Жер учаскелерін иеліктен шығару туралы шарттардың жобаларын келісу

Елорда мәслихатында Гүлнар Данбаеваның төрағалық етуімен «Zооm» бейнеконференцбайланыс платформасында Заңдылық, құқық тәртібі және қоғаммен жұмыс жасау мәселелері жөніндегі тұрақты комиссияның отырысы өтті.

«Нұр-Сұлтан қаласының Тұрғын үй және тұрғын үй инспекциясы басқармасы» ММ басшысы А.Е. Есенбаев қолданыстағы заңнамаға сәйкес мемлекет мұқтажы үшін жер учаскелерін алып қоюға байланысты жер учаскелерін немесе өзге жылжымайтын мүлікті мемлекет мұқтажы үшін иеліктен шығаруға байланысты шарттардың жобаларын келісу мәселесі туралы баяндама жасады.  

Асылбек Есенбаев тұрақты комиссияның қарауына әлеуметтік нысандардың құрылысы үшін алынған 71 жер учаскелерін иеліктен шығару туралы шарттар тізбесін ұсынды, олар: 600-800 орындық көпсалалы аурухана; Тұран даңғылы мен №24 көшесінің қиылысы және Қарасай батыр мен Бұланты көшелерінің қиылысы ауданындағы мектеп; Тәуелсіздік даңғылы мен А. Тоқпанов көшелерінің ауданындағы А2 және Южная 2 (жобалық атауы) көшелерін салу; Керей, Жәнібек хандар көшесіндегі Қан орталығының медициналық зертханасы аумағын кеңейту және басқа да нысандар салу үшін алынған жер учаскелері.

Қалалық Тұрғын үй және тұрғын үй инспекциясы басқармасының келісімін растау үшін жер учаскелерінің иелері тұрақты комиссия отырысына шақырылды.

«Сіз Тұрғын үй және тұрғын үй инспекциясы басқармасымен шартқа қол қойдыңыз. Сіздің келісу үшін шарттарыңыз депутаттарға ұсынылған. Мәслихат сессиясын өткізгеннен кейін сіздер шартта көрсетілген соманы алуларыңызға құқықтарыңыз бар», – деді Гүлнар Данбаева.

Бұл шараға үш адамнан басқа барлық жер учаскелерінің иелері қатысты, олар шартта көрсетілген сомамен таныс екендіктерін растады.

Г.А. Данбаева тұрақты комиссиясының отырысын қорытындылай отырып бұл мәселе Мәслихаттың кезектен тыс сессиясының қарауына шығарылатынын, сессияда бекітілгеннен кейін жер учаскелерінің иелері шарттар жасаса алатындығын және жер учаскелері үшін ақшалай өтемақы ала алатындығын айтып өтті.