Мәслихаттың кезектен тыс сессиясы өтті

Қалалық мәслихаттың кезектен тыс сессиясы мәслихат депутаты, заңдылық, құқық тәртібі және қоғаммен жұмыс мәселелері жөніндегі тұрақты комиссияның мүшесі Зәуре Жүсіпованың төрағалығымен «Zoom» сервисінің бейнеконференцбайланыс платформасында өтті. Facebook-тің дәстүрлі тікелей эфирі техникалық себептерге байланысты болған жоқ.

Кезектен тыс сессия барысында «Нұр-Сұлтан қаласының учаскелік сайлау комиссияларының мүшелерін сайлау туралы» Астана қаласы мәслихатының 2019 жылғы 15 қаңтардағы № 351/43-VI шешіміне толықтыру енгізу  туралы мәселесі қаралды.

Бірінші мәселе бойынша Нұр – Сұлтан қаласы мәслихатының уақытша комиссиясының басшысы Мирас Шекенов аумақтық, учаскелік сайлау комиссияларының мүшелерін сайлау жөнінде баяндама жасады. Ол депутаттарды Саяси партиялар мен қоғамдық бірлестіктерден сайлау комиссияларының құрамына кандидатуралар бойынша ұсыныстар келіп түскендігі туралы хабардар етті. Кандидаттардың жалпы саны-352 адам. Комиссияларды құру процесі барысында гендерлік тепе-теңдік, осы комиссияның құрамын қалыптастырған мәслихат орналасқан әкімшілік-аумақтық бірлік аумағында тұруы, сайлау комиссияларының мүшелігіне кандидаттардың соттылығының болмауы ескерілді.

Мәслихат депутаттары мәслихаттың уақытша комиссиясының ұсынысына сәйкес қаланың учаскелік сайлау комиссияларының мүшелерін таңдау бойынша ашық дауыс беруді өткізді.

Қолданыстағы заңнамаға тұрғын үй көмегін алуға үміткер отбасының (немесе ҚР азаматының) жиынтық табысын есептеу тәртібіне, «Азаматтарға арналған үкімет «Мемлекеттік корпорациясы» КЕАҚ қызмет түрлерін кеңейтуге, «мекенжай анықтамасын беру» мемлекеттік қызметін тоқтатуға қатысты өзгерістерге байланысты «Астана қаласында тұрғын үй көмегін көрсету қағидалары туралы» Астана қаласы мәслихатының 2019 жылғы 6 наурыздағы № 363/45-VI шешіміне өзгерістер енгізу туралы мәселесі қаралды. Баяндамашы ретінде «Нұр-Сұлтан қаласының жұмыспен қамту және халықты әлеуметтік қорғау басқармасы» ММ басшысының м.а. Илья Скуб сөз сөйледі.

Сонымен қатар, «Нұр - Сұлтан қаласының тұрғын үй және тұрғын үй инспекциясы басқармасы» ММ басшысы Асылбек Есенбаев депутаттар алдында мемлекет мұқтажы үшін 61 жер учаскесін алып қоюға байланысты жер учаскелерін немесе өзге де жылжымайтын мүлікті иеліктен шығару туралы шарттардың жобаларын келісу туралы мәселесін айтты.

«Мемлекеттік мүлік туралы» Қазақстан Республикасы Заңының 16 - бабының 3-тармақшасына және «Қазақстан Республикасы астанасының мәртебесі туралы» Қазақстан Республикасы Заңының 8-бабының 4-тармақшасына, «Тұрғын үй қатынастары туралы» Қазақстан Республикасының Заңына сәйкес жергілікті өкілді органдар жер учаскелерін мемлекет мұқтажы үшін алып қоюға байланысты жер учаскелерін немесе өзге де жылжымайтын мүлікті иеліктен шығару туралы шарттардың жобаларын келіседі» - деп атап өтті Тұрғын үй және тұрғын үй инспекциясы басқармасының басшысы.

Асылбек Есенбаев мәслихаттың тұрақты комиссиясының қарауына ұсынылатын жер учаскелерінің тізбесіне жете тоқталды.

«Бұл келесі әлеуметтік нысандар: Мыңжылдық аллеясы бойынша гүлзарлар мен бульварлар (полигондар 1,2,3); С189 көшесі бойынша 600-800 орынға арналған көпсалалы аурухана, «Газ аппаратурасы» зауыты ауданындағы Есіл өзенінің жағалау аймағын абаттандыру; 23-16, Т. Жүргенов, А. Байтұрсынов, Ж. Нәжімеденов көшелерінің бойында орналасқан жапсарлас үй-жайлары, паркингі және әлеуметтік-мәдени объектілері бар көппәтерлі тұрғын үй кешені; жапсарлас салынған Қосшығұлұлы және Жамбыл көшелерінің қиылысында орналасқан үй-жайлармен және паркингпен; Тәуелсіздік даңғылы және А. Тоқпанов көшесі ауданында орналасқан А 2 және Южная 2 көшелері; А. Иманов және Б. Бейсекбаев көшелерінің қиылысы ауданында орналасқан саябақ» - деп хабарлады А. Есенбаев.

Одан әрі депутаттар әкімнің елорданың әлеуметтік-экономикалық дамуы туралы есеп беру мерзімін ағымдағы жылдың 4 тоқсанына ауыстыру туралы мәселені қарады.

Кезектен тыс сессия жұмысына қала әкімінің орынбасары Нұрлан Нұркенов, қала аудандары әкімдерінің орынбасарлары, басқарма басшылары мен БАҚ өкілдері қатысты.

Кезектен тыс сессияның талқылауына шығарылған барлық мәселелер қаралып, олар бойынша тиісті шешімдер қабылданды.