Жер учаскелерін иеліктен шығару мәселесі бойынша отырыс

Қалалық мәслихатта Талғат Нәрікбаевтың төрағалығымен ZOOM сервисінің бейнеконференцбайланыс платформасында заңдылық, құқық тәртібі және қоғаммен жұмыс жасау мәселелері жөніндегі тұрақты комиссияның отырысы өтті.

Күн тәртібінде жер учаскелерін немесе өзге де жылжымайтын мүлікті мемлекет мұқтажы үшін алып қоюға байланысты иеліктен шығару туралы шарт жобасын келісу мәселесі тұр.

Негізгі мәселе бойынша «Нұр-Сұлтан қаласының Тұрғын үй және тұрғын үй инспекциясы басқармасы»  ММ басшысы Әнуар Саипов сөз сөйледі және мемлекеттік қажеттіліктер үшін алып қоюға байланысты иеліктен шығарылатын, мәслихаттың тұрақты комиссиясының қарауына қойылатын жер учаскелерінің тізбесін ұсынды.

Тізбеге мынадай әлеуметтік объектілер кірді – Тәуелсіздік даңғылы мен Шарль де Голль көшесінің қиылысы ауданында орналасқан жапсарлас салынған үй-жайлары мен паркингі бар көп пәтерлі тұрғын үй кешенінің; Шарль де Голль және А. Тоқпанов көшелерінің қиылысы ауданындағы көшенің; Ш. Қосшығұлұлы және Жамбыл көшелерінің қиылысы ауданында орналасқан жапсарлас салынған үй-жайлары мен паркингі бар көп пәтерлі тұрғын үй кешенінің; Қ.Күмісбеков және С.Сейфуллин көшелерінің қиылысы ауданында орналасқан жапсарлас салынған үй-жайлары мен паркингі бар көп пәтерлі тұрғын үй кешенінің құрылысы; Ш.Уәлиханов көшесінен бастап Ш. Жиенқұлова көшесіне дейінгі учаскедегі Ы Дүкенұлы көшесін; Ш. Айманов көшесі, № 3 үй ауданы бойынша орналасқан учаске абаттандыру үшін, Ағадыр және Игілік көшелерінің қиылысы ауданында орналасқан учаске абаттандыру үшін; А. Иманов және Егемен Қазақстан газеті көшелерінің қиылысы ауданында орналасқан мектеп құрылысы; Өндіріс тұрғын алабында Тайбурыл және Игілік көшелерінің қиылысы ауданында орналасқан мектеп құрылысы.

Тұрғын үй және тұрғын үй инспекциясы басқармасының басшысы Әнуар Саипов мәслихат депутаттарынан ұсынылып отырған шарт жобасын қолдауды сұрады.

Тұрақты комиссияның төрағасы Талғат Нәрікбаев отырысқа онлайн қатысушылар - тұрғын үй иелерін қосуды ұсынды, олар өтемақы сомасымен танысқандықтарын және төлем сомасымен келісетіндерін растады.

Талғат Нәрікбаев тұрғын үй иелеріне олардың өз келісімін білдіргендіктен, мәселе мәслихаттың кезектен тыс сессиясының қарауына шығарылатынын айтты. Сессия өткізілгеннен кейін олардың өздерімен келісілген соманы алуға құқығы бар.

Тұрақты комиссия отырысын қорытындылай келе, төраға шартты келісу туралы мәселе тұрақты комиссиялардың бірлескен отырысының қарауына шығарылатынын айтты.