Нұр-Сұлтан қаласы мәслихатының үндеуі

Құрметті елорда тұрғындары!

Коронавирус ауруымен ауырғандар санының өсуіне байланысты Қазақстан Республикасы Президентінің жанындағы төтенше жағдайды қамтамасыз ету жөніндегі мемлекеттік комиссияның шешімімен бүгінгі күннен бастап Нұр-Сұлтан және Алматы қалаларында карантин енгізілді.

Бүгінгі таңда елорда азаматтарының қауіпсіздігін қамтамасыз ету бойынша барлық қажетті шаралар қабылдануда.

Ортақ ынтымақтастығымыз, жауапкершілігіміз, тыныштығымыз, тәртібіміз, бір-бірімізге көмекке келуге дайын екендігіміз, әсіресе қазіргі жағдайда аса құнды және қажет.

Қарапайым сақтық шараларына деген байыпты қарым-қатынасымыз аурудан қорғайды және вирустың таралуына кедергі болады.

Оның қарт адамдарға, сондай-ақ денсаулығы әлсіз адамдарға аса қауіпті екенін білесіздер. Өзіңізді және жақындарыңызды сақтаңыздар.

Мәслихат депутаттары елорданың барлық азаматтары секілді аурудың таралу қаупін азайту бойынша алдын алу шараларын қамтамасыз етуге тікелей қатысады.

Депутаттар қатарындағы кәсіпорын басшылары өз қызметкерлерін ақылы демалысқа жіберді, негізгі қызметкерлер үшін жылжымалы жұмыс кестесін әзірледі, қаланың шалғай аудандарында тұратын қарт адамдарға дәрі-дәрмек жеткізу үшін кәсіпорынның автокөліктерін емханаларға ұсынды.

Қалалық мәслихат аппараты коронавируспен күреске бір күндік жалақысын аударды.

Депутаттар, ЖОО ректорлары студентерді қашықтықтан оқыту жүйесіне  ауыстыру жұмыстарын ұйымдастырды.

Депутаттық корпус мүшелері – дәрігерлер, педагогтар жоғары дайындық режимінде жұмыс істейді, коронавирустық инфекцияның алдын алу бойынша жедел штабтардың жұмысына белсенді қатысады.

Құрметті елорда тұрғындары, сіздерге үндеу жолдай отырып, барлығымыз денсаулықты және өмірдің өзін сақтау үшін белгіленген барлық ережелерді мүлтіксіз сақтауымыз қажет.

Барлықтарыңызға денсаулық және амандық тілейміз!