңдауға қатысушылар айтылған ескертулер мен ұсыныстарды ескере отырып, алдағы үш жылға арналған бюджет жобасын жалпы мақұлдады.