Бюджетті нақтылау мәселесі бойынша кезектен тыс сессия

Қалалық мәслихаттың кезектен тыс сессиясы Гүлнар Данбаеваның төрағалығымен ZOOM сервисінің бейнеконференцбайланыс платформасында өтті.

Кезектен тыс сессия жұмысына қала әкімінің орынбасары Нұрлан Нұркенов, қала аудандарының әкімдері, департаменттердің, басқармалардың басшылары және бұқаралық ақпарат құралдарының өкілдері қатысты.

Кезектен тыс сессияның талқылауына шығарылған мәселелер бейінді тұрақты комиссияның отырысында, тұрақты комиссиялардың бірлескен отырысында және салынып жатқан объектілерді аралау кезінде алдын ала қаралды.

Нұр-Сұлтан қаласының аумақтық сайлау комиссиясының мүшелерін сайлау туралы мәселе бойынша депутаттар алдында Мирас Шекенов сөз сөйледі.

М. Шекенов "Қазақстан Республикасындағы сайлау туралы" Қазақстан Республикасының 1995 жылғы 28 қыркүйектегі Конституциялық Заңының 10-бабын басшылыққа ала отырып, "Нұр-Сұлтан қаласының аумақтық сайлау комиссиясының мүшесін қызметінен босату туралы" Қазақстан Республикасы Орталық сайлау комиссиясының 2020 жылғы 18 қыркүйектегі №24/326 Қаулысының негізінде шығып қалған адамның орнына Нұр-Сұлтан қаласының аумақтық сайлау комиссиясының мүшесін сайлау қажет екенін айтты.

Мәслихат депутаттары Нұр-Сұлтан қаласының аумақтық сайлау комиссиясынан шығып қалған мүшесінің орнына Бақыт Ғазизқызы Бектемісованы сайлау туралы шешім қабылдады.

Бюджетті нақтылау мәселесі бойынша Экономика және бюджеттік жоспарлау басқармасының басшысы Қайсар Манқараев ақпарат берді. Ол өз кірістерінің нақты жиналуына жүргізілген талдау меншікті кірістер бойынша жоспарды 22 240 млн.теңгеге 327 226 млн. теңгеге дейін ұлғайту үшін резервтердің бар екенін анықтады.

Жергілікті бюджетті нақтылау кезінде әлеуметтік блокты, оның ішінде: Жұмыспен қамту және әлеуметтік қорғау, Білім беру және Денсаулық сақтау басқармаларының бағдарламаларын іске асыруға қосымша қаржыландыру көзделген; мұқтаж азаматтардың жекелеген санаттарына жеке көмекшінің қызметіне әлеуметтік көмек көрсетуге қосымша қаржыландыру, тегін медициналық көмектің кепілдік берілген көлемін қосымша қамтамасыз ету, әлеуметтік маңызы бар ішкі қатынастар бойынша жолаушылар тасымалын субсидиялау және тағы басқалар.

Депутат Зейнолла Шибкенов қала аудандарын әркелкі қаржыландыруға қатысты сұрақ қойды.

"Қаржыландырудың ең аз сомасы «Байқоңыр» ауданына бөлінді. Бұл немен байланысты? Қаржыландыру сомасы аудан әкімімен келісілді ме?"- деп сұрады депутат.

"Байқоңыр" ауданының әкімі Нұрбол Нұрсағатов: "Қаражатты бөлу келісілді және бұл ақша аудан әкімдігінің алдында тұрған міндеттерді орындау үшін жеткілікті" - деп жауап берді.

Депутат Илья Мещеряков тұрақты комиссиялардың бірлескен отырысында ағымдағы жылдың соңына дейін Құрылыс басқармасының ақшалай қаражатты игеру мәселесі бойынша сөз сөйледі.

"Құрылыс басқармасы осы мәселе бойынша істердің ағымдағы жағдайы туралы ақпарат берді. 27 қарашада мен әлеуметтік мақсаттағы құрылыс нысандарына бардым - Құрылыс басқармасына қатысты сұрақтар бар. Бүгінгі сессия бюджетті нақтылауға арналғанын ескере отырып, Құрылыс басқармасының бюджет қаражатын игеру мәселесін мәслихаттың бейінді комиссиясы отырысының қарауына ауыстыруды ұсынамын" - деді И. Мещеряков.

Тұрғын үй және тұрғын үй инспекциясы басқармасының басшысы Асылбек Есенбаев депутаттарға үшінші мәселе бойынша "Жер учаскелерін мемлекет мұқтажы үшін алып қоюға байланысты жер учаскелерін немесе өзге де жылжымайтын мүлікті иеліктен шығару туралы шарттар жобаларын келісу туралы" ақпарат берді.

Есенбаев А. сессияның қарауына әлеуметтік маңызы бар объектілерді салу үшін алынатын жер учаскелерін иеліктен шығару туралы шарттардың тізбесін ұсынды: Тәуелсіздік даңғылы мен Шарль де Голль көшесінің қиылысында орналасқан жапсарлас үй - жайлары мен паркингі бар көп пәтерлі тұрғын үй кешенін салу үшін; Ш. Құдайбердіұлы және Манас даңғылдарының қиылысында орналасқан жапсарлас үй-жайлары мен паркингі бар көп пәтерлі тұрғын үй кешені; с189 көшесі бойынша 600-800 орындық көпсалалы аурухана (жобалық атауы); Тұран даңғылы мен №24 көшенің қиылысындағы мектептер; Есіл өзенінің арнасын қайта жаңарту, 5-ші кезек, Сарыарқа даңғылындағы көпірден Көктал тұрғын алабына дейін жағажай аймағы бар № 5 учаске; Ш. Қосшығұлұлы және Жамбыл көшелерінің қиылысы ауданында орналасқан жапсарлас үй-жайлары мен паркингі бар көп пәтерлі тұрғын үй кешені; Ы. Алтынсарин және И. Гете көшелерінің қиылысы ауданында орналасқан аумақты абаттандыру; В. Вишневский көшесі, № 10 үйдің ауданында орналасқан құбыр торабын салу (УТ10); Ш. Қосшығұлұлы көшесі бойында орналасқан № 8 үйдің ауданын абаттандыру үшін.

Кезектен тыс сессияның талқылауына шығарылған мәселелер қаралып, олар бойынша тиісті шешімдер қабылданды.