Қалалық мәслихаты депутаттары шетте қалмай, «Біз біргеміз» атты акцияға белсене қатысты

Халық қалаулыларының ынтасы мен білек күштерінің арқасында оларға сеніп тапсырылған кәсіпорындар мен мекемелердің аумақтары қардан тазартылып, тұрғын үй алаптарының аумағы ретке келтірілді.

Қалалық мәслихат хатшысының міндетін атқарушы Мәжит Шайдаровтың басшылығымен «Ұлттық нейрохирургия орталығы» АҚ-тың 100-ден астам қызметкері денсаулық сақтау нысанына кіретін жолдар мен жаяу жүргіншілер жолын тазалады.

Аталған акцияны қалалық мәслихаты депутаттары – «С. Сейфуллин атындағы қазақ агротехникалық университеті» АҚ Басқарма Төрағасы Зулфухар Гаипов, №84, 17 мектеп директорлары Зәуре Жусупова, Рамзия Умербаева және басқалары өз ұжымдарымен бірге қолдады.

Депутат Мирас Шекенов өз сайлау округінде «Үркер» тұрғын үй алабының (Шығыс Ильинка) қоғамдық кеңес мүшелерімен бірлесіп қардан тазалау жұмыстарын ұйымдастырып, өткізді. Сондай-ақ, халық қалаулысы еріктілер ретінде жұмысқа «Астана» футбол командасының жас футболшыларын, әскери қызметкерлерді тарта білді. Соңғылары күрекпен және керекті құралдармен қаруланып, қарт адамдар тұратын жер үйлердің аулаларын омбы қардан тазартты.