Мәслихаттың кейбір шешімдеріне өзгерістер енгізу

Қалалық мәслихатта Алтыншаш Табулдинаның төрағалығымен әлеуметтік-мәдени даму мәселелері жөніндегі тұрақты комиссияның отырысы өтті.

Тұрақты комиссия отырысы барысында жұмыспен қамту және әлеуметтік қорғау басқармасының басшысы Сәуле Нұрғожина үш мәселе бойынша баяндама жасады.

Күн тәртібінің бірінші мәселесі - «Астана қаласы мәслихатының 2017 жылғы 12 желтоқсандағы №221/25-VI «Нұр-Сұлтан қаласында әлеуметтік көмек көрсету, оның мөлшерлерін белгілеу және мұқтаж азаматтардың жекелеген санаттарының тізбесін айқындау қағидасы туралы» шешіміне өзгерістер мен толықтырулар енгізу туралы».

Аталған санаттарға әлеуметтік қолдау көрсету шараларын арттыру мақсатында Ауғанстандағы ұрыс қимылдарына қатысушылар қатарындағы жеңілдіктер бойынша Ұлы Отан соғысының мүгедектеріне теңестірілген басқа мемлекеттер аумағындағы ұрыс қимылдарының ардагерлеріне, сондай-ақ Чернобыль атом электр станциясындағы апаттың зардаптарын жоюға қатысқан адамдар қатарындағы басқа да адамдарға атаулы күндер мен мереке күндеріне әлеуметтік көмек мөлшерін 35 АЕК мөлшерінде ұлғайту, сондай-ақ зейнеткерлер мен ядролық сынақтардан келтірілген залал үшін біржолғы өтемақы алушылар қатарындағы Семей ядролық сынақ полигонындағы ядролық сынақтардың салдарынан зардап шеккен адамдарға атаулы күндерге әлеуметтік көмекті 2,5 АЕК мөлшерінде қосу ұсынылады.

Сонымен қатар, Қазақстан Республикасының Заңында белгіленген тәртіппен ақталған 1986 жылғы оқиғаларға қатысушылар қатарындағы саяси қуғын-сүргін құрбандарына санаторлық-курорттық емделуге және коммуналдық қызметтерді төлеуге көмекті қосу ұсынылады.

Депутат Нұрдәулет Оразханов баяндамашыдан экологиялық апаттан зардап шеккен Арал тұрғындары әлеуметтік көмек көрсетілетін азаматтар тізбесіне кірген - кірмегенін нақтылауды сұрады.  

«Нұр-Сұлтан қаласында тұрғын үй көмегін көрсетудің тәртібі мен мөлшерін айқындау туралы» екінші мәселе бойынша Сәуле Нұрғожина депутаттарға 2020 жылғы 24 қыркүйекте Қазақстан Республикасы Үкіметінің Қаулысымен Қазақстан Республикасы Үкіметінің 2009 жылғы 30 желтоқсандағы №2314 қаулысымен бекітілген Тұрғын үй көмегін көрсету қағидаларына өзгерістер енгізілгенін, осыған байланысты Нұр-Сұлтан қаласы мәслихатының шешімін сәйкестікке келтіру қажеттілігі туындағанын айтты.

Көп пәтерлі тұрғын үйдің «мүлік иелерінің бірлестігі» ұғымының енгізілуіне байланысты «кондоминиум объектісін басқару органы» ұғымы алынып тасталды, өйткені кондоминиум объектісін басқаруды мүлік иелерінің өздері жүзеге асырады. Тұрғын үй көмегі меншік құқығындағы тұрғын үйде тұратын аз қамтылған отбасыларға, сондай-ақ мемлекеттік тұрғын үй қорынан тұрғын үйді жалдаушыларға (қосымша жалдаушыларға) көрсетілетін болады.

Депутат Оразханов жұмыспен қамту және әлеуметтік қорғау басқармасының басшысына тұрғын үй көмегі көрсетілетін елорда тұрғындарының нақты санына қатысты сұрақ қойды.

Жұмыспен қамту және әлеуметтік қорғау басқармасының басшысы түсіндіргендей, Астана қаласы мәслихатының 2019 жылғы 6 наурыздағы № 356/45-VI  «Астана қаласында көші-қон процестерін реттеу қағидаларын бекіту туралы» шешіміне өзгерістер енгізу Облыстардағы, республикалық маңызы бар қалалардағы, астанадағы көші-қон процестерін реттеудің үлгілік қағидаларына өзгерістер енгізумен байланысты, осыған орай, Нұр-Сұлтан қаласы мәслихатының шешіміне тиісті өзгерістер енгізу қажеттілігі туындайды.

Тұрақты комиссия отырысының нәтижелері бойынша барлық қаралған мәселелерді таяудағы маслихат сессиясына шығару ұсынылды.