Көшеге атау беру жөніндегі көпшілік тыңдаулар
10.06.2021
Қалалық мәслихатта Талғат Нәрікбаевтың төрағалығымен Zoom сервисінің бейнеконференцбайланыс платформасында Нұр-Сұлтан қаласының жобалық көшесіне атау беру мәселесі бойынша көпшілік тыңдаулар өтті.
Көпшілік тыңдаулар ҚР Үкіметінің 2014 жылғы 24 ақпандағы №138 қаулысымен бекітілген «Әкімшілік-аумақтық бірліктерге, елді мекендердің құрамдас бөліктеріне атау беру, оларды қайта атау, сондай-ақ олардың атауларының транскрипциясын нақтылау мен өзгерту кезінде тиісті аумақ халқының пікірін ескеру қағидаларының» 4-тармағына сәйкес өткізіледі.
«Нұр-Сұлтан қаласының Тілдерді дамыту және архив ісі басқармасы» ММ басшысы Тілеуғали Қышқашбаев сөз сөйледі.
Ол көпшілік тыңдауларға қатысушыларға Алматы ауданындағы жобалық көшеге атау беру туралы ұсыныс Нұр-Сұлтан қаласының Ономастикалық комиссиясынан түскенін хабарлады. Комиссия отырысы 2021 жылғы 28 наурызда өтті. Ономастикалық комиссияның отырысында Павлодар облысының тумасы Николай Макиевскийдің есімін елорда көшелерінің біріне беру мәселесі қаралды.
Николай Макиевский 1969 жылы Павлодар индустриалды институтын бітірді. Өзінің еңбек жолын 1960 жылы «Павлодарстрой» құрылыс басқармасының қарапайым жұмысшысы ретінде бастады. Содан кейін Құрылыс басқармасының шебері, аға прораб, бас инженер, трест басқарушысы болып жұмыс істеді.
1984 жылы Қазақ КСР ауыр индустрия кәсіпорындарының құрылыс министрі, 1986 жылы Қазақ КСР құрылыс министрі болды. 1988 жылы Министрлер Кеңесі төрағасының орынбасары лауазымына ұсынылды, содан кейін Премьер-Министрдің орынбасары - ҚР Төтенше жағдайлар жөніндегі мемлекеттік комитетінің төрағасы болды. Оның функцияларына республиканың жоғары және орталық мемлекеттік органдарын Ақмола қаласына көшіру жөніндегі мемлекеттік комиссияны басқару кірді.
Еңбек саласындағы қызметі үшін Николай Макиевский ордендер, медальдар және алғыс хаттармен марапатталды.
Депутаттар Ономастикалық комиссияның елорданың жобалық көшесіне Николай Макиевский есімін беру жөніндегі ұсынысын қолдады.
Көпшілік тыңдаулар төрағасы Талғат Нәрікбаев көпшілік тыңдауларды аяқтай келе, қорытынды туралы хаттама БАҚ-та және қалалық әкімдік ресми сайтында жарияланатынын айтты.