Қалалық мәслихаттың кезектен тыс сессиясы

Қалалық мәслихаттың бүгінгі кезектен тыс сессиясы барысында бейнеконференц-байланыс режимінде елорда азаматтарын әлеуметтік көмекпен қамтамасыз ету, жер телімдерін иеліктен шығару және т.б. мәселелер қаралды.

Мемлекет мұқтажы үшін жер телімдерін иеліктен шығаруға байланысты жер телімдерін немесе өзге де жылжымайтын мүлікті иеліктен шығару туралы шарт жобаларын келісу жөніндегі  мәселе бойынша            «Нұр-Сұлтан қаласының Тұрғын үй және тұрғын үй инспекциясы басқармасы» ММ басшысы Асылбек Есенбаев сөз сөйледі.

Депутаттар сөз сөйлеушіге қандай ұйым жер телімдерін бағалауды жүргізгені туралы сұрақ қойды және анықтаманы ғана емес, бағалау компаниясының қорытындысын да ұсынуды сұрады.

Есенбаев толық ақпарат барлық депутаттарға жазбаша түрде берілетінін айтты.

Күн тәртібінде азаматтарды әлеуметтік қолдау мәселелері өзекті болды. Аталған мәселелер бойынша «Нұр-Сұлтан қаласының жұмыспен қамту және әлеуметтік қорғау басқармасы» ММ басшысы Сәуле Нұрғожина баяндама жасады.

Депутаттар 1941-1945 жылдардағы Ұлы Отан соғысындағы Жеңістің  75 жылдығын тойлауға байланысты Нұр-Сұлтан қаласының жеке санаттағы азаматтарына қосымша әлеуметтік көмек көрсету Ережелерін бірауыздан бекітті.

44 ардагерге – 850 000 (сегіз жүз елу мың) теңге мөлшерінде; жеңілдіктер мен кепілдіктер бойынша ҰОС қатысушылары мен мүгедектеріне теңестірілген 405 тұлғаға – 50 000 (елу мың) теңге мөлшерінде; жеңілдіктер мен кепілдіктер бойынша соғысқа қатысушыларға теңестірілген тұлғалардың басқа да санаттарына (3529 адам), тыл еңбеккерлеріне – 20 000 (жиырма мың) теңге мөлшерінде біржолғы ақшалай төлем ұсыну көзделген.

Сондай-ақ, 2020 жылдың ішінде ардагерлерді ТМД елдері мен Қазақстан Республикасының аумағы бойынша батыр-қалаларға, Жауынгерлік Даңқ орындарына, әскери жерлеу орындары мен әскери ескерткіштерге бару үшін теміржол және (немесе) әуе көлігімен бір рет тегін жол жүрумен қамтамасыз ету көзделген.

Депутат Аман Аюпов келесі жылы ардагерлер мен олардың отбасыларының көбі осы соманы пайдалана алуы үшін төлемдерді жыл басында жүргізуді ұсынды.

Депутат Сергей Солодовников депутат Аюповтың ұсынысын қолдап, келесі жылы ардагерлерге төлем жасау үшін белгілі бір соманы қарастыру қажеттігін атап өтті және егер адамдар саны азайса, соманы қалған ардагерлерге бөлу керектігін айтты, сондай-ақ ол ардагерлерді алып жүретін тұлғалардың тегін жол жүруі туралы мәселені шешуді ұсынды.

Депутат Гүлнар Данбаева БАҚ-та ардагерлерге 1 миллион теңгеден төлеу туралы ақпарат жүргенін айтты.

Қаланың жұмыспен қамту және әлеуметтік қорғау басқармасының басшысы 177 мың теңге бұрын бекітілген төлем, 850 мың теңге - қосымша әлеуметтік көмек шеңберінде біржолғы ақшалай төлем екенін хабарлады. Шығынның жалпы сомасы бір ардагерге 1 миллион теңгені құрайды. Өткен аптада депутаттармен қабылданған шешімнен кейін ардагерлерге 177 мың теңге жіберілді, қалған сома да төленеді. Келесі жылы қосымша әлеуметтік көмекті жоспарлау кезінде депутаттардың барлық ұсыныстары ескерілетін болады.

Сондай-ақ «Нұр-Сұлтан қаласында әлеуметтік көмек көрсету, оның мөлшерлерін белгілеу және мұқтаж азаматтардың жекелеген санаттарының тізбесін айқындау қағидасына»; «Астана қаласы азаматтарының жекелеген санаттарына қалалық бағдарлардың жолаушылар көлігінде жол жүруге төлем төлеуден босату түрінде әлеуметтік көмек көрсету тәртібіне»; «Астана қаласының мүгедектер қатарындағы мүмкіндігі шектеулі балаларды үйде оқытуға жұмсаған шығындарын өндіріп алу тәртібі мен мөлшеріне» өзгерістер енгізу туралы шешімдер бекітілді.

Бұдан бұрын азаматтардың жекелеген санаттарын әлеуметтік қолдау жөніндегі мәслихаттың нормативтік құқықтық актілерінің барлық жобаларын қалалық мәслихаттың бейінді комиссиясы мақұлдады.

Соңғы болып Нұр-Сұлтан қаласы мәслихатының Нұр-Сұлтан қаласына шетелдік жұмыс күшін тартуға рұқсат беру жөніндегі комиссияның құрамы туралы шешіміне өзгерістер енгізу туралы мәселесі қаралды.

Мәслихаттың кезектен тыс сессиясының күн тәртібіне енгізілген барлық мәселелер қаралып, олар бойынша тиісті шешімдер қабылданды.